Okubala 20 - Baibuli Ekibono kya Katonda 2014

Ebyali e Kadeshi

¹ Agho Abaisiraeli boonaboona baatuuka mu irungu ery'e Zini mu mwezi ogusooka, baaba e Kadeshi. Miriamu yaafiira eyo, era baamuziika eyo.

² Mu kifo ekyo timwali maadhi ga bantu kukozesa, kale abantu beesoloza balumba Musa ni Aaroni.

³ Abantu beemuluguunhiza Musa bati: “Kyandisinzeeku ngoli twafa, ku lule baganda baife lwe baafiira mu maiso ga Musengwa Katonda!

⁴ Lwaki waleeta abantu ba Musengwa Katonda boonaboona mu irungu lino? Wayenda tufiire muno n'ebyayo byaife?

⁵ Era lwaki watutoola mu Misiri okutuleeta mu kifo kino ekibi? Ghazira kintu kighanga kulimwagho, k'ebe engaano, oba emiti emitiini, oba emizabbibu, waire emikomamawanga! Ghazira waire maadhi ga kunhwa!”

⁶ Agho Musa ni Aaroni baava agho mu bantu, baaja gha mulyango ogw'Eweema ey'Okwagaananirangamu ni Musengwa Katonda, baakutama n'ebyeni byatuuka ku itaka. Agho ekitiisa kya Musengwa Katonda kyababonekera.

⁷ Musengwa Katonda yaakoba Musa ati:

⁸ “Toola omwigo gwo, osoloze abantu boonaboona ng'oli ghalala ni muganda wo Aaroni. Memale okobe olubaale luveemu amaadhi gaalwo, nga boonaboona babona. Olwo oidha kutoola amaadhi mu lubaale, oghe abantu banhwe n'ebyayo byaibwe.”

⁹ Musa yatoola omwigo ogwo okuva agho mu maiso ga Musengwa Katonda, nga Musengwa Katonda bweyamulagira.

¹⁰ Musa ni Aaroni baasololeza abantu boonaboona agho gha lubaale. Musa yaakoba abantu ati: “Muwulire imwe abadheemu. Tunaabatoolera amaadhi mu lubaale luno?”

¹¹ Era Musa yaagalula omukono yaakuba olubaale emikuzi ebiri n'omwigo gwe. Amaadhi amangi einho gaava mu lubaale olwo, abantu baanhwa n'ebyayo byaibwe.

¹² Aye Musengwa Katonda yaakoba Musa ni Aaroni ati: “Olw'okuba timubaire na kwikiriza mu nze, mwaloba kwoleka bantu bano boonaboona nga bwendi n'obuyinza, ti mwidha kubatuusa mu nsi ye nabagha.”

¹³ Ago n'amaadhi ag'e Meriba Abaisiraeli ye beemuluguunhiza Musengwa Katonda, era Musengwa oyo n'abooleka nga bw'ali omutukuvu.

Abaedomu balobera Abaisiraeli okubita mu nsi yaibwe

¹⁴ Musa ng'ali e Kadeshi, yaagheereza kyabazinga owa Edomu abakwenda okumukoba bati: “Baganda bo Abaisiraeli bali kukukoba bati, oidhi bukalamu ebizibu ebyatutuukaku.

¹⁵ Oidhi nga badhaadha baife bwe baaja mu Misiri, ye twaba emyaka kamaala, Abamisiri ni babisa obubi badhaadha baife abo era n'ife.

¹⁶ Bwe twalirira Musengwa Katonda, Musengwa Katonda oyo yawulira okulira kwaife, yaatutumira malaika yaatutoola mu Misiri. Mpegaano tuli ghano e Kadeshi, ekibuga ekiri ku nsalosalo n'ekiketezo kyo.

¹⁷ Tukweghemba otuleke tubiteku mu nsi yo. Titwidha kubita waire mu musiri oba mu isamba ery'emizabbibu, oba okunhwa amaadhi mu nsulo. Twidha kutambulira mu luguudo mwonka aghazira kugonhokeraku ku mukono mugooda oba ku mukono ogulya, okutuusa nga tumaze okuva mu kiketezo kyo.”

¹⁸ Aye Abaedomu baabairamu bati: “Timwidha kubita ghano. Bwemunaagezaaku twidha kutoolayo bwa mpiima tubalwanise.”

¹⁹ Abaisiraeli baabakoba bati: “Twidha kutambulira bwa mu luguudo mwonka, era singa tunhwa ku maadhi gaimwe oba okugagha ku byayo byaife, twidha kugasasulira. Tuli kubasaba ekintu kirala kyonka: mutuleke tubitemu bubite nga tutambulira ku bigere.”

²⁰ Aye Abaedomu baabairamu bati: “Ti mwidha kubita ghano.” Era baavaayo n'eigye enene ery'amaani okulumba Abaisiraeli.

²¹ Mu nsambo eyo Abaedomu baalobera Abaisiraeli okubita mu kiketezo kyaibwe. Kale Abaisiraeli baakyuka baagema engira eyindi.

Aaroni afa

²² Agho Abaisiraeli boonaboona baava e Kadeshi, baatambula baatuuka ku lusozi Hora,

²³ oluli ku nsalosalo ey'ekiketezo kya Edomu. Musengwa Katonda yaakoba Musa ni Aaroni nga bali ku lusozi olwo ati:

²⁴ “Aaroni aidha kutwalibwa yeeyimbe ku bantu be abaafa. Taidha kwingira mu nsi ye nagha Abaisiraeli, kuba mwadheemera ekiragiro kyange nga muli gha maadhi ag'e Meriba.

²⁵ Toola Aaroni ni mutabane we Eleazari, obaleete ghaigulu ghano ku lusozi luno Hori.

²⁶ Bwe mutuuka, Aaroni oidha kumutoolamu ebivaalo bye, obivaaze mutabane we Eleazari. Aaroni aidha kutwalibwa ng'ali ku lusozi luno yeeyimbe ku bantu be abaafa.”

²⁷ Musa yaakola nga Musengwa Katonda bweyamulagira, baaniina ku lusozi Hori ng'abantu boonaboona babona.

²⁸ Musa yaavaalulula Aaroni ebivaalo bye, yaabivaaza mutabane we Eleazari, era Aaroni yaafiira ghaigulu ku lusozi. Agho Musa ni Eleazari baaniinuka okuva ku lusozi.

²⁹ Abaisiraeli boonaboona bwe bamanha nga Aaroni afiire, bamulirira enaku amakumi asatu.