Okubala 19 - Baibuli Ekibono kya Katonda 2014

Eivu ery'ente eya kasaayisaayi

¹ Agho Musengwa Katonda yaakoba Musa ni Aaroni ati:

² “Kino n'ekiragiro ekiri mu mateeka nze Musengwa ge nataagho: Mukobe Abaisiraeli babaleetere ente eya langi ya kasaayisaayi eziraku kikyamu kyonakyona, era etakozesebwangaku mulimo gwonagwona.

³ Ente eyo mwidha kugigha Eleazari kabona, etoolebwe mu kifo abantu ghe baasimba weema dhaibwe, eje eitirwe eyo embali nga Eleazari abona.

⁴ Agho Eleazari kabona aidha kutoola ku musaayi gwayo n'engalo ye, agumansire emikuzi musanvu ng'agwolekeiza emberi w'Eweema ey'Okwagaananirangamu ni Musengwa Katonda.

⁵ Olwo ente eyo eidha kwokebwa yoonayoona nga Eleazari abona ng'omwo mw'otwaliire oluwu lwayo, emamba yaayo, omusaayi gwayo, n'obusa bwayo.

⁶ Kabona aidha kutoola omuti oguwunha akawoowo, n'akati akeetebwa hissopu, n'oluwuuzi olw'olugoye olw'erangi ya kasaayisaayi, abisuule ku nte eri kwokebwa.

⁷ Bw'anaamala aidha kunaaba omubiri n'amaadhi era ayoze n'ebivaalo bye, memale aire mu kifo abantu ghe baasimba weema dhaibwe, aye era aidha kusigala nga tiimulongoofu okutuusa olw'eigulo.

⁸ Omuntu anaayokya ente eyo aidha kunaaba omubiri era ayoze ebivaalo bye, aye era aidha kusigala nga tiimulongoofu okutuusa olw'eigulo.

⁹ Omuntu omulongoofu aidha kuyoolagho eivu ery'ente eyo, aje alite mu kifo ekirongoofu ezira weema dha bantu, ye liri n'okukuumirwa. Eivu eryo liidha kukozesebwanga Abaisiraeli, mu kutegeka amaadhi agakozesebwa mu mukolo ogw'okwetukuza, ogukolebwa mu kutoolagho ebibi.

¹⁰ Omuntu anaayoolagho eivu ery'ente eyo, aidha kwoza ebivaalo bye, aye era asigale nga tiimulongoofu okutuusa olw'eigulo. Ekiragiro kino kiidha kugemwanga Abaisiraeli boonaboona n'abasenze abanaabasengangamu ebyanda n'ebyanda.

Omuntu agemye ku mulambo

¹¹ “Omuntu bw'anaagemanga ku mulambo ogw'omuntu, aidha kusigalanga nga tiimulongoofu okumala enaku musanvu.

¹² Ku lunaku olwokusatu ni ku lunaku olwomusanvu aidha kunaabanga n'amaadhi ag'okwetukuza, memale abenga omulongoofu. Aye bw'ateetukuzenga ku nnaku edho dhombi, olwokusatu n'olwomusanvu, taabenga mulongoofu.

¹³ Omuntu yeenayeena agema ku muntu afiire, aye n'ateetukuza, ayonoona Weema ya Musengwa Katonda. Era omuntu oyo aidha kulekeranga okubalibwa mu Baisiraeli; kuba aba tamansiirwaku maadhi ga kumutukuza. Aidha kubanga nga tiimulongoofu, era asigalenga n'obutali bulongoofu bwe.

¹⁴ “Lino n'eiteeka erigema ku muntu afiira mu weema: Omuntu yeenayeena aidha mu weema eyo, aidha kubanga nga tiimulongoofu okumala enaku musanvu. N'oyo aba ng'agirimu mu kiseera ekyo omuntu oyo ky'afiiriiremu, yeena aidha kubanga nga tiimulongoofu okumala enaku omusanvu.

¹⁵ Era buli kintu ekikozesebwa mu weema eyo ekinaabanga nga tikiteereibwaku kisandikiza kyakyo ekisibiirwaku, kyona kiidha kubanga nga tiikirongoofu.

¹⁶ Omuntu yeenayeena bw'anaabanga ng'ali eyo kuliya, n'agema ku muntu ye baise obwite, oba ku muntu afiire mwene, oba ku igumba ery'omuntu, oba ku magombe, aidha kubanga nga tiimulongoofu okumala enaku musanvu.

¹⁷ Abo abatali balongoofu baidha kutoolanga ku ivu ery'ekigheebwayo olw'ebibi ekimaze okwokebwa, balitenga mu kibya, baliyughengaku amaadhi agatooleibwa mu mwiga.

¹⁸ Agho omuntu omulongoofu aidha kutoolanga akati akeetebwa hissopu akainhike mu maadhi ago, memale agamansire mu weema eyo, ni ku bintu byamu byonabyona, ni ku bantu abaagirimu, ni ku oyo anaabanga ng'agemye ku muntu aitiibwa obwitibwe, oba ku afiire mwene, oba ku igumba, oba ku magombe.

¹⁹ Omuntu oyo omulongoofu aidha kumansiranga amaadhi ago ku ole atali mulongoofu, ku lunaku olwokusatu ni ku lunaku olwomusanvu. Ku lunaku olwomusanvu aidha kumutukuzanga, era omuntu oyo atukuziibwa aidha kwozanga ebivaalo bye era anaabenga omubiri n'amaadhi. Olwo, eigulo eryo aidha kubanga mulongoofu.

²⁰ “Aye omuntu atali mulongoofu bw'anaalobanga okutukuzibwa, anaabanga nga takaabalirwa mu bantu ba Musengwa Katonda, kuba anaabanga ng'ayonoine ekifo kya Musengwa Katonda ekitukuvu. Era aidha kusigalanga nga tiimulongoofu, kuba amaadhi agakozesebwa okutoolagho ebibi ganaabanga nga tigamumansiirwaku.

²¹ Ekiragiro ekyo baidha kukikuumanga ebyanda n'ebyanda. Oyo anaamansiranga amaadhi agakozesebwa mu kutoolagho ebibi, aidha kwozanga ebivaalo bye. N'oyo anaagemanga ku maadhi ago agakozesebwa mu kutoolagho ebibi, aidha kubanga nga tiimulongoofu okutuuka olw'eigulo.

²² Era buli kintu omuntu atali mulongoofu ky'anaagemangaku kiidha kufuukanga ekitali kirongoofu, n'oyo anaakigemangaku aidha kubanga nga tiimulongoofu okutuusa olw'eigulo.”