Okubala 22 - Baibuli Ekibono kya Katonda 2014

Kyabazinga wa Moabu ayetesa Balaamu

¹ Agho Abaisiraeli baasitula, baaja baatuuka e Yeriko, ere ng'osomoike omwiga Yorudani, mu kiketezo ky'e Moabu eky'oku museetwe, baasimba eyo weema dhaibwe.

² Kyabazinga Balaki mutabane wa Zippori yali amaze okubona byonabyona Abaisiraeli bye baakola Abamori.

³ Abamoabu baatya inho Abaisiraeli era baafootookerera, olw'okubona ng'Abaisiraeli abo baali bangi inho.

⁴ Agho Abamoabu baakoba abakulembeze ab'Abamidia bati: “Luno olukunkumuli olw'Abaisiraeli luja kusaaniagho buli kintu ekitwezungulwire ghano, ng'oti n'ente bw'esaaniagho eisubi ku nsiko.” Kale Balaki, mutabane wa Zippori, eyali nga ni kyabazinga wa Moabu mu biseera ebyo,

⁵ yaatuma abakwenda ye Balaamu mutabane wa Beori e Pethori, ekiri okumpi n'omwiga Eufurate mu kiketezo ekyetebwa Amawa. Bamukobe bati: “Bona eno, abantu ab'eighanga eiramba baava e Misiri, baidha baasiisira era baamaamira ekiketezo kyaife, era bali ghano kumpi n'ife.

⁶ Kale mperaano nkweghembye, oidhe onkolimirire abantu abo, kuba batusinga inho amaani; oba katyo tunaasobola okubaghangula twababingagho. Ndidhi nti omuntu y'osabira enkabi aba wa nkabi, ate y'okolimira yaaba mukolimire.”

⁷ Kale abakulembeze b'e Moabu n'abakulembeze b'e Midia baaja, nga beetwise eby'okusasula Balaamu olw'okukolima. Bwe baatuuka ye Balaamu baamugha obukwenda Balaki bwe yabatuma.

⁸ Balaamu yaabakoba ati: “Musule ghano obwire buno, ndidha kubairamu Musengwa ky'anankoba.” Kale abakulembeze abo abaava e Moabu baasigala agho ni Balaamu.

⁹ Katonda yaidha eri Balaamu, yaamubuuza ati: “Ni baani abo b'oli nabo ghano?”

¹⁰ Balaamu yaakoba Katonda ati: “Balaki, kyabazinga wa Moabu, mutabane wa Zippori, antumiire abakwenda bano ng'akoba ati,

¹¹ ‘Bona eno, abantu ab'eighanga eiramba baava e Misiri, baidha baasiisira era baamaamira ekiketezo kyaife. Kale mperaano nkweghembye, oidhe onkolimirire abantu abo oba katyo tunaasobola okubalwanisa twababingagho.’ ”

¹² Aye Katonda yaakoba Balaamu ati: “Otaja nabo, era otakolimira bantu Baisiraeli bale, kuba bali n'enkabi.”

¹³ Enkyo Balaamu yaakobera abakwenda abaava ye Balaki ati: “Mwireyo ewaimwe, kuba nze Musengwa andobeire okuja n'imwe.”

¹⁴ Kale abakwenda abo abaava e Moabu, baasituka bairayo ye Balaki baamukobera bati: “Balaamu alobye okwidha n'ife.”

¹⁵ Kabiri Balaki yaatuma abakulembeze abandi, nga bangi okusinga bale era nga babasinga n'ekitiibwa.

¹⁶ Baaja baakoba Balaamu bati: “Balaki mutabane wa Zippori, akobye ati, ‘Nkweghembye ghatabaagho kintu kikulobera kwidha ye ndi,

¹⁷ kuba ndidha kukuleetera okuba ow'ekitiibwa einho, era ky'onankoba okukola kyonakyona ndidha kukikola. Idha onkolimirire abantu abo.’ ”

¹⁸ Aye Balaamu yairamu abakwenda ba Balaki ati: “Waire Balaki ampa endhu ye ng'eidhwire feeza ni zaabu, tighanga kuva ku kiragiro kya Musengwa Katonda wange okukikendeezaaku oba okukyongeraku.

¹⁹ Mbeeghemba mwena musule ghano obwire buno, nsobole okumanha kiki Musengwa Katonda ky'anaayongera okunkoba.”

²⁰ Obwire obwo Katonda yaidha yaakoba Balaamu ati: “Oba nga abantu abo baidhie kukweta, situka oje nabo. Aye kye nnaakukoba okukola kyonka ky'onaakola.”

²¹ Kale Balaamu yaasituka enkyo, yaata ekintu ekityamibwaku ku ndogoyi ye, yaaja n'abakulembeze abaava e Moabu.

Balaamu n'endogoyi ye

²² Aye obusungu bwa Katonda bwatumbukira ku Balaamu ng'oti muliro, olw'okuja. Agho Balaamu bweyali ali kuvuga endogoyi ye ng'ali n'abagheereza be babiri, malaika wa Musengwa yeekiika mu ngira okumulobera okweyongerayo.

²³ Endogoyi yaabona malaika wa Musengwa ng'ayemereire mu ngira, ng'asowoire empiima mu kiruutu kyayo agigemye mu ngalo. Agho endogoyi eyo yaava mu ngira yaakyukira mu misiri egyali agho. Balaamu yaagikuba okugiiza mu ngira.

²⁴ Kabiri malaika wa Musengwa Katonda yaayemerera mu kagira akatono akabita ghagati mu masamba ag'emizabbibu, nga ku luuyi ni ku luuyi eriyo ekimante.

²⁵ Endogoyi bweyabona malaika wa Musengwa Katonda, yeesugeenhia ku kimante era yaanhigiririzaamu ekigere kya Balaamu. Kabiri Balaamu yaagikuba.

²⁶ Agho malaika wa Musengwa Katonda yaaja emberi, yaayemerera aghanhigirivu nga ghazira luuyi lw'osobola kukyukiraku.

²⁷ Endogoyi bweyabona malaika wa Musengwa Katonda, yaalambaala ghansi gha Balaamu. Balaamu yaasungughala inho era yaagikuba n'omwigo gwe.

²⁸ Agho Musengwa Katonda yaasobozesa endogoyi okwogera. Endogoyi eyo yaabuuza Balaamu eti: “Nkukoze ki okunkuba emikuzi gino esatu?”

²⁹ Balaamu yaagiiramu ati: “Nkukubye kuba onnhoomye. Ngoli mbaire na mpiima nandikwise bwite.”

³⁰ Endogoyi yaamukoba eti: “Ti ninze endogoyi yo, y'ovuze obulamu bwo bwonabwona okutuusa n'olwaleero luno? Naali nkubisiisaaku ntyo omukuzi waire omulala guti?” Balaamu yaagiiramu ati: “Busa.”

³¹ Agho Musengwa Katonda yaazibula Balaamu amaiso, yaabona malaika wa Musengwa ng'ayemereire mu ngira, ng'asowoire empiima mu kiruutu kyayo yaagigema mu ngalo. Balaamu yaakutama n'ekyeni kyatuuka ku itaka.

³² Malaika wa Musengwa Katonda, yaabuuza Balaamu ati: “Lwaki okubye endogoyi yo emikuzi egyo esatu? Bona eno, ndidhye okwekiika mu ngira yo, kuba olugendo lwo luno tirusemba.

³³ Endogoyi yo emboine ku mikuzi egyo esatu, yanviirayo yaakyukira ku mbali. Era ngoli tekyusenga n'enviirayo, bwenebwene ngoli buti nkwise, yeene naagireka nga nnamu.”

³⁴ Agho Balaamu yaakoba malaika wa Musengwa ati: “Nhonoine, kuba mbaire timanhie nga niiwe weekiise mu ngira okundobera okuja. Aye mpegaano oba nga kiba kibi y'oli nze okuja, ka nkyuke ndhireyo.”

³⁵ Aye malaika wa Musengwa Katonda yaamukoba ati: “Ja n'abasaadha abo, aye kye nnaakukoba okwogera kyonka ky'onaayogera.” Kale Balaamu yeeyongerayo, yaaja n'abakwenda ba Balaki.

Balaki asangaaza Balaamu

³⁶ Balaki bweyawulira nga Balaamu aidhie, yaaja okumusangaaza mu kibuga kya Moabu ekiri ku mbali kw'omwiga Arunoni, aghasemberayo irala ku nsalosalo.

³⁷ Balaki yaamukoba ati: “Lwaki tiwaidha, bwe nakwetesa omukuzi ogwasooka? Okoba oti tisobola kukuleetera kuba wa kitiibwa?”

³⁸ Balaamu yairamu Balaki ati: “Buti ndidhie. Aye obwo odhuuba oti ndi n'obukumu okuba ni kye ndhogera? Ekyo kyonka Katonda ky'andagira, kye nteekwa okwogera.”

³⁹ Agho Balaamu ni Balaki baaja, baatuuka mu kibuga Kiriathi Huzothi.

⁴⁰ Balaki yaaghaayo ente n'entaama ng'omusengo, era yaagheerezaaku Balaamu n'abakungu abaali naye emamba.

⁴¹ Bwe bwakya enkyo, Balaki yaatwala Balaamu mu kifo ekigulumivu eky'okusinzizaamu e Bamothi Baali. Balaamu ng'ali eyo, yaabonaku abandi ku Baisiraeli abaamuli okumpi.