Okubala 18 - Baibuli Ekibono kya Katonda 2014

Emirimo gya Bakabona n'egy'Abalevi

¹ Agho Musengwa Katonda yaakoba Aaroni ati: “Iwe ni batabane bo n'ab'omu kika kyo boonaboona, niimwe mwidha okuvunaanibwanga byonabyona ebinaabanga nga bisobye mu Kifo Ekitukuvu. Aye ebinaabanga nga bisobye mu bwakabona, biidha kuvunaanibwanga iwe ni batabane bo mwenka.

² Era oidha kuleetanga baganda bo ab'ekika kya Levi, bakweyimbeku, bakuyambengaku iwe ni batabane bo, nga muli kugheereza mu Weema.

³ Baidha kukolanga emirimo gy'onaabaghanga era bakolenga n'emirimo egindi egy'omu Weema. Aye bataseetanga kumpi na bintu bikozesebwa mu Kifo Ekitukuvu, oba okuseeta ku alutaari olwo beene n'iwe mulobe kufa.

⁴ Baidha kukoleranga ghalala n'iwe, mu kulabiriranga Weema ey'Okwagaananirangamu ni Musengwa Katonda, nga mukola emirimo gyamu gyonagyona. Aye ghatabangagho muntu atali Mulevi, n'aseeta ye muli.

⁵ Era niimwe abanaalabiriranga Ekifo Ekitukuvu ni alutaari, memale olwo ndobe kwirayo kusungughalira Baisiraeli.

⁶ Era bona eno, nonze baganda bo Abalevi, naabakugha ng'ekirabo okuva mu Baisiraeli boonaboona. Bagheereibwayo eri nze Musengwa Katonda, okugheerezanga mu Weema.

⁷ Aye iwe ni batabane bo, niimwe mwenka abanaakolanga emirimo egy'obwakabona egy'oku alutaari n'egy'omu Kifo Ekitukuvu. Mbaghaire obwakabona ng'ekirabo, era omuntu atali Mulevi bw'anaaseetanga okumpi, aidha kwitibwanga.”

Omugabo gwa bakabona

⁸ Agho Musengwa Katonda yaakoba Aaroni ati: “Era bona eno, nkughaire ebyo byonabyona ebirekebwagho nga tibyokeibwa ku bigheebwayo ebitukuvu Abaisiraeli bye bampa nze Musengwa Katonda. Mbikughaire iwe ni batabane bo ng'omugabo gwe munaafunanga ebyanda n'ebyanda.

⁹ Bino n'ebinaabanga ebyaimwe ku bintu ebitukuvu einho byonabyona ebigheebwayo eri nze Musengwa Katonda, ebirekebwagho nga tibyokeibwa: buli ekigheebwayo eky'emere ey'empeke, buli ekigheebwayo olw'ebibi, na buli ekigheebwayo ng'omutango. Byonabyona ebitukuvu einho ebigheebwayo eri nze Musengwa Katonda, biidha kubanga bibyo ni batabane bo.

¹⁰ Ebintu ebyo mwidha kubiriiranga mu Kifo Ekitukuvu Einho, era buli musaadha anaabanga wa idembe okubiryaku. Mubitwalenga nga bitukuvu.

¹¹ “Okwongereza ku ebyo, ebintu ebindi byonabyona Abaisiraeli bye banaaghangayo eri nze Musengwa Katonda ng'ekigheebwayo eky'endhawulo nga kiwuubibwa, biidha kubanga bibyo iwe, ni batane bo, ni baghala bo ng'omugabo gwe munaafunanga ebyanda n'ebyanda. Buli muntu yeenayeena ow'omu ndhu yo anaabanga wa idembe okubiryaku kasita anaabanga nga mulongoofu.

¹² “Nkughaire ebirime ebisinga bulungi ebisooka okukungulwa Abaisiraeli bye bampa, era nga ni bino: omuzigo ogw'ebibala eby'emiti emyoliva, omwenge ogw'emizabbibu n'emere ey'empeke.

¹³ Era nkughaire ebibala ebisooka okwenga mu misiri gyaibwe gyonagyona bye bandeetera nze Musengwa Katonda. Buli muntu yeenayeena ow'omu ndhu yo nga mulongoofu, anaabanga wa idembe okubiryaku.

¹⁴ “Buli kintu kyonakyona ekinaagheebwangayo mu Isiraeli okuba ekyange, kiidha kubanga kikyo.

¹⁵ “Buli kintu kyonakyona ekinaazaalibwanga mu luzaalo olusooka ekigheebwayo eri nze Musengwa Katonda, k'abe omuntu oba k'ebe ensolo, kiidha kubanga kikyo. Aye oidha kuganhanga okutwala ekyo ekinaagheebwangayo okununula omwana omuberi, n'ekyo ekinaagheebwangayo okununula ensolo ezaalibwa mu luzaalo olusooka etali nongoofu.

¹⁶ Abaana banaanunulwanga nga ba mwezi mulala, era buli mwana aidha kusasulirwanga ebitundu bitaanu ebya feeza, ng'ojiira ku mbala entongole ey'eisinzizo.

¹⁷ Aye ente n'entaama n'embuzi edhinaazaalibwanga mu luzaalo olusooka, tibaadhinunulenga. Edho dhange ku bwange, kale ntukuvu. Oidha kudhiitanga, omansirenga omusaayi gwadho ku alutaari, era oyokyenga amasavu gaadho ng'ekigheebwayo ekyokebwa. Akawoowo kaadho kansangaaza nze Musengwa Katonda.

¹⁸ Emamba yaadho eidha kubanga yiyo, mu nsambo n'endala ng'ekifuba ekigheebwayo eri nze Musengwa Katonda nga kiwuubibwa n'ekisambi eky'oku luuyi olw'omukono omusaadha, bwe biri ebibyo.

¹⁹ Nkughaire iwe, ni batabane bo, ni baghala bo, ebigheebwayo ebitukuvu byonabyona Abaisiraeli bye banandeeteranga nze Musengwa Katonda, bibe omugabo gwaimwe gwe munaafunanga ebyanda n'ebyanda. Eyo n'endagaano ye nkoze n'iwe era n'eizaire lyo, etaja kumenhebwagho ebyanda n'ebyanda.”

²⁰ Era Musengwa Katonda yaakoba Aaroni ati: “Timwidha kufuna kintu kyonakyona kya nsikirano, waire okugheebwa omugabo gwonagwona mu nsi y'Abaisiraeli. Ninze omugabo gwaimwe ogunaababeesangagho mu Baisiraeli.”

Omugabo ogw'Abalevi

²¹ Era Musengwa Katonda yaakoba ati: “Abalevi mbaghaire ekintu kirala kirala ku buli bintu eikumi Abaisiraeli kye bampa, gube omugabo gwaibwe olw'okusasulira obugheereza bwe bakola mu Weema ey'Okwagaananirangamu ni Musengwa Katonda.

²² Okuva ni mpegaano, Abaisiraeli abandi abatali Balevi bataseetanga kumpi na Weema eyo, olwo balobe kwereetaku kibi kya kubaitisa.

²³ Aye Abalevi bonka n'abanaagheerezanga mu Weema eyo, era n'abanaavunaanizibwanga ebisobu ebinaagibangamu. Eiteeka eryo liidha kubangagho mu nse dhoonadhoona edhiriiragho. Abalevi tibaidha kugheebwanga mugabo mu Baisiraeli.

²⁴ Olw'okuba mpaire Abalevi ekintu kirala kirala ku buli bintu ikumi Abaisiraeli kye bampa, gube omugabo gwaibwe, kye nviire ni nkoba nti tibaidha kugheebwanga mugabo mu Baisiraeli.”

Ekintu ekirala ku buli bintu eikumi Abalevi kye baghaayo

²⁵ Agho Musengwa Katonda yaakoba Musa ati:

²⁶ “Koba abalevi oti, ‘Bwe munaamalanga okutoola ku Baisiraeli ekintu ekirala ekirala ku buli bintu eikumi kye bampa, nze Musengwa kye mbaghaire ng'omugabo gwaimwe, mwena mwidha kutoolanga ekintu kirala kirala ku buli bintu ikumi ku ebyo bye mufunie, kibenga ekigheebwayo eri nze Musengwa Katonda.

²⁷ Ekigheebwayo kyaimwe ekyo kiidha kutwalibwanga ng'oti n'ekigheebwayo eky'emere ey'empeke eva mu kifo aghakubirwa engaano, era ng'oti n'ekigheebwayo ekiidhuvu ekiva mu kikunhiro eky'omwenge ogw'emizabbibu.

²⁸ Kale mutyo mwena bwe mwidhanga okutoola ekintu ekirala ekirala ku buli bintu eikumi Abaisiraeli boonaboona bye banaabaghanga, mukigheeyo ng'ekigheebwayo eri nze Musengwa Katonda. Ekigheebwayo kyaimwe ekyo mwidha kukighanga Aaroni kabona.

²⁹ Ku bintu byonabyona bye munaafunanga, mwidha kutoolangaku ebisinga bulungi mubighengayo mu bwidhuvu ng'ekigheebwayo eri nze Musengwa Katonda.

³⁰ Bwe munaamalanga okughaayo ebyo ebisinga bulungi, ebisigalagho mwidha kubisigazanga ng'omuntu bw'asigaza ebiva mu kifo aghakubirwa engaano n'ebiva mu kikunhiro eky'omwenge ogw'emizabbibu.

³¹ Munaabanga ba idembe, imwe beene era n'ab'omu ndhu dhaimwe, okubiriira mu kifo kyonakyona ekibaagho, kuba ebyo n'ebisasulira obugheereza bwe mukola mu Weema ey'Okwagaananirangamu ni Musengwa Katonda.

³² Era timuubenga na kibi kye mukoze olw'okubirya, kasita munaabanga nga mughaireyo ebisinga bulungi. Aye mwegenderezenga mulobe kwonoona ebintu ebitukuvu Abaisiraeli bye baleeta, memale olwo mulobe kufa.’ ”