Okubala 2 - Baibuli Ekibono kya Katonda 2014

Ensambo ebika ye biiraganwaku mu kifo ghe basimba weema

¹ Agho Musengwa Katonda yaakoba Musa ni Aaroni ati:

² Abaisiraeli baidha kusimbanga weema dhaibwe okwezungulula Weema ey'Okwagaananirangamu ni Musengwa Katonda, nga bagiringiriiza. Buli muntu aidha kusimbanga weema ye aghali bendera y'ekikunsu kye era aghali obumanhiso obw'abantu ab'enda ye.

³ Abanaasimbanga weema dhaibwe ku luuyi olw'e buvandhuba, baidha kubanga ab'ekika kya Yuda nga bali mu bikunsu byaibwe. Omukulembeze ow'ab'ekika kya Yuda, ni Nahashoni mutabane wa Amminadabu,

⁴ era nga bali abantu emitwalo musanvu n'enkumi ina na lukaaga (74,600).

⁵ Ab'ekika kya Issakari baidha kuliiraananga ab'ekika kya Yuda. Omukulembeze waibwe nga ni Nethaneli mutabane wa Zuari,

⁶ era nga bali abantu emitwalo etaanu n'enkumi ina na bina (54,400).

⁷ Ku abo kwidha kwirangaku ab'ekika kya Zebuluni. Omukulembeze waibwe nga ni Eliabu mutabane wa Heloni,

⁸ era baali abantu emitwalo etaanu na kasanvu na bina (57,400).

⁹ Abantu boonaboona mu kikunsu kya Yuda bali emitwalo ikumi na munaana na kakaaga na bina (186,400), era n'abanaasookanga okutambula.

¹⁰ Ab'ekika kya Reubeni baidha kusimbanga weema dhaibwe ku luuyi olw'omukono omusaadha olw'e buvandhuba, nga bali mu bikunsu. Omukulembeze waibwe nga ni Elizuri mutabane wa Shedeura,

¹¹ era nga bali abantu emitwalo ena na kakaaga na bitaanu (46,500).

¹² Ab'ekika kya Simeoni baidha kuliiraananga ab'ekika kya Reubeni. Omukulembeze waibwe nga ni Shelumieli mutabane wa Zurishaddai,

¹³ era nga bali abantu emitwalo etaanu na kenda na bisatu (59,300).

¹⁴ Ku abo kwidha kwirangaku ab'ekika kya Gadi. Omukulembeze waibwe nga ni Eliasafu mutabane wa Reweli,

¹⁵ era nga bali abantu emitwalo ena n'enkumi itaanu na lukaaga n'ataanu (45,650).

¹⁶ Abantu boonaboona mu kikunsu kya Reubeni bali emitwalo ikumi n'etaanu na lukumi na bina n'ataanu (151,450), era n'abanaabanga abokubiri mu kutambula.

¹⁷ Agho ebikunsu ebyo ebibiri nga bitooleire okutambula, Abalevi boona baidha kutambulanga nga babbeedie Weema ey'Okwagaananirangamu ni Musengwa Katonda, nga bali ghagati ghe bikunsu ebibiri ebisooka n'ebibiri ebiiraku. Ebikunsu biidha kutambulanga nga bijiira ku nsambo ye biiraganwaku mu kifo ghe basimba weema, nga buli kikunsu kinonereza bendera yaakyo.

¹⁸ Ab'ekika kya Efuraimu baidha kusimbanga weema dhaibwe ku luuyi olw'e bugwandhuba, nga bali mu bikunsu. Omukulembeze waibwe nga ni Elishama mutabane wa Ammihudi,

¹⁹ era nga bali abantu emitwalo ena na bitaanu (40,500).

²⁰ Ab'ekika kya Manasse baidha kuliiraananga ab'ekika kya Efuraimu. Omukulembeze waibwe nga ni Gamalieli mutabane wa Pedahazuri,

²¹ era nga bali abantu emitwalo esatu n'enkumi ibiri na bibiri (32,200).

²² Ku abo kwidha kwirangaku ab'ekika kya Benjamini. Omukulembeze waibwe ni nga Abidani mutabane wa Gideoni,

²³ era nga bali abantu emitwalo esatu n'enkumi itaanu na bina (35,400).

²⁴ Abantu boonaboona mu kikunsu kya Efuraimu bali emitwalo ikumi na kanaana na kikumi (108,100), era n'abanaabanga obokusatu mu kutambula.

²⁵ Ab'ekika kya Dani baidha kusimbanga weema dhaibwe ku luuyi olw'omukono omugooda olw'e buvandhuba, nga bali mu bikunsu. Omukulembeze waibwe nga ni Ahiezeri mutabane wa Ammishaddai,

²⁶ era nga bali abantu emitwalo mukaaga n'enkumi ibiri na lusanvu (62,700).

²⁷ Ab'ekika kya Asheri baidha kuliiraananga ab'ekika kya Dani. Omukulembeze waibwe nga ni Pagieli mutabane wa Okurani,

²⁸ era nga bali abantu emitwalo ena na lukumi na bitaanu (41,500).

²⁹ Ku abo kwidha kwirangaku ab'ekika kya Nafutali. Omukulembeze waibwe nga ni Ahira mutabane wa Enani,

³⁰ era nga bali abantu emitwalo etaanu n'enkumi isatu na bina (53,400).

³¹ Abantu boonaboona mu kikunsu kya Dani bali emitwalo ikumi n'etaanu na kasanvu na lukaaga (157,600), era n'abanaasembangayo mu kutambula.

³² Abo n'Abaisiraeli abaabalibwa nga bajiira ku nda dhaibwe ni ku bikunsu byaibwe. Baali emitwalo nkaaga n'enkumi isatu na bitaanu n'ataanu (603,550).

³³ Aye nga Musengwa Katonda bweyalagira Musa, Abalevi tibaabalirwa ghalala na Baisiraeli bandi.

³⁴ Kale Abaisiraeli baakola byonabyona Musengwa Katonda bye yalagira Musa. Baasimbanga weema dhaibwe aghali bendera dhaibwe, era baatambulanga, nga buli muntu ajiira mu kika kye ni mu nda ya ise.