Okubala 16 - Baibuli Ekibono kya Katonda 2014

Kora, ni Dathani, ni Abiramu, badheema

¹ Agho Kora mutabane wa Izahara era nga mwidhukulu wa Kohathi ow'ekika kya Levi, ghalala ni Dathani ni Abiramu batabane ba Eliabu, era ni Oni mutabane wa Pelethi, ow'ekika kya Reubeni,

² beesitula nga bali n'abantu ebikumi bibiri n'ataanu, nga bakulembeze mu Isiraeli era nga bamanhiibwa bukalamu.

³ Beesoloza, baaja baadheemera Musa ni Aaroni, baabakoba bati: “Mubitiriiza okwekuluntaza! Abantu boonaboona ab'eighanga lino ba Musengwa Katonda era Musengwa Katonda aba mu ife. Kale lwaki mwetwala nga muli ba ghaigulu inho okusinga abantu ba Musengwa Katonda abo?”

⁴ Musa bweyawulira ebyo yaakutama n'ekyeni kyatuuka ku itaka.

⁵ Bwe yamala, yaakoba Kora ni baine boonaboona ati: “Enkyo Musengwa Katonda aidha kutwoleka oyo owuwe atuukiriire, era oyo aidha kumuseesa kumpi ni mwene. Oyo y'anaalonda aidha kumuseesa kumpi ni mwene.

⁶ Mpegaano mwidha kukola muti: iwe Kora ni baino boonaboona mwidha kugema ebiniokezebwamu obubbaani,

⁷ mubiteemu omuliro enkyo era mute obubbaani ku muliro okwo mu maiso ga Musengwa Katonda. Omuntu Musengwa Katonda y'anaalonda n'aidha okuba atuukiriire. Imwe baidhukulu ba Levi mubitiriiza okwekuluntaza!”

⁸ Musa era yaakoba Kora ati: “Muwulire, imwe baidhukulu ba Levi.

⁹ Mukibona nga kintu kitono, Katonda wa Isiraeli okulonda imwe mu bantu be Abaisiraeli boonaboona n'abaseesa okumpi ni mwene, mugheerezenga mu Weema ye era mwemererenga mu maiso g'abantu be abo okubagheereza?

¹⁰ Katonda yabaseesa kumpi ni mwene, iwe ni baganda bo baidhukulu ba Levi. Buti muli kwenda mufune n'obwakabona bwona?

¹¹ Kale mukimanhe muti, iwe ni baino boonaboona muli kudheemera Musengwa Katonda mwene kuba, katyo Aaroni naani memale mumwemuluguunhize?”

¹² Agho Musa yaayetesa Dathani ni Abiramu batabane ba Eliabu, aye baakoba bati: “Titwidha kwidha.

¹³ Okututoola mu nsi engimu era erimu ebirungi kamaala n'otuleeta okutwitira ghano mu irungu, ti kikumala? Mpegaano oli na kwenda kwefuula mufuzi waife?

¹⁴ Mu butuufu bwene tiwatuleeta mu nsi ngimu erimu birungi kamaala, era tiwatugha bibandha na masamba ga mizabbibu ni biba byaife ku bwaife. Aye oli kwenda kuziba bwa bantu bano maiso? Kale titwidha kwidha.”

¹⁵ Agho Musa yaasungughala inho era yaakoba Musengwa Katonda ati: “Otasiima kigheebwayo kyaibwe kyonakyona kye banaakuleetera. Nze nzira kintu kye natoola ku bantu abo, waire endogoyi endala eti. Era ghazira waire omulala ku abo ye nakolaku akabi.”

¹⁶ Agho Musa yaakoba Kora ati: “Enkyo, iwe ni baino boonaboona ni Aaroni, mwidhe mubeegho mu maiso ga Musengwa Katonda.

¹⁷ Buli muntu ku imwe atoole ekiniokezebwamu obubbaani ekikye, akiteemu obubbaani era akireete mu maiso ga Musengwa Katonda, ebyo nga n'ebiniokezebwamu obubbaani ebikumi ebibiri n'ataanu, era n'iwe ni Aaroni, buli muntu n'ekiniokezebwamu obubbaani ekikye.”

¹⁸ Kale buli muntu yaatoola ekiniokezebwamu obubbaani ekikye, yaakitaamu omuliro n'obubbaani, era boonaboona baayemerera ku mulyango ogw'Eweema ey'Okwagaananirangamu ni Musengwa Katonda, nga bali ni Musa ni Aaroni.

¹⁹ Kora yaasoloza abantu boonaboona, baayemerera ku mulyango ogw'Eweema eyo nga balingiriire Musa ni Aaroni. Agho ekitiisa kya Musengwa Katonda kyabonekera abantu boonaboona.

²⁰ Musengwa Katonda yaakoba Musa ni Aaroni ati:

²¹ “Mwesende muve mu bantu bano, mbazikirize amangu gano.”

²² Aye Musa ni Aaroni baakutama n'ebyeni byatuuka ku itaka, baakoba bati: “Wo Katonda waife, niiwe ensimuko ey'obulamu obwa buli kintu. Omuntu omulala bw'akola ekibi osungughalira abantu boonaboona?”

²³ Musengwa Katonda yaakoba Musa ati:

²⁴ “Koba abantu boonaboona bave okumpi ni weema dha Kora, Dathani, ni Abiramu.”

²⁵ Agho Musa yaasituka, yaaja ye Dathani, ni Abiramu. Abakulembeze mu Isiraeli baamunonereza.

²⁶ Yaakoba abantu boonaboona ati: “Mbeeghemba muve okumpi ni weema edh'abantu bano ababi era mutagema ku kintu kyaibwe kyonakyona. Bwe mutaakole mutyo, musobola okuzikirizibwa ghalala nabo olw'ebibi byaibwe.”

²⁷ Kale abantu beesenda, baaba ghala ni weema dha Kora, ni Dathani, ni Abiramu. Dathani ni Abiramu baafuluma baayemerera gha miryango egy'eweema dhaibwe, ghalala ni bakazi baibwe era n'abaana baibwe abato.

²⁸ Musa yaakoba abantu ati: “Ku kino kwe munaamanhira nga Musengwa Katonda n'eyantuma okukola ebintu ebyo byonabyona, era nga tibikola ku bwange zenka.

²⁹ Abantu bano bwe bafanga olumbe olwabuliidho, oba enkomerero yaibwe n'eba ng'ey'abantu ababuliidho, agho Musengwa Katonda anaabanga nga ti n'eyantuma.

³⁰ Aye Musengwa Katonda bw'anaakolagho ekintu ekitabangaghooku, eitaka ni lyasama ni libamira beene n'ebyaibwe byonabyona, ni bawolomera mu magombe nga balamu, mwidha kumanha ng'abantu abo baanhooma Musengwa Katonda.”

³¹ Bwe yali amaliriza okwogera ebyo byonabyona, eitaka Dathani ni Abiramu kwe baali beemereire lyetema olutanda olunene,

³² lyabamira aghalala n'eby'omu maka gaibwe, era n'abantu boonaboona abaanonereza Kora ghalala n'ebintu byaibwe byonabyona.

³³ Kale batyo baika e magombe nga balamu, n'ebyaibwe byonabyona. Eitaka lyabaziika baasaanagho, abantu nga babona.

³⁴ Abaisiraeli boonaboona abaali okumpi agho, baalumukagho bwe baawulira okulira kwaibwe. Baakoba bati: “Tulumuke. Eitaka twena litatumira.”

³⁵ Agho Musengwa Katonda yaasindika omuliro gwayokya abantu ebikumi ebibiri n'ataanu abaali nga bali kuniosa obubbaani.

Ebiniokezebwamu obubbaani

³⁶ Agho Musengwa Katonda yaakoba Musa ati:

³⁷ “Koba Eleazari mutabane wa Aaroni kabona atoolegho ebiniokezebwamu obubbaani okuva mu kyokero aghayiiriire abantu abo. Amanda agasansaanize eyo eghala, kuba ebiniokezebwamu obubbaani ebyo bitukuvu.

³⁸ Ebiniokezebwamu obubbaani ebyo eby'abantu abo abaayonoona ni baitibwa, bitukuvu, kuba baabighaayo eri nze Musengwa Katonda. Kale ni ka babigheeseemu amabaati ag'okughembanga ku alutaari, kabenga akamanhiso ak'okulabulanga Abaisiraeli.”

³⁹ Kale Eleazari kabona yaatoola ebiniokezebwamu obubbaani ebyo ebyakolebwa mu kyuma ky'ekikomo, abantu abo abaayokebwa bye baaghaayo, yaabighaayo baabigheesaamu eky'okughembanga ku alutaari.

⁴⁰ Ekyo kiidha kwidhukizanga Abaisiraeli, ghalobe kubangagho muntu yeenayeena atali kabona wa ku lulyo lw'Aaroni, aseeta mu maiso ga Musengwa Katonda okuniokeza obubbaani; kuba asobola okuzikirizibwa nga Kora ni baine bwe baazikirizibwa. Ebyo byakolebwa nga Musengwa Katonda bweyalagira Eleazari ng'abita mu Musa.

Aaroni awonia abantu okuzikirira

⁴¹ Ku lunaku olwairirira, abantu boonaboona beemuluguunhiza Musa ni Aaroni, nga bakoba bati: “Mwaise abantu ba Musengwa Katonda!”

⁴² Bwe beesoloza boonaboona okwemuluguunhiza Musa ni Aaroni batyo, baaja okulinga y'Eweema ey'Okwagaananirangamu ni Musengwa Katonda, nga babona ekire kigighembyeku, era ekitiisa kya Musengwa Katonda kyaboneka.

⁴³ Musa ni Aaroni baidha emberi ow'Eweema eyo.

⁴⁴ Musengwa Katonda yaakoba Musa ati:

⁴⁵ “Mwesende muve mu bantu bano, mbazikirize buti buti!” Musa ni Aaroni baakutama n'ebyeni byatuuka ku itaka.

⁴⁶ Musa yaakoba Aaroni ati: “Toola ekiniokezebwamu obubbaani ekikyo, okiteemu omuliro okuva ku alutaari era ote obubbaani ku muliro ogwo. Bw'omala okitwale mangu eri abantu okole omukolo ogw'okubatoolaku ebibi; kuba obusungu bwa Musengwa Katonda bumaze okubatuukaku era endwaire embi etooleire okubaita.”

⁴⁷ Kale Aaroni yaatoola ekiniokezebwamu obubbaani ekikye, yaalumuka yaaja mu bantu, yayagaana nga bwenebwene endwaire embi eri kwita abantu. Agho yaata obubbaani mu kiniokezebwamu ekyo, era yaakola omukolo ogw'okutoola ku bantu ebibi.

⁴⁸ Yaayemerera ghagati gh'abafu n'abakaali abalamu, endwaire embi eyo yaakoma agho.

⁴⁹ Abaafa obulwaire obubi obwo baali omutwalo mulala n'enkumi ina na lusanvu (14,700), nga tobaliireeku abo abaafiira mu keediimo ka Kora.

⁵⁰ Endwaire embi bweyalekera agho okwita abantu, Aaroni yaira ye Musa gha mulyango ogw'Eweema ey'Okwagaananirangamu ni Musengwa Katonda.