Okubala 28 - Baibuli Ekibono kya Katonda 2014

Ebigheebwayo ebyalagirwa

¹ Musengwa Katonda yaakoba Musa ati:

² “Lagira Abaisiraeli oti, bali n'okughangayo ebigheebwayo eby'emere ebyokebwa, ebiri n'akawoowo akansangaaza. Bakobe batengayo inho omwoyo okubighaayo ku nnaku dhaabyo edhaalagirwa.

³ Era bakobe oti, kino n'ekigheebwayo ekyokebwa kye munaaghangayo ye Musengwa: entaama enume ibiri edh'omwaka omulala omulala edhiziraku kikyamu kyonakyona dhibenga ekigheebwayo ekya buli lunaku.

⁴ Entaama eyindi ku edho mwidha kugighangayo ku nkyo, ate eyindi mugighengayo olw'eigulo.

⁵ Era mwidha kugheerangayo ku ntaama eyo ey'oku nkyo ekigheebwayo eky'emere ey'empeke nga kya kilo ndala ey'obuwunga obuseereibwa obukalamu, obutabwirwamu lita y'omuzigo omukenenule ogukamwirwa mu bibala eby'emiti emyoliva.

⁶ Ekyo n'ekigheebwayo ekyokebwa ekya buli lunaku ekyagheerwa ku lusozi Sinai, akawoowo kaakyo kansangaaza nze Musengwa Katonda.

⁷ Era mwidha kugheerangayo ku ntaama eyo ey'oku nkyo ekigheebwayo eky'ebyokunhwa ebitamiiza nga kya lita ndala. Mwidha kukifukanga mu kifo ekitukuvu ng'ekigheebwayo eri nze Musengwa Katonda.

⁸ Entaama eyindi mwidha kugighangayo olw'eigulo, mu nsambo n'endala nga bwe munaabanga nga mughaireyo ey'oku nkyo nga kuliku ekigheebwayo eky'emere ey'empeke n'ekigheebwayo eky'ebyokunhwa ekijiiraku. Olwo ekyo kibe ekigheebwayo ekyokebwa, ekiri n'akawoowo akansangaaza nze Musengwa Katonda.

Ekigheebwayo ku Sabbato

⁹ “Ku lunaku lwa Sabbato mwidha kughangayo entaama enume ibiri edh'omwaka omulala omulala, nga dhiziraku kikyamu kyonakyona. Era mwidha kughangayo ekigheebwayo kyaku eky'emere ey'empeke, nga kya kilo ibiri edh'obuwunga obuseereibwa obukalamu nga butabwirwamu omuzigo. Era mughengayo n'ekigheebwayo ekijiiraku eky'ebyokunhwa.

¹⁰ Mwidha kughangayo ekigheebwayo ekyokebwa ekyo ekya buli lwa Sabbato, nga mwongereza ku kigheebwayo ekyokebwa ekya buli lunaku, n'ekigheebwayo ekijiiraku eky'ebyokunhwa.

Ekigheebwayo ku lunaku olusooka mu mwezi

¹¹ “Ku lunaku olusooka olwa buli mwezi, mwidha kughangayo eri nze Musengwa ekigheebwayo ekyokebwa, nga kirimu bino: ente enume ento ibiri, entaama enume enkulu ndala, n'entaama ento enume musanvu edh'omwaka omwaka omulala omulala, nga byonabyona biziraku kikyamu kyonakyona.

¹² Ku buli nte mwidha kugheerangaku ekigheebwayo eky'emere ey'empeke, nga kya kilo isatu edh'obuwunga obuseereibwa obukalamu, obutabwirwamu omuzigo. Ate ku ntaama enume enkulu, mugheerengaku ekigheebwayo eky'emere ey'empeke, nga kya kilo ibiri edh'obuwunga obuseereibwa obukalamu, obutabwirwamu omuzigo.

¹³ Ate ku buli ntaama dhire ento omusanvu mwidha kugheerangaku ekigheebwayo eky'emere ey'empeke, nga kya kilo ndala ndala ey'obuwunga obuseereibwa obukalamu, obutabwirwamu omuzigo. Ekyo nga n'ekigheebwayo eri nze Musengwa ekyokebwa akawoowo kaakyo kansangaaza.

¹⁴ Era mwidha kugheerangaku ekigheebwayo eky'ebyokunhwa ekijiiraku, nga kya lita ibiri edh'omwenge ogw'emizabbibu ku buli nte ento enume, lita ndala n'ekitundu ku ntaama enkulu enume, ni lita ndala ku buli ntaama ento enume. Ekyo nga n'ekigheebwayo ekyokebwa ekya buli lusooka mu mwezi, okumalaku omwaka gwonagwona.

¹⁵ Era Mwidha kughangayo embuzi enume ndala ng'ekigheebwayo olw'ebibi, nga mwongereza ku kigheebwayo ekyokebwa ekya buli lunaku, n'ekigheebwayo ekijiiraku eky'ebyokunhwa.

Ekigheebwayo ku Kibinuko eky'Emigaati Egitazimbulukusiibwa

¹⁶ “Olunaku olweikumi n'eina olw'omwezi ogusooka, n'olw'okwidhukiriraku nga Musengwa Katonda bweyatubitiza.

¹⁷ Ku lunaku olweikumi n'eitaanu olw'omwezi gwene ogwo, ekibinuko ekinaamalanga enaku omusanvu lwe kinaatooleranga. Enaku edho omusanvu mwidha kulyanga migaati gitazimbulukusiibwa gyonka.

¹⁸ Ku lunaku olusooka ku edho omusanvu, mwidha kwesolozanga okunsinza. Mutalukolerangaku mulimo gwonagwona.

¹⁹ Ku lunaku olwo, mwidha kughangayo eri nze Musengwa ekigheebwayo ekyokebwa, nga kirimu bino: ente enume ento ibiri, entaama enume enkulu ndala, n'entaama ento enume musanvu edh'omwaka omulala omulala, nga byonabyona biziraku kikyamu kyonakyona.

²⁰ Ku buli nte mwidha kugheerangaku ekigheebwayo eky'emere ey'empeke, nga kya kilo isatu edh'obuwunga obuseereibwa obukalamu, obutabwirwamu omuzigo. Ate ku ntaama enume enkulu, mugheerengaku ekigheebwayo eky'emere ey'empeke, nga kya kilo ibiri edh'obuwunga obuseereibwa obukalamu, obutabwirwamu omuzigo.

²¹ Ate ku buli ntaama dhire ento omusanvu mwidha kugheerangaku ekigheebwayo eky'emere ey'empeke, nga kya kilo ndala ndala ey'obuwunga obuseereibwa obukalamu, obutabwirwamu omuzigo.

²² Era mwidha kughangayo embuzi enume ndala ng'ekigheebwayo olw'ebibi, olw'okutoolebwaku ebibi byaimwe.

²³ Ebyo mwidha kubighangayo, nga mwongereza ku kigheebwayo ekyokebwa ekya buli lunaku.

²⁴ Mutyo bwe mwidha okughangayo buli lunaku, okumala enaku musanvu, ekigheebwayo ekyokebwa akawoowo kaakyo kansangaaza nze Musengwa Katonda. Mwidha kukighangayo okwongereza ku kigheebwayo ekyokebwa ekya buli lunaku, n'ekigheebwayo ekijiiraku eky'ebyokunhwa.

²⁵ Ku lunaku olwomusanvu mwidha kwesolozanga okunsinza. Mutalukolerangaku mulimo gwonagwona.

Ebigheebwayo ku Kibinuko eky'Amakungula

²⁶ “Ku lunaku olw'ebirime ebisooka okukungulwa, lwe mugheeraku ekigheebwayo eky'emere ey'empeke ku Kibinuko kyaimwe eky'Amakungula, mwidha kwesolozanga okunsinza. Mutalukolerangaku mulimo gwonagwona.

²⁷ Ku lunaku olwo, mwidha kughangayo eri nze Musengwa ekigheebwayo ekyokebwa, ekiri n'akawoowo akansangaaza, nga kirimu bino: ente enume ento ibiri, entaama enume enkulu ndala, n'entaama ento enume musanvu edh'omwaka omulala omulala.

²⁸ Ku buli nte mwidha kugheerangaku ekigheebwayo eky'emere ey'empeke, nga kya kilo isatu edh'obuwunga obuseereibwa obukalamu, obutabwirwamu omuzigo. Ate ku ntaama enume enkulu, mugheerengaku ekigheebwayo eky'emere ey'empeke, nga kya kilo ibiri edh'obuwunga obuseereibwa obukalamu, obutabwirwamu omuzigo.

²⁹ Ate ku buli ntaama dhire ento omusanvu mwidha kugheerangaku ekigheebwayo eky'emere ey'empeke, nga kya kilo ndala ndala ey'obuwunga obuseereibwa obukalamu, obutabwirwamu omuzigo.

³⁰ Era mwidha kughangayo embuzi enume ndala olw'okutoolebwaku ebibi byaimwe.

³¹ Mwidha kughangayo ebintu ebyo nga mwongereza ku kigheebwayo ekyokebwa ekya buli lunaku, ghalala n'ekigheebwayo eky'emere ey'empeke, n'ekigheebwayo ekijiiraku eky'ebyokunhwa. Mwegenderezenga ebintu ebyo birobenga kubaaku kikyamu kyonakyona.