Okubala 3 - Baibuli Ekibono kya Katonda 2014

Batabane ba Aaroni

¹ Lino n'eizaire lya Aaroni ni Musa, mu biseera Musengwa Katonda mwe yayogerera ni Musa ku lusozi Sinai.

² Gano n'amaina ga batabane ba Aaroni: Nadabu nga n'omuberi, ni Abihu, ni Eleazari, ni Ithamari.

³ Baasiigibwa omuzigo era baayawulibwa okuba bakabona.

⁴ Aye Nadabu ni Abihu baafiira mu maiso ga Musengwa Katonda, bwe baaleeta omuliro ogutali mutukuvu mu maiso ga Musengwa Katonda oyo ng'ekigheebwayo. Kale baafa nga tibazaireeku mwana naire. Olwo Eleazari ni Ithamari baagheereza nga bakabona ekiseera kyonakyona iseibwe Aaroni kye yamala nga mulamu.

Abalevi bagheebwa omulimo ogw'okugheereza nga bakabona

⁵ Agho Musengwa Katonda yaakoba Musa ati:

⁶ “Yeta ekika eky'Abalevi, obateegho bagheerezenga kabona Aaroni.

⁷ Baidha kukolanga mu Weema ey'Okwagaananirangamu ni Musengwa Katonda, nga bagheereza kabona Aaroni oyo era n'abantu abandi boonaboona.

⁸ Baidha kulabiriranga ebintu byonabyona ebikozesebwa mu Weema eyo, era bakolenga emirimo gyonagyona egy'omu Weema eyo, ku lw'Abaisiraeli boonaboona.

⁹ Mu Baisiraeli boonaboona oidha kutoolamu Abalevi obaghe Aaroni ni batabane be, babeere irala babe.

¹⁰ Era oidha kutaagho Aaroni ni batabane be abo, bakole obwakabona; aye omuntu owundi yeenayeena agezaaku okukola obwakabona aidha kwitibwanga.”

¹¹ Musengwa Katonda era yaakoba Musa ati:

¹² “Bona eno, ntoire Abalevi mu Baisiraeli boonaboona, mu kifo eky'okutoola buli mwana omuberi azaalibwa Abaisiraeli. Baidha kubanga bange,

¹³ kuba buli mwana muberi yeenayeena wange. Ku lunaku lwe naitiraku abaana ababeri boonaboona mu Misiri, nayawula kiisi kizaalibwa mu luzaalo olusooka mu Isiraeli kibenga kyange, k'abe omuntu oba ensolo. Ninze Musengwa Katonda.”

Okubala Abalevi

¹⁴ Agho Musengwa Katonda yaakoba Musa mu irungu ery'e Sinai ati:

¹⁵ “Bala Abalevi boonaboona ng'ojiira ku nsimuko dhaibwe ni ku nda dhaibwe, ng'oviira ku mwana omulenzi ow'omwezi omulala n'okweyongerayo.”

¹⁶ Kale Musa yaababala nga Musengwa Katonda bweyamulagira.

¹⁷ Era gano n'amaina ga batabane ba Levi: Gereshoni, Kohathi, ni Merari.

¹⁸ Ni gano gaaba amaina ga batabane ba Gereshoni ng'ojiira ku nda dhaibwe: Libuni ni Shimei.

¹⁹ Bano ni batabane ba Kohathi ng'ojiira ku nda dhaibwe: Amuramu, Izahara, Heburoni, ni Uzzieli.

²⁰ Merari yeena yaaba ni batabane be bano, ng'ojiira ku nda dhaibwe: Mahali ni Mushi. Abo n'abaasimuka mu Levi, ng'ojiira ku nda dhaibwe.

²¹ Gereshoni yasimukamu Abalibuni n'Abashimei abo n'Abagerashoni.

²² Obungi bwaibwe aghalala, okuva ku baana abalenzi ab'omwezi omulala okutuuka ku basaadha abakulu, baali kasanvu na bitaanu.

²³ Abagerashoni abo baali nga bali n'okusimba weema dhaibwe ku luuyi olw'e bugwandhuba ow'Eweema ey'Okwagaananirangamu ni Musengwa Katonda, einhuma waayo.

²⁴ Omukulu waibwe nga ni Eliasafu mutabane wa Laeli.

²⁵ Omulimo gwaibwe gwali gwa kulabiriranga Weema eyo, ebintu ebigighembaku, n'ekintu ekikinzaagho,

²⁶ n'entimbe edheezungulula oluya, n'ekintu ekikinzaagho mu mulyango ogw'oluya olwezungulula Weema eyo ni alutaari, n'emigugha gyaku. Nga n'abalabirira emirimo egigemagana n'ebintu ebyo byonabyona.

²⁷ Kohathi yasimukamu Abamuramu, n'Abaizehari, n'Abaheberoni n'Abauzzieli abo n'Abakohathi.

²⁸ Obungi bwaibwe aghalala, okuva ku baana abalenzi ab'omwezi omulala okutuuka ku basaadha abakulu, baali kanaana na lukaaga (8,600).

²⁹ Abakohathi abo baali nga bali n'okusimba weema dhaibwe ku luuyi olw'omukono omusaadha olw'e buvandhuba olw'Eweema ey'Okwagaananirangamu ni Musengwa Katonda.

³⁰ Omukulu waibwe nga ni Elizafani mutabane wa Uzzieli.

³¹ Omulimo gwaibwe gwali gwa kulabiriranga Esanduuku ey'Endagaano, emeeza, ekikondo eky'entaala, alutaari, n'ebintu byonabyona bakabona bye baakozesanga mu Kifo Ekitukuvu, era n'ekintu ekikinzaagho. Nga n'abalabirira emirimo egigemagana n'ebintu ebyo byonabyona.

³² Omukulu ow'abakulembeze ab'Abalevi yali ng'ali n'okuba Eleazari mutabane wa Aaroni kabona. Era nga n'ali n'okukulira abakola mu Kifo Ekitukuvu.

³³ Merari n'eyasimukamu Abamahali n'Abamushi.

³⁴ Obungi bwaibwe aghalala, okuva ku baana abalenzi ab'omwezi omulala okutuuka ku basaadha abakulu, baali kakaaga na bibiri.

³⁵ Abalevi abasimuka mu Merari oyo baali nga bali n'okusimba weema dhaibwe ku luuyi olw'omukono omugooda olw'e buvandhuba olw'Eweema ey'Okwagaananirangamu ni Musengwa Katonda. Omukulu waibwe nga ni Zurieli mutabane wa Abihaili.

³⁶ Omulimo ogwabagheebwa gwali gwa kulabiriranga ebikondo bya Weema eyo, n'embaawo edhikiikamu, n'empango, n'ebikolo ebyemereraku ebikondo, n'ebikolerwaku. Nga n'abalabirira emirimo egigemagana n'ebintu ebyo byonabyona.

³⁷ Era nga n'abali n'okulabirira empango edh'oluya olwezungulula Weema, n'ebikolo byaku, n'enkondo edhigemerera empango edho, n'emigugha gyaku.

³⁸ Musa, Aaroni, ni batabane b'Aaroni n'abaali ab'okusimba weema dhaibwe emberi ow'Eweema ey'Okwagaananirangamu ni Musengwa Katonda, ku luuyi lwayo olw'e buvandhuba. Omulimo gwaibwe gwali gwa kulabiriranga emikolo egikolebwa mu Kifo Ekitukuvu olw'Abaisiraeli. Era ng'omuntu owundi yeenayeena agezaaku okukola omulimo ogwo ali n'okwitibwa.

³⁹ Obungi obw'Abalevi boonaboona, okuva ku baana ab'omwezi omulala okutuuka ku basaadha abakulu, baali emitwalo ebiri n'enkumi ibiri (22,000). Abo Musa ni Aaroni be baabala nga bajiira ku nda dhaibwe, nga Musengwa Katonda bweyalagira Musa.

Abalevi bafuuka aba Musengwa Katonda mu kifo eky'abaana abalenzi ababeri

⁴⁰ Agho Musengwa Katonda yaakoba Musa ati: “Bala abaana ab'Abaisiraeli abalenzi ababeri okuva ku w'omwezi omulala n'okweyongerayo, oghandiike amaina gaibwe.

⁴¹ Oidha kundhawulira Abalevi babe bange, nze Musengwa Katonda, mu kifo eky'abaana abo abalenzi ababeri ab'Abaisiraeli. Era ondhawulire ensolo edh'Abalevi dhibe dhange, mu kifo ky'ensolo edhizaalibwa mu luzaalo olusooka edh'Abaisiraeli.”

⁴² Kale Musa yaabala abaana abalenzi ababeri ab'Abaisiraeli, nga Musengwa Katonda bweyamulagira.

⁴³ Era abaana abo ababeri okuva ku b'omwezi omulala okutuuka ku basaadha abakulu abaabalibwa, baali emitwalo ebiri n'enkumi ibiri na bibiri na nsanvu na basatu (22,273).

⁴⁴ Agho Musengwa Katonda yaakoba Musa ati:

⁴⁵ “Ndhawulira Abalevi babe bange, mu kifo eky'abaana abalenzi ababeri ab'Abaisiraeli. Era ondhawulire ensolo edh'Abalevi dhibe dhange, mu kifo eky'ensolo edh'Abaisiraeli. Ninze Musengwa Katonda.

⁴⁶ Aye ng'abaana ababeri ab'Abaisiraeli bwe bali nti basinga abasaadha Abalevi, obungi bwa bantu ebikumi bibiri na nsanvu na basatu, abo ebikumi ebibiri n'ensanvu n'abasatu oidha kubasasulira mpiiya okubanunula.

⁴⁷ Oidha kusoloza ebitundu bya feeza bitaanu, ng'ojiira ku mbala entongole ey'eisinzizo, osasulire buli mulala ku abo,

⁴⁸ empiiya odhighe Aaroni ni batabane be.”

⁴⁹ Kale Musa yaatoola empiiya edho ku Baisiraeli abo ebikumi ebibiri n'ensanvu n'abasatu, abataanunulwa Balevi.

⁵⁰ Yaabasolozaaku ebitundu bya feeza lukumi na bisatu na nkaaga na bitaanu (1,365), ng'ajiira ku mbala entongole ey'eisinzizo.

⁵¹ Empiiya edho edh'okununula yaadhigha Aaroni ni batabane be, nga Musengwa Katonda bweyamulagira.