Okubala 26 - Baibuli Ekibono kya Katonda 2014

Okubala abantu okw'omukuzi ogwokubiri

¹ Ekibamba bwe kyawa, Musengwa Katonda yaakoba Musa ni Eleazari mutabane wa Aaroni kabona ati:

² “Mubale Abaisiraeli boonaboona abagheza emyaka amakumi abiri n'okusingagho, abali mu buli nda, abasobola okulwana mu lutalo.”

³ Agho Musa ni Eleazari kabona, baayogera n'abantu e Yeriko ekiri mu kiketezo ky'e Moabu eky'oku museetwe, ku mbali okw'omwiga Yorudani. Baabakoba bati:

⁴ “Mubale abantu abagheza emyaka amakumi abiri n'okusingagho, nga Musengwa Katonda bweyalagira Musa.” Abaisiraeli abaava mu nsi Misiri, ni bano:

⁵ Ekika kya Reubeni, eyali omwana omuberi owa Yakobo, kyalimu enda dhino: eya Hanoka, n'eya Pallu,

⁶ n'eya Hezironi, n'eya Karumi.

⁷ Edho n'enda edhaali mu kika kya Reubeni, era dhaalimu abantu emitwalo ena n'enkumi isatu na lusanvu n'asatu (43,730).

⁸ Pallu n'eyazaala Eliabu.

⁹ Eliabu yaazaala Nemueli, ni Dathani, ni Abiramu. Dathani ni Abiramu abo, n'abo abaalondebwa abantu boonaboona okutakania Musa ni Aaroni, era beeyimba ku Kora ni baine, lwe baatakania Musengwa Katonda.

¹⁰ Era ku olwo eitaka lyayasama, lyabamira ghalala ni Kora. Mu nsambo eyo, ekikunsu ky'abantu abo kyafa, ku lule omuliro lwe gwasenkeenha abantu abaaghera ebikumi ebibiri n'ataanu, ni bafuuka akamanhiso ak'okulabula abandi.

¹¹ Aye batabane ba Kora tibaali mu abo abaafa.

¹² Ekika ekya Simeoni kyalimu enda dhino: eya Nemueli, n'eya Yamini, n'eya Yakini,

¹³ n'eya Zera, n'eya Shaulo.

¹⁴ Edho n'enda edhaali mu kika kya Simeoni, era dhaalimu abantu emitwalo ebiri n'enkumi ibiri na bibiri (22,200).

¹⁵ Ekika ekya Gadi kyalimu enda dhino: eya Zefoni, n'eya Haggi, n'eya Shuni,

¹⁶ n'eya Ozini, n'eya Eri,

¹⁷ n'eya Arodi, n'eya Areli.

¹⁸ Edho n'enda edhaali mu kika kya Gadi, era dhaalimu abantu emitwalo ena na bitaanu (40,500).

¹⁹ Yuda yazaala abaana bano: Eri, ni Onani. Eri ni Onani abo, baafiira mu nsi Kanaani.

²⁰ Ekika ekya Yuda oyo kyalimu enda dhino: eya Shela, n'eya Perezi, n'eya Zera.

²¹ Perezi yaazaala Hezironi ni Hamuli. Hezironi ni Hamuli abo, boona baasimukamu enda ey'Abahezironi n'ey'Abahamuli.

²² Edho n'enda edhaali mu kika kya Yuda, era dhaalimu abantu emitwalo musanvu na kakaaga na bitaanu (76,500).

²³ Ekika ekya Issakari kyalimu enda dhino: eya Tola, n'eya Puva,

²⁴ n'eya Yashubu, n'eya Shimuroni.

²⁵ Edho n'enda edhaali mu kika kya Issakari, era dhaalimu abantu emitwalo mukaaga n'enkumi ina na bisatu (64,300).

²⁶ Ekika ekya Zebuluni kyalimu enda dhino: eya Seredi, n'eya Eloni, n'eya Yahaleeli.

²⁷ Edho n'enda edhaali mu kika kya Zebuluni, era dhaalimu abantu emitwalo mukaaga na bitaanu (60,500).

²⁸ Yosefu yazaala Manasse ni Efuraimu.

²⁹ Manasse yazaala Makiri, Makiri yazaala Gileadi eyasimukamu enda dhino:

³⁰ eya Iezeri, n'eya Heleki,

³¹ n'eya Asirieli, n'eya Shekemu,

³² n'eya Shemida, n'eya Heferi.

³³ Heferi yazaala Zelofehadi, Zelofehadi yaazaala baghala beereere nga muzira mulenzi, era ni bano: Mahala, Noa, Hogula, Milika ni Tiruza.

³⁴ Edho n'enda edhaali mu kika kya Manasse, era dhaalimu abantu emitwalo etaanu n'enkumi ibiri na lusanvu (52,700).

³⁵ Ekika ekya Efuraimu kyalimu enda dhino: eya Shuthela, n'eya Bekeri, n'eya Tahani.

³⁶ Shuthela oyo yaazaala Erani eyasimukamu olulyo olw'Abaerani.

³⁷ Edho n'enda edhaali mu kika kya Efuraimu, era dhaalimu abantu emitwalo esatu n'enkumi ibiri na bitaanu (32,500). Abo boonaboona baasimuka mu Yosefu.

³⁸ Ekika kya Benjamini kyalimu enda dhino: eya Bela, n'eya Ashubeli, n'eya Ahiramu,

³⁹ n'eya Shefufamu, n'eya Hufamu.

⁴⁰ Bela yaazaala Aradi ni Naamani. Bela oyo yaasimukamu olulyo olw'Ababela, ni Naamani yaasimukamu olulyo olw'Abanaamani.

⁴¹ Edho n'enda edhaali mu kika kya Efuraimu, era dhaalimu abantu emitwalo ena n'enkumi itaanu na lukaaga (45,600).

⁴² Ekika ekya Dani kyalimu enda ndala yonka, eya Shuhamu,

⁴³ era enda eyo yalimu abantu emitwalo mukaaga n'enkumi ina na bina (64,400).

⁴⁴ Ekika ekya Asheri kyalimu enda dhino: eya Imuna, n'eya Ishuvi, n'eya Beria.

⁴⁵ Beria oyo yaazaala Heberi eyasimukamu olulyo olw'Abaheberi. Era yaazaala Malakieli eyasimukamu olulyo olw'Abamalakieli.

⁴⁶ Asheri oyo yali ni mughala we ye baayetanga Sera.

⁴⁷ Edho n'enda edhaali mu kika kya Asheri, era dhaalimu abantu emitwalo etaanu n'enkumi isatu na bina (53,400).

⁴⁸ Ekika kya Nafutali kyalimu enda dhino: eya Yahazeeli, eya Guni,

⁴⁹ eya Yezeri, n'eya Shillemu.

⁵⁰ Edho n'enda edhaali mu kika kya Nafutali, era dhaalimu abantu emitwalo ena n'enkumi itaanu na bina (45,400).

⁵¹ Agho Abaisiraeli boonaboona abaabalibwa, baaba emitwalo nkaaga na lukumi na lusanvu n'asatu (601,730).

⁵² Musengwa Katonda yaakoba Musa ati:

⁵³ “Abantu abo baidha kugheebwa eitaka ng'omugabo gwaibwe, nga bajiira ku bunene obw'ebika.

⁵⁴ Ebika ebinene oidha kubigha eitaka inene, ate ebika ebitono obighe eitaka itono. Buli kika kiidha kugheebwa omugabo gwakyo ogw'eitaka, nga bajiira ku bunene bwakyo.

⁵⁵ Aye era eitaka liidha kugabibwa nga likubirwa bululu, nga bajiira ku maina ga badhaadha baibwe.

⁵⁶ Buli kika kiidha kugheebwa eitaka lyakyo, nga likubirwa bululu. Era buli kika kiidha kufuna eitaka, nga bajiira ku bungi bw'abantu baakyo.”

⁵⁷ Bano n'Abalevi abaabalibwa ng'ojiira ku nda dhaibwe: abaasimuka mu Gereshoni, abaasimuka mu Kohathi, n'abaasimuka mu Merari.

⁵⁸ Era mu Balevi abo n'omwasimuka n'enda dhino: ey'Abalibuni, ey'Abaheburoni, ey'Abamahili, ey'Abamushi, n'ey'Abakora. Kohathi n'eyali lata wa Amuramu.

⁵⁹ Muka Amuramu oyo yayetebwanga Yokebedi, era nga mughala wa Levi ye yazaalira e Misiri. Amuramu oyo ni mukazi we oyo Yokebedi, n'abaazaala Aaroni, ni Musa, ni mwanhinaibwe Miriamu.

⁶⁰ Aaroni yaazaala Nadabu, Abihu, Eleazari ni Ithamari.

⁶¹ Aye Nadabu ni Abihu baafa, bwe baaleeta omuliro ogutali mutukuvu mu maiso ga Musengwa ng'ekigheebwayo.

⁶² Abasaadha Abalevi boonaboona abaabalibwa, okuva ku mwana omulenzi agheziiza omwezi omulala n'okusingagho, baali emitwalo ebiri n'enkumi isatu (23,000). Abo tibaabalirwa ghalala na Baisiraeli bandi, kuba Abalevi abo tibaagheebwa mugabo gwa itaka lya nsikirano mu Baisiraeli banaibwe.

⁶³ Abo n'abantu Musa ni Eleazari kabona, be baabala e Yeriko okumpi n'omwiga Yorudani, mu biketezo eby'oku museetwe eby'e Moabu.

⁶⁴ Aye ku abo tikwali muntu waire omulala ati, eyali ng'akaali mulamu ku Baisiraeli bale Musa ni Aaroni kabona, be baabala mu irungu ery'e Sinai,

⁶⁵ kuba Musengwa Katonda yabakoba ati boonaboona baja kufiira mu irungu. Era boonaboona baafa, okutoolaku Kalebu mutabane wa Yefune ni Yoshua mutabane wa Nuni.