Okubala 25 - Baibuli Ekibono kya Katonda 2014

Abaisiraeli nga bali e Peori

¹ Abaisiraeli bwe baali e Shittimu, baatoolera obutaba beesigwa eri Katonda waibwe, baakolanga obwamalaaya n'abakazi Abamoabu.

² Abakazi abo bwe baakolanga embaga edh'emisengo gye baaghangayo eri emisambwa gyaibwe, nga beeta Abaisiraeli abo okubeeyimbaku. Abaisiraeli abo baalyanga nabo, era baakubiranga emisambwa egyo amakiryaivu.

³ Kale Abaisiraeli baasinzanga omusambwa Baali ogw'e Peori. Agho obusungu bwa Musengwa bwabatumbukiraku ng'oti muliro.

⁴ Musengwa oyo yaakoba Musa ati: “Twala abakulembeze ab'Abaisiraeli boonaboona obaitire mu maiso gange omusana ng'abantu boonaboona babona, memale obusungu bwange obubitirivu bubaveeku imwe Abaisiraeli.”

⁵ Agho Musa yaakoba abalamuzi ati: “Buli mulala ku imwe aje aite abasaadha boonaboona abali mu kikunsu kye, abaasinza omusambwa Baali ogw'e Peori.”

⁶ Mu kiseera ekyo, ng'Abaisiraeli bakaali agho ku mulyango ogw'Eweema ey'Okwagaananirangamu ni Musengwa Katonda, nga bali kulira, ghaabaagho Omuisiraeli eyaleeta omukazi Omumidia mu ndhu ye, nga Musa n'abantu abandi boonaboona babona.

⁷ Finehasi mutabane wa Eleazari era nga mwidhukulu wa Aaroni kabona, bweyababona yaasituka, yaaleka agho abantu abandi boonaboona, yaagema eifumo,

⁸ yaanonereza omusaadha oyo Omuisiraeli n'omukazi oyo Omumidia. Yaabaagaana mu kisenge, yaabafumita eifumo lyababitamu bombi. Agho ekibamba Musengwa kye yali asindikiire Abaisiraeli kyalekera agho okubaita.

⁹ Aye nga kyali kimaze okwita abantu emitwalo ebiri n'enkumi ina (24,000).

¹⁰ Musengwa Katonda yaakoba Musa ati:

¹¹ “Finehasi mutabane wa Eleazari era nga mwidhukulu wa Aaroni kabona, alekeiza obusungu bwange okuba ku Baisiraeli. Agemeibwa enkikidi eyange ye ndi nayo ku bantu bange abo Abaisiraeli, yaaloba kuguminkirizaaku waire omulala ku bo, okusinza katonda atali nze. Kye nviire ni ntabazikiriza mu busungu bwange.

¹² Kale ni mukobere oti, ndi kukola naye endagaano yange ey'emiraala,

¹³ emufuula mwene n'eizaire eririmwiririra okubanga bakabona olubeerera; kuba enkikidi yamugema ku lwange nze Katonda we, era yaaleetera Abaisiraeli okutoolebwaku ekibi kyaibwe.”

¹⁴ Omusaadha Omuisiraeli, Finehasi ye yaitira aghalala n'omukazi Omumidia, yali ayetebwa Zimuri mutabane wa Salu eyali akulira enda ndala ku dhaali mu kika eky'Abasimeoni.

¹⁵ Omukazi ye yamwita naye yali ayetebwa Kozubi mughala wa Zuri, nga yeena ali n'enda y'akulira mu Midia.

¹⁶ Agho Musengwa Katonda yaakoba Musa ati: “Lumba Abamidia, obaite,

¹⁷ olw'ekibi kye baabakola. Baabasalira enkwe,

¹⁸ baabasenderasendera e Peori. Era balumbe, obaite, olwa Kozubi mwanhinaibwe, mughala w'omufuzi ow'e Midia. Kozubi oyo yaitibwa mu biseera ekibamba ghe kyaitira abantu, nze Musengwa kye nasindika olw'ebyo ebyali e Peori.”