Okubala 23 - Baibuli Ekibono kya Katonda 2014

Balaamu bye yalanga omukuzi ogwasooka

¹ Balaamu yaakoba Balaki ati: “Nzimbira ghano alutaari musanvu, era ondeetere ghano ente enume musanvu n'entaama enume musanvu.”

² Balaki yaakola nga Balaamu bweyamukoba, era bombi baagheerayo ku buli alutaari, ente enume ndala n'entaama enume ndala.

³ Balaamu yaakoba Balaki ati: “Yemerera kumpi n'ekigheebwayo kyo ekyokebwa. Nze ka nje mbone oba nga Musengwa anaidha okwagaanana ninze. Era buli ky'anandholeka kyonakyona, ndidha kwira nkikukobere.” Agho yaaja yaaniina ghaigulu ku lusozi.

⁴ Katonda yaayagaanana ni Balaamu oyo. Balaamu yaakoba Katonda ati: “Mmaze okutegeka alutaari musanvu era ku buli ndala mpeereireyo ekigheebwayo kya nte enume ndala n'entaama enume ndala.”

⁵ Agho Musengwa Katonda yaalagira Balaamu by'anaayogera, era yaamukoba ati: “Irayo ye Balaki oyogere otyo.”

⁶ Balaamu yaira ye Balaki, yaamwagaana ng'akaayemereire kumpi n'ekigheebwayo kye ekyokebwa, ghalala n'abakungu boonaboona aba Moabu.

⁷ Agho Balaamu yaayogera ebibono eby'obulanzi bino, ati: “Balaki kyabazinga wa Moabu yandheta okuva mu Aramu, mu nsozi edh'omu buvandhuba: Yankoba ati, ‘Idha onkolimirire aba Yakobo idha ovumirire Abaisiraeli abo.’

⁸ Nnaakolimira ntya oyo Katonda y'atakolimiire? Nnaavumirira ntya oyo Musengwa y'atavumiriire?

⁹ Mbabona nga ndi ku ngulu ku nsozi enene, naabalengera nga ndi ku busozi obutono. Abantu abo bali eighanga eriba lyonka, eighanga eriteetabula na maghanga gandi.

¹⁰ Naani asobola okubala baidhukulu ba Yakobo abangi ng'oti bwa nkungu? Oba naani asobola okumanha omughendo oguli mu kitundu obutundu ekirala ku buli bitundu ebina eby'Abaisiraeli abo? Leka nfe ng'abatuufu bwe bafa, leka enkomerero yange ebe ng'ey'abatya Katonda abo bw'eba!”

¹¹ Agho Balaki yaakoba Balaamu ati: “Onkoze ki kino? Nakuleese kukolimira bazigu bange, aye kabiri iwe waabula ekindi ky'okola okutoolaku okubasabira obw'enkabi?”

¹² Balaamu yaamwiramu ati: “Nteekwa okwogera ebyo Musengwa Katonda by'andagira byonka.”

Balaamu bye yalanga omukuzi ogwokubiri

¹³ Agho Balaki yaakoba Balaamu ati: “Idha tuje mu kifo ekindi gh'onaabonera abandi ku Baisiraeli abanaakuba okumpi, waire nga toobabone boonaboona. Memale olwo obankolimirire ng'oli eyo.”

¹⁴ Yaamutwala mu musiri gwa Zofimu ku ngulu okw'olusozi Pisiga. Yaazimba alutaari musanvu era yaagheerayo ku buli ndala ente enume n'entaama enume.

¹⁵ Balaamu yaakoba Balaki ati: “Yemerera kumpi n'ekigheebwayo kyo ekyokebwa, nze nje ere ndhagaanane ni Musengwa Katonda.”

¹⁶ Musengwa Katonda yaayagaanana ni Balaamu era yaamulagira by'anaayogera. Yaamukoba ati: “Irayo ye Balaki oyogere otyo.”

¹⁷ Balaamu yaira ye Balaki, yaamwagaana ng'akaayemereire kumpi n'ekigheebwayo kye ekyokebwa, ghalala n'abakungu aba Moabu. Balaki yaamubuuza ati: “Musengwa akobye ki?”

¹⁸ Agho Balaamu yaayogera ebibono eby'obulanzi bino, ati: “Balaki, idha owulire, ntegera kutu, iwe mutabane wa Zippori.

¹⁹ Katonda talimba, aye abantu balimba; Katonda takyuka, aye abantu bakyuka. Ky'akoba taloba kukikola; ky'ayogera taloba kukituukiriza.

²⁰ Bona eno, Katonda yandagira okusabira abantu enkabi. Kale Katonda bw'agha enkabi, nze ekyo ti kikyusaamu naire.

²¹ Ghazira kikyamu kinaidhira bantu ba Yakobo, ghazira kizibu kinaatuuka ku Baisiraeli abo. Musengwa Katonda waibwe aba ghalala nabo, baayatula nga bw'ali kyabazinga waibwe.

²² Beesiga Katonda oyo eyabatoola mu Misiri, ng'oti n'embogo bweyeesiga amayiga gaayo.

²³ Ghazira irogo lisobola kulumya ba Yakobo, ghazira kulagula kusobola kutuusa kabi ku Baisiraeli abo. Okutoolaku abantu baidhanga kwogera ku Baisiraeli abo, bati, ‘Katonda ng'abakoleire eby'amaani!’

²⁴ Bona eighanga eryo! Lisituka ng'oti mpologoma nkazi, lyebbeeda ng'oti mpologoma nume. Tiriwuumula nga tirituukiriiza kigendererwa kyalyo, ng'oti n'empologoma bwetawuumula nga temaze kuvaabira omuyiigo gwayo, n'okunhwa omusaayi gw'ekyo ky'eise.”

²⁵ Agho Balaki yaakoba Balaamu ati: “Nga bw'olobye okubakolimira, n'enkabi otabasabira.”

²⁶ Aye Balaamu yaamwiramu ati: “Tyakukobeire nti kyonakyona Musengwa ky'anankoba kye nteekwa okukola?”

Balaamu bye yalanga omukuzi ogwokusatu

²⁷ Kabiri Balaki yaakoba Balaamu ati: “Mpegaano idha, ka nkutwale mu kifo ekindi, oba katyo Katonda anaikiriza okukuleka waabankolimirira eyo.”

²⁸ Kale yaatwala Balaamu oyo ghaigulu ku lusozi Peori olulingiriire eirungu.

²⁹ Balaamu yaakoba Balaki ati: “Nzimbira ghano alutaari musanvu, era ondeetere ghano ente enume musanvu n'entaama enume musanvu.”

³⁰ Balaki yaakola nga Balaamu bweyamukoba, yaagheerayo ku buli alutaari ente enume ndala n'entaama enume ndala.