Okubala 29 - Baibuli Ekibono kya Katonda 2014

Ebigheebwayo ku Kibinuko eky'Omwaka Omuyaaka

¹ “Ku lunaku olusooka olw'omwezi ogwomusanvu mwidha kwesolozanga okunsinza, era mutalukolerangaku mulimo gwonagwona. Ku lunaku olwo mwidha kufuuwanga endeka,

² era mughengayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente ento enume ndala, entaama enume enkulu ndala, n'entaama ento enume musanvu edh'omwaka omulala omulala, nga dhiziraku kikyamu kyonakyona.

³ Nga mughaayo ebyo, mugheerengaku ekigheebwayo ekijiiraku eky'emere ey'empeke kya buwunga obuseereibwa obukalamu nga butabwirwamu omuzigo. Ku nte mugheerengaku kilo isatu, ku ntaama enume mugheerengaku kilo ibiri,

⁴ ni ku buli ntaama ku dhire ento omusanvu, kilo ndala.

⁵ Era mughengayo embuzi enume ndala ng'ekigheebwayo olw'ebibi, olw'okutoolebwaku ebibi byaimwe.

⁶ Mubighengayo ghalala n'ekigheebwayo ekijiiraku eky'emere ey'empeke n'ekigheebwayo ekijiiraku eky'ebyokunhwa, nga mwongereza ku kigheebwayo ekyokebwa eky'omwezi ogwakaboneka. Akawoowo kaakyo kansangaaza nze Musengwa Katonda.

Ekigheebwayo eky'olunaku olw'okutoolebwaku ebibi

⁷ “Ku lunaku olweikumi olw'omwezi ogwomusanvu mwidha kwesolozanga okunsinza, n'okwebonerezanga era mutalukolerangaku mulimo gwonagwona.

⁸ Ku lunaku olwo mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente ento enume ndala, entaama enume enkulu ndala, n'entaama ento enume musanvu edh'omwaka omulala omulala, nga dhiziraku kikyamu kyonakyona.

⁹ Nga mughaayo ebyo mugheerengaku ekigheebwayo ekijiiraku eky'emere ey'empeke kya buwunga obuseereibwa obukalamu nga butabwirwamu omuzigo. Ku nte mugheerengaku kilo isatu, ku ntaama enume mugheerengaku kilo ibiri,

¹⁰ ni ku buli ntaama ku dhire ento omusanvu, kilo ndala.

¹¹ Era mughengayo embuzi enume ndala ng'ekigheebwayo olw'ebibi, olw'okutoolebwaku ebibi byaimwe. Mubighengayo ghalala n'ekigheebwayo ekijiiraku eky'emere ey'empeke n'ekigheebwayo ekijiiraku eky'ebyokunhwa, nga mwongereza ku kigheebwayo ekyokebwa ekya buli lunaku.

Ebigheebwayo ku Kibinuko eky'Entindi

¹² “Ku lunaku olweikumi n'eitaanu olw'omwezi ogwomusanvu mwidha kwesolozanga okunsinza, era mutalukolerangaku mulimo gwonagwona okumala enaku musanvu, nga muli ku kibinuko ekyo olw'okugheesa Musengwa Katonda ekitiisa.

¹³ Mu nnaku edho omusanvu mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda. “Ku lunaku olusooka mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente ento enume ikumi na isatu, entaama enume enkulu ibiri, n'entaama ento enume ikumi na ina edh'omwaka omulala omulala, nga dhiziraku kikyamu kyonakyona.

¹⁴ Era mwidha kugheerengaku ekigheebwayo ekijiiraku eky'emere ey'empeke kya buwunga obuseereibwa obukalamu nga butabwirwamu omuzigo. Ku buli nte ku dhire enume eikumi n'eisatu mugheerengaku kilo isatu, ku buli ntaama ku dhire enume enkulu eibiri mugheerengaku kilo ibiri,

¹⁵ ni ku buli ntaama ku dhire ento eikumi n'eina, kilo ndala.

¹⁶ Era mughengayo embuzi enume ndala ng'ekigheebwayo olw'ebibi. Mwidha kubighangayo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

¹⁷ “Ku lunaku olwokubiri mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente ento enume ikumi na ibiri, entaama enume enkulu ibiri, n'entaama ento enume ikumi na ina edh'omwaka omulala omulala, nga dhiziraku kikyamu kyonakyona.

¹⁸ Era mwidha kugheerengaku ekigheebwayo ekijiiraku eky'emere ey'empeke, n'eky'ebyokunhwa, ku nte enume, ni ku ntaama enkulu enume, ni ku ntaama ento enume, nga mujiira ku bungi bw'ensolo ng'eiteeka bwe liragira.

¹⁹ Era mughengayo embuzi enume ndala ng'ekigheebwayo olw'ebibi. Mwidha kughangayo ebintu ebyo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

²⁰ “Ku lunaku olwokusatu mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente ento enume ikumi na ndala, entaama enume enkulu ibiri, n'entaama ento enume ikumi na ina edh'omwaka omulala omulala, nga dhiziraku kikyamu kyonakyona.

²¹ Era mwidha kugheerangaku ekigheebwayo ekijiiraku eky'emere ey'empeke, n'eky'ebyokunhwa, ku nte ento enume, ni ku ntaama enume enkulu, ni ku ntaama ento enume, nga mujiira ku bungi bwadho ng'eiteeka bwe liragira.

²² Era mughengayo embuzi enume ndala ng'ekigheebwayo olw'ebibi. Mwidha kubighangayo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

²³ “Ku lunaku olwokuna mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente ento enume ikumi, entaama enume enkulu ibiri, n'entaama ento enume ikumi na ina edh'omwaka omulala omulala, nga dhiziraku kikyamu kyonakyona.

²⁴ Era mwidha kugheerangaku ekigheebwayo ekijiiraku eky'emere ey'empeke, n'eky'ebyokunhwa, ku nte enume, ni ku ntaama enume enkulu, ni ku ntaama ento, nga mujiira ku bungi bwadho ng'eiteeka bwe liragira.

²⁵ Era mughengayo embuzi enume ndala ng'ekigheebwayo olw'ebibi. Mwidha kubighangayo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

²⁶ “Ku lunaku olwokutaanu mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente enume mwenda, entaama enume enkulu ibiri, n'entaama ento enume ikumi na ina edh'omwaka omulala omulala, nga dhiziraku kikyamu kyonakyona.

²⁷ Era mwidha kugheerangaku ekigheebwayo ekijiiraku eky'emere ey'empeke, n'eky'ebyokunhwa, ku nte enume, ni ku ntaama enume enkulu, ni ku ntaama ento enume, nga mujiira ku bungi bwadho ng'eiteeka bwe liragira.

²⁸ Era mughengayo embuzi enume ndala ng'ekigheebwayo olw'ebibi. Mwidha kubighangayo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

²⁹ “Ku lunaku olwomukaaga mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente enume munaana, entaama enume enkulu ibiri, n'entaama ento enume ikumi na ina edh'omwaka omulala omulala, nga dhiziraku kikyamu kyonakyona.

³⁰ Era mwidha kugheerangaku ekigheebwayo ekijiiraku eky'emere ey'empeke, n'eky'ebyokunhwa, ku nte enume, ni ku ntaama enume enkulu, ni ku ntaama ento enume, nga mujiira ku bungi bwadho ng'eiteeka bwe liragira.

³¹ Era mughengayo embuzi enume ndala ng'ekigheebwayo olw'ebibi. Mwidha kubighangayo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

³² “Ku lunaku olwomusanvu mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente enume musanvu, entaama enume enkulu ibiri, n'entaama ento enume ikumi na ina edh'omwaka omulala omulala, nga dhiziraku kikyamu kyonakyona.

³³ Era mwidha kugheerangaku ekigheebwayo ekijiiraku eky'emere ey'empeke, n'eky'ebyokunhwa, ku nte enume, ni ku ntaama enume enkulu, ni ku ntaama ento enume, nga mujiira ku bungi bwadho ng'eiteeka bwe liragira.

³⁴ Era mughengayo embuzi enume ndala ng'ekigheebwayo olw'ebibi. Mwidha kubighangayo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

³⁵ “Ku lunaku olwomunaana mwidha kwesolozanga okunsinza, era mutalukolerangaku mulimo gwonagwona.

³⁶ Aye mwidha kughangayo ekigheebwayo ekyokebwa ekiri n'akawoowo akansangaaza nze Musengwa Katonda, nga kirimu bino: ente enume ndala, entaama enume enkulu ndala, n'entaama ento enume musanvu edh'omwaka omulala omulala, nga dhiziraku kikyamu kyonakyona.

³⁷ Era mwidha kugheerangaku ekigheebwayo ekijiiraku eky'emere ey'empeke, n'eky'ebyokunhwa, ku nte enume, ni ku ntaama enume enkulu, ni ku ntaama ento enume, nga mujiira ku bungi bwadho ng'eiteeka bwe liragira.

³⁸ Era mughengayo embuzi enume ndala ng'ekigheebwayo olw'ebibi. Mwidha kubighangayo ghalala n'ekigheebwayo ekijiiraku eky'emere ey'empeke, n'ekigheebwayo eky'ebyokunhwa, nga mwongereza ku kigheebwayo ekyokebwa ekya buli lunaku.

³⁹ “Ebyo bye mwidha okughangayo eri Musengwa Katonda ku mbaga edh'ebibinuko ebyalagirwa, bibenga ebigheebwayo ebyokebwa, n'ebigheebwayo eby'emere ey'empeke, n'ebigheebwayo eby'ebyokunhwa, era n'ebigheebwayo olw'okutabagana. Mwidha kubighangayo nga mwongereza ku bye mughaayo olw'okutuukiriza obweyamo, ni ku bye mughaayo eby'ekyeyendere.”

⁴⁰ Kale atyo Musa yaakobera Abaisiraeli byonabyona Musengwa Katonda bye yamulagira.