Okubala 30 - Baibuli Ekibono kya Katonda 2014

Amateeka agagema ku kweyama

¹ Agho Musa yaakobera abakulu ab'ebika ebya Abaisiraeli ati: “Bino Musengwa Katonda by'alagiire:

² Omusaadha bw'aneeyamanga okugha Musengwa Katonda ekintu, oba n'akola ekirayiro ekimusiba, aidha kuteekwanga buteekwe okutuukiriza ky'asuubiiza. Taakimenhengagho naire.

³ “Omughala akaali kubayira, ng'akaali mu maka g'abazaire be, bw'aneeyamanga okugha Musengwa Katonda ekintu, oba n'akola ekirayiro ekimusiba,

⁴ memale ise n'awulira obweyamo obwo n'ekirayiro ekyo, aye n'abula ky'amutakaniamu, olwo omughala oyo aidha kuteekwanga buteekwe okutuukiriza ky'asuubiiza. Taakimenhengagho naire.

⁵ Aye ise oyo bw'anaatakanianga obweyamo obwo n'ekirayiro ekyo ku lunaku lw'abiwuliire, omughala oyo taavunaanizibwenga kubituukiriza. Era Musengwa Katonda aidha kumusonighanga, kuba ise n'amulobeire okubituukiriza.

⁶ “Aye kisoboka omughala oyo yaaja okufumbirwa ng'ate akaali kutuukiriza kye yeeyama, k'abe nga yeeyama mu bugenderevu oba mu butali bugenderevu, oba kyaba nti afumbiirwa ng'akaali kutuukiriza kirayiro kye yalayira.

⁷ Bwe kibanga kityo, memale iba n'awulira obweyamo obwo n'ekirayiro ekyo aye n'abula ky'amutakaniamu, olwo omughala oyo aidha kuteekwanga buteekwe okutuukiriza ky'asuubiiza. Taakimenhengagho naire.

⁸ Aye iba bw'anaamuloberanga ku lunaku lw'abiwuliire, olwo anaabanga ng'amenhiegho obweyamo mukazi we oyo bwe yakola, ka bube mu bugenderevu oba mu butali bugenderevu. Era anaabanga ng'amenhiegho n'ekirayiro mukazi we oyo kye yalayira. Era Musengwa Katonda aidha kusonighanga omukazi oyo.

⁹ “Aye namwandu oba omukazi eyayawukana n'iba, aidha kuteekwanga buteekwe okutuukiriza obweyamo bwe oba ekirayiro kye. Taakimenhengagho naire.

¹⁰ Era bw'anaabanga ng'aliku kye yeeyama oba kye yalayira nga mufumbo,

¹¹ era nga iba yakiwulira aye yaabula ky'amutakaniamu okumulobera, olwo omukazi oyo aidha kuteekwanga buteekwe okutuukiriza ky'asuubiiza. Taakimenhengagho naire.

¹² Aye iba bw'anaabimuloberanga n'abisazaamu ku lunaku lw'abiwuliire, olwo byonabyona omukazi oyo bye yayogera eby'obweyamo bwe oba eby'ekirayiro kye yasuubiza okubaaku ekintu ky'aneerumyamu, binaabanga nga tibikaamufuga. Era Musengwa Katonda aidha kumusonighanga.

¹³ Iba w'omukazi oyo asobola okukakasa oba okumenhagho obweyamo n'endagaano omukazi oyo yaaba ng'akoze ng'alayira okubaaku ekintu ky'aneerumyamu.

¹⁴ Aye bweghabitagho enaku nga iba oyo azira ky'amukobye, olwo anaabanga ng'akakaisa byonabyona mukazi we bye yeeyama ni bye yalayira; kuba okuva lwe yabiwulira azira kye yamukobaku.

¹⁵ Ate bw'anaamalanga n'abimenhagho nga ghabiseegho enaku bukyanga abiwulira, olwo mwene n'anaavunaanibwanga omusango gwa mukazi we ogw'obutabituukiriza.”

¹⁶ Ago n'amateeka Musengwa Katonda ge yagha Musa agagema ku bweyamo ni ku birayiro omukazi ali n'iba by'akola, era agagema ni ku mughala akaali kubayira ng'akaali mu maka g'abazaire be.