Okubala 27 - Baibuli Ekibono kya Katonda 2014

Baghala ba Zelofehadi

¹ Agho ghaabaagho abaghala bano: Mahala, Noa, Hogula, Milika ni Tiruza. Abo baali baghala ba Zelofehadi mutabane wa Heferi. Heferi oyo yali mutabane wa Gileadi. Gileadi oyo yaaba mutabane wa Makiri. Makiri oyo yaaba mutabane wa Manasse. Ate Manasse oyo yaaba mutabane Yosefu.

² Abaghala abo baaja baayemerera mu maiso ga Musa, ni Eleazari kabona, n'abakulembeze, n'abantu boonaboona, agho ku mulyango ogw'Eweema ey'Okwagaananirangamu ni Musengwa Katonda. Baakoba bati:

³ “Lata waife yafiira mu irungu nga tazaireeku mwana mulenzi. Aye tiyeeyimbaku n'abo abeekungaania ni batakania Musengwa Katonda ghalala ni Kora. Mwene yafa lwa kibi kye kindi.

⁴ Kale lwaki eriina lya lata waife lisaanagho mu kika kye olw'okubulwa obubulwe omwana omulenzi? Mutughe twena omugabo ogw'eitaka ogwaife ku bwaife mu boluganda lwa lata waife.”

⁵ Agho Musa yaatwala ensonga yaibwe eyo eri Musengwa Katonda.

⁶ Musengwa Katonda yaakoba Musa ati:

⁷ “Baghala ba Zelofehadi batuufu mu kye bali kukoba. Oidha kubagha omugabo ogw'eitaka ery'ensikirano ogwaibwe ku bwaibwe mu boluganda lwa lata waibwe, olwo oleetere obusika bwa lata waibwe okwira ku beene.

⁸ Era oidha kukobera Abaisiraeli oti, ‘Omusaadha bw'afanga nga talese mwana mulenzi, mughanga mughala we obusika.

⁹ Bw'abanga nga n'omwana omughala yeena amuzira, agho obusika mubughanga baganda be.

¹⁰ Bw'abanga ng'azira baganda be, agho obusika mubughanga baganda ba ise.

¹¹ Ise bw'abanga ng'azira baganda be, agho obusika mubughanga amuliku oluganda olusinga kuba lwa kumpi. Eryo eiteeka Abaisiraeli lye banaakuumanga olubeerera, nga nze Musengwa Katonda bwe nkulagiire iwe Musa.’ ”

Yoshua alondebwa okwira mu kifo kya Musa

¹² Agho Musengwa Katonda yaakoba Musa ati: “Niina ku lusozi luno Abarimu olengere ensi ye mpaire Abaisiraeli.

¹³ Bw'onaamala okugirengera, oidha kutwalibwa weeyimbe ku bantu bo abaafa, nga muganda wo Aaroni bweyatwalibwa

¹⁴ kuba mwadheemera ekiragiro kyange mu irungu ery'e Zini. Abantu bwe beemuluguunhia nga muli gha maadhi ag'e Meriba mu Kadeshi, timwayoleka bantu abo nga nze ndi n'obuyinza.”

¹⁵ Agho Musa yaasaba Musengwa ati:

¹⁶ “Wo Musengwa Katonda, Katonda ow'emyoyo era n'emibiri, londa mu bantu bano, oyo anaaba omukulu waibwe.

¹⁷ Omuntu aidha okubakulemberangamu era abakuumenga mu buli kye banaakolanga. Olwo abantu bo abo, iwe Musengwa Katonda, balobe kubanga ng'oti n'entaama edhiziraku mwayi.”

¹⁸ Agho Musengwa Katonda yaakoba Musa ati: “Twala Yoshua mutabane wa Nuni, omusaadha aliku omwoyo, ote emikono gyo ku mutwe gwe.

¹⁹ Omale omutwale ayemerere mu maiso ga Eleazari kabona nga n'abantu boonaboona abeesoloiza babona, omugemye ogw'okubakulemberanga.

²⁰ Era omughe ku buyinza bwo, Abaisiraeli boonaboona bamuwulirenga.

²¹ Yoshua oyo aidha kujanga ye Eleazari kabona, Eleazari kabona oyo akozesenga Urimu ni Thummimu okumubuulizaagho eri nze Musengwa Katonda, aghange okumanha kye nhenda akole. Era ekyo Eleazari ky'anaazuulanga, Yoshua n'Abaisiraeli boonaboona kye banaajiirangaku mu buli kye banaakolanga.”

²² Agho Musa yaakola nga Musengwa Katonda bweyamulagira. Yaatwala Yoshua, yaamwemereza mu maiso ga Eleazari kabona nga n'abantu boonaboona beesoloiza.

²³ Musa oyo yaata emikono gye ku mutwe gwa Yoshua, yaamugemya ogw'okukulemberanga abantu abo, nga Musengwa Katonda bweyalagira Musa oyo.