Okubala 17 - Baibuli Ekibono kya Katonda 2014

Omwigo gw'Aaroni ogwasibuka

¹ Agho Musengwa Katonda yaakoba Musa ati:

² “Koba Abaisiraeli boonaboona bakughe emiigo ikumi n'ebiri, mulala mulala okuva ku buli mukulu wa kika. Era omale oghandiike eriina lya buli mukulu wa kika ku mwigo gwe.

³ Era oidha kughandiika eriina ly'Aaroni ku mwigo ogw'ekika kya Levi, kuba buli mukulu wa kika aidha kuba n'omwigo mulala.

⁴ Oidha kutwala emiigo egyo mu Weema ey'Okwagaananirangamu ni Musengwa Katonda, ogite gha mberi w'Esanduuku ey'Endagaano ghe twagaananira n'iwe.

⁵ Omwigo ogw'omuntu ye nnaalonda gwidha kusibuka. Mu nsambo eyo ndidha kulekeza Abaisiraeli okukwemuluguunhizanga.”

⁶ Musa yaayogera n'Abaisiraeli, era abakulembeze baibwe baamugha omwigo mulala mulala okuva mu buli kika. Egyo gyaba emiigo ikumi n'ebiri, nga n'ogw'Aaroni gulimu.

⁷ Musa yaata emiigo egyo mu Weema ey'Okwagaananirangamu ni Musengwa Katonda, gha mberi w'Esanduuku ey'Endagaano.

⁸ Ku lunaku olwairirira, Musa bweyaja mu Weema eyo, yaabona ng'omwigo gw'Aaroni ogw'ab'ekika kya Levi gusibwike, gwaleeta amakaba, gwamulisa ebimuli, era gwataaku ebibala ebyetebwa alumondi ebyenvu.

⁹ Musa yaatoolayo emiigo gyonagyona okuva gha mberi gh'Esanduuku ey'Endagaano, yaagireetera Abaisiraeli boonaboona baabona, era buli mukulembeze yaatoola omwigo ogugwe.

¹⁰ Musengwa Katonda yaakoba Musa ati: “Izaayo omwigo gw'Aaroni gha mberi w'Esanduuku ey'Endagaano, gukumirwe agho ng'akamanhiso eri abadheemu, nti baidha kufa bwe batalekera agho kuneemuluguunhizanga.”

¹¹ Musa yaakola atyo nga Musengwa Katonda bweyamulagira.

¹² Agho Abaisiraeli baakoba Musa bati: “Bona eno, tutuuse okuzikirira. Tufiire, tuwoiregho.

¹³ Oba nga buli muntu aseeta okumpi ni Weema ey'Okwagaananirangamu ni Musengwa Katonda ateekwa kufa, olwo twenatwena tituuweegho buwe?”