Okubala 24 - Baibuli Ekibono kya Katonda 2014

¹ Balaamu bweyamala okutegeera nga Musengwa amwendeza kusabira Baisiraeli nkabi, yaaloba kuja kwebuuzaaku nga bweyakola ku mikuzi gire egindi. Aye yaalingiriza bwa maiso ge eri eirungu,

² yaabona Abaisiraeli nga basimbye weema dhaibwe, ng'ebika byaibwe bwe biiraganwaku. Agho omwoyo gwa Katonda gwamwidhaku,

³ yaayogera ebibono eby'obulanzi bino, ati: “Bino n'ebibono bya Balaamu mutabane wa Beori, ebibono eby'omuntu abona obukalamu.

⁴ Bino n'ebibono by'oyo awulira Katonda by'ayogera, ebibono by'oyo atenduka aye n'asigala ng'amoga, n'abona okubonekerwa kw'oyo Aghanga Ebintu Byonabyona.

⁵ Weema dhaimwe, imwe aba Yakobo, n'ebifo imwe Abaisiraeli ghe musula, bikalamu!

⁶ Ebifo ebyo biri ng'oti biiko ebyegolomoire, era ng'oti nimiro edhiri ku mbali okw'omwiga. Biri ng'oti miti egiri n'akawoowo k'alowe, Musengwa gye yasimba era ng'oti mivule egiri kumpi n'amaadhi.

⁷ Amaadhi gaidha kubagwiranga mangi, ensigo dhaibwe dhibenga mu nimiro edhifukiriirwa obukalamu. Kyabazinga waibwe aidha kubanga mukologho okusinga kyabazinga Agagi, n'obwakyabazinga bwe bwidha kugheebwanga ekitiisa.

⁸ Beesiga Katonda oyo eyabatoola mu Misiri ng'oti n'embogo bweyeesiga amayiga gaayo. Baidha kweyangagho amaghanga ag'abazigu baibwe, bamenhemenhenga amagumba gaibwe, babafumitenga n'obulaso bwaibwe.

⁹ Babwama era baalambaala ng'oti mpologoma. Naani akana okubasitusa? Kiisi asabira Abaisiraeli abo enkabi, yeena agheebwenga enkabi. Kiisi abakolimira, yeena akolimirwenga.”

¹⁰ Agho Balaki yaasungughalira inho Balaamu, era yaakuba mu ngalo bukiika, ng'amukoba ati: “Nakwese oidhe okolimire abazigu bange, aye bona obasabire bwa nkabi emikuzi gino esatu!

¹¹ Kale ni, mperaano lumuka oireyo ewuwo. Nali nkusuubiiza okukuleetera okuba ow'ekitiibwa, aye Musengwa Katonda akulemeisa.”

¹² Balaamu yaidhusa Balaki ati: “Tyakobera bakwenda be wantumira nti,

¹³ ‘Waire Balaki ampa endhu ye ng'eidhwire feeza ni zaabu, tighanga kuva ku kiragiro kya Musengwa Katonda, ni nkola kyange ku bwange, ka kibe ekirungi oba ekibi? Era nti, Musengwa ky'anankoba kyonka kye ndidha okwogera?’

¹⁴ Mperaano ndi kwirayo mu bantu bange. Aye bona eno, ka nkukobere abantu abo Abaisiraeli kye balikola abantu bo mu biseera eby'oluvainhuma.”

¹⁵ Agho yaayogera ebibono eby'obulanzi bino, ati: “Bino n'ebibono bya Balaamu mutabane wa Beori, ebibono eby'omuntu abona obukalamu.

¹⁶ Bino n'ebibono by'oyo awulira Katonda by'ayogera, n'amanha amagezi g'oyo Ali Ghaigulu Yeene, era atenduka aye n'asigala ng'amoga, n'abona okubonekerwa kw'oyo Aghanga Ebintu Byonabyona.

¹⁷ Bwe ningirira ye bwidha eyo, mbona Abaisiraeli abo, aye ti nga bwe bali mperaano. Kyabazinga alisituka mu Yakobo ng'oti n'emuunienie bw'evaayo, ng'ogwo n'omwigo ogw'obwakyabazinga oguja okusimuka mu Baisiraeli abo. Alisasambula abakulembeze b'e Moabu, era yaasaaniagho abaana ba Shethi boonaboona.

¹⁸ Alighangula abazigu be mu Edomu, yeiriza ensi yaibwe Seiri, eno ng'Abaisiraeli bwe beeyongera okuba abaghanguzi.

¹⁹ Oyo asimuka mu ba Yakobo aliba mufuzi, era alizikiriza abaliba basigaire mu bibuga.”

²⁰ Agho Balaamu ng'akaali mu kubonekerwa, yaabona Abamaleki era yaayogera ebibono eby'obulanzi bino, ati: “Abamaleki n'eighanga eryali lisinga agandi goonagoona, aye ku nkomerero lija kuzikirizibwa.”

²¹ Era ng'akaali mu kubonekerwa, yaabona Abakeni era yaayogera ebibono eby'obulanzi bino, ati: “Ekifo kye mubaamu kigumu, kiri ng'oti n'ekisu ekyazimbibwa mu ibaale.

²² Aye era imwe Abakeni mulizikirira, Abasshuri balibatwala mu bunhage.”

²³ Kabiri Balaamu oyo yaayogera ebibono eby'obulanzi bino, ati: “Tukagwireku! Naani alisigalagho nga mulamu, nga Katonda akoze ekyo?

²⁴ Abalwani baliidhira mu maato okuva e Kittimu, baalumba Abasshuri n'Abaeberi, aye era boona balizikirizibwa.”

²⁵ Agho Balaamu yaasitula yairayo ewaibwe, Balaki yeena yaaja mu dhidhe.