Okubala 15 - Baibuli Ekibono kya Katonda 2014

Amateeka agagema ku misengo

¹ Agho Musengwa Katonda yaakoba Musa ati: “Kobera Abaisiraeli oti

² amateeka gano ge munaajiirangaku mu nsi ye muja okutyamamu, ye ndidha okubagha:

³ Bwe munaayendanga okugha nze Musengwa Katonda ekigheebwayo okuva mu nte dhaimwe, oba mu ntaama dhaimwe, oba mu mbuzi dhaimwe, ng'ekigheebwayo ekyokebwa, oba ng'omusengo ogugheebwayo olw'okutuukiriza obweyamo, oba ng'ekigheebwayo eky'ekyeyendere, oba nga muli ku mbaga edh'ebibinuko ebyalagirwa, akawoowo ak'ebigheebwayo ebyo kaidha kunsangaazanga nze Musengwa Katonda.

⁴ Omuntu yeenayeena bw'ayendanga okughaayo ye nze Musengwa Katonda ekigheebwayo eky'ensambo ng'oti n'eyo, akighangayo ghalala ni kilo ndala ey'obuwunga obuseereibwa obukalamu, nga butabwirwamu lita ey'omuzigo. Ekyo nga n'ekigheebwayo eky'emere ey'empeke.

⁵ Era aidha kughangayo e lita ey'omwenge ogw'emizabbibu ng'ekigheebwayo eky'ebyokunhwa. Ekyo kye mwidha okutegekanga kijiirenga ghalala na buli kigheebwayo ekyokebwa oba omusengo ogw'entaama ento.

⁶ Bw'aghangayo entaama enume enkulu, ategekangayo kilo ibiri edh'obuwunga obuseereibwa obukalamu, nga butabwirwamu lita ndala n'ekitundu ey'omuzigo, ekyo kibe ekigheebwayo eky'emere ey'empeke.

⁷ Era aghangayo lita ndala n'ekitundu ey'omwenge ogw'emizabbibu, ng'ekigheebwayo eky'ebyokunhwa. Akawoowo kaabyo kansangaaza nze Musengwa Katonda.

⁸ Ole bw'ategekanga okughaayo ye nze Musengwa Katonda ente endaagho ng'ekigheebwayo ekyokebwa, oba ng'omusengo ogw'okutuukiriza obweyamo, oba ng'ekigheebwayo olw'okutabagana,

⁹ agigheerangayo ghalala n'ekigheebwayo eky'emere ey'empeke, nga kya kilo isatu edh'obuwunga obuseereibwa obukalamu, nga butabwirwamu lita ibiri edh'omuzigo.

¹⁰ Era aghangayo lita ibiri edh'omwenge ogw'emizabbibu ng'ekigheebwayo eky'ebyokunhwa. Akawoowo kaabyo kansangaaza nze Musengwa Katonda.

¹¹ “Ebyo bye mwidha okukolanga buli lwe munaaghangayo ente enume, oba entaama enume enkulu, oba entaama ento, oba embuzi.

¹² Obungi obw'ebintu ebinaajiiranga ku bigheebwayo ebyo, bwidha kujiiranga ku bungi obw'ensolo edhinaagheebwangayo.

¹³ Abo boonaboona abatyamye ab'omu Isiraeli bakolanga batyo, buli lwe baghangayo ekigheebwayo ekyokebwa, ekiri n'akawoowo akansangaaza nze Musengwa Katonda.

¹⁴ Era bweghabangagho omusenze aba mu imwe, oba omuntu yeenayeena abaire n'imwe ekiseera kyonakyona kye mubairegho, memale n'ayenda okughaayo ekigheebwayo ekyokebwa, ekiri n'akawoowo akansangaaza nze Musengwa Katonda, akolanga nga imwe bwe mukola.

¹⁵ Amateeka malala ago n'agaidha okufuganga imwe Abaisiraeli n'abasenze abali mu imwe, era tigaakyukengamu ense n'ense. Imwe n'abasenze mwidha kubisibwanga bulala.

¹⁶ Amateeka n'amalala ago, n'ebiragiro n'ebirala ebyo ebinaafuganga imwe n'abasenze ababa mu imwe.”

¹⁷ Musengwa Katonda era yaakoba Musa ati:

¹⁸ “Kobera Abaisiraeli oti, bwe mutuukanga mu nsi ye ndi kubatwalamu,

¹⁹ era ekiseera bwe kituukanga ni mulya ku mere ey'omu nsi eyo, mughangayo ekigheebwayo eri nze Musengwa Katonda.

²⁰ Ku ngaano ye musookanga okukanda, mufumbangaku omugaati omutono mugugheeyo ng'ekigheebwayo, nga bwe mughaayo ekigheebwayo olw'ekifo aghakubirwa engaano.

²¹ Ku ngaano ye musookanga okukanda, mutoolangaku mwaghaayo ekigheebwayo eri nze Musengwa Katonda, mu nse dhaimwe dhoonadhoona edhiirangagho.

²² “Aye kisoboka, omuntu yaasobya mu butali bugenderevu, yaaloba kutuukiriza biragiro bino byonabyona, nze Musengwa Katonda bye nakobera Musa.

²³ Era kisoboka, omuntu yaaloba okutuukiriza ebyo byonabyona nze Musengwa Katonda bye nabalagira nga mbita mu Musa okuviira irala ku lunaku lwe nateeka amateeka, n'okweyongerayo okubita mu nse dhoonadhoona edhiriiragho.

²⁴ Aye okusobya bwe kuba nga tikwakolebwa mu bugenderevu era ng'abantu boonaboona tibaakimanha, olwo abantu boonaboona baghangayo ente ento enume ndala olw'ekigheebwayo ekyokebwa, ekiri n'akawoowo akansangaaza nze Musengwa Katonda. Era bateerangaku ekigheebwayo eky'emere ey'empeke, n'ekigheebwayo eky'ebyokunhwa, ng'amateeka bwe galagira. Era baghangayo n'embuzi ndala enume ng'ekigheebwayo olw'ebibi.

²⁵ Agho kabona akolanga omukolo ogw'okutoolebwaku ebibi, olw'Abaisiraeli boonaboona okusoniyibwanga, kuba ekisobyo ekyo tikyali kigenderere ate nga bandeeteire nze Musengwa Katonda ekigheebwayo kyaibwe ekyokebwa n'ekigheebwayo olw'ebibi, olw'ekisobyo kyaibwe ekyo.

²⁶ Abaisiraeli boonaboona n'abasenze ababanga nga babalimu basoniyibwanga, kuba boonaboona bavunaanibwa ekisobyo ekyo.

²⁷ “Omuntu bw'akolanga ekibi nga tagendereire, aghangayo embuzi enduusi ey'omwaka omulala ng'ekigheebwayo olw'ebibi.

²⁸ Kabona akoleranga mu maiso gange, nze Musengwa Katonda, omukolo ogw'okutoolebwaku ebibi olw'omuntu akoze ekibi nga tagendereire, era omuntu oyo asoniyibwanga.

²⁹ Mubanga n'amateeka malala ago agavunaana omuntu akola ekibi nga tagendereire, k'abe omutyamye Omuisiraeli oba abe omusenze abanga ng'abalimu.

³⁰ “Aye ole akola ekibi ng'agendereire, k'abe Omuisiraeli omuzaale waamu oba omusenze, aba ng'annhoomye nze Musengwa Katonda era omuntu oyo aba nga takaabalirwa mu bantu bange.

³¹ Olw'okuba aba ng'anhoomye ekibono kyange nze Musengwa Katonda era ng'amenhie eiteeka lyange, omuntu oyo aba nga takaabalirwa mu bantu bange naire, era aba nga yeereeteire mwene omusango okumusinga.”

Omuntu eyamenha eiteeka erigema ku Sabbato

³² Lwali lulala, ng'Abaisiraeli bakaali mu irungu, baayagaana omuntu ng'ali kugherera enku ku lunaku lwa Sabbato.

³³ Abo abaamwagaana, baamuleeta eri Musa ni Aaroni n'Abaisiraeli abandi boonaboona.

³⁴ Baamukuuma butiribiri olw'okuba baali nga tibaidhi bukalamu kya kumukolera.

³⁵ Agho Musengwa Katonda yaakoba Musa ati: “Omuntu oyo ateekwa kwitibwa. Abantu boonaboona baidha kumukuba amabaale afe, nga bamutoire mu kifo ghe baasimba weema dhaibwe.”

³⁶ Kale abantu boonaboona baamutoola mu ekifo ghe baasimba weema dhaibwe, baaja baamukuba amabaale yaafa, nga Musengwa Katonda bweyalagira Musa.

Amateeka agagema ku madhwenge ag'oku bivaalo

³⁷ Agho Musengwa Katonda yaakoba Musa ati:

³⁸ “Koba Abaisiraeli oti mutungenga amadhwenge ku buli nsonda edhiri ku bivaalo byaimwe, ku buli idhwenge mutungengaku akawuuzi aka bululu. Buli luse olunairangagho lwidha kukolanga lutyo.

³⁹ Amadhwenge ago buli lwe munaagalingangaku gaidha kubanga akamanhiso akanaabaidhusanga amateeka gange nze Musengwa Katonda n'okugagonderanga, mulobenga kunvaaku ni mujiira ku ebyo emyoyo gyaimwe n'amaiso gaimwe bye bibaleetera okwegomba.

⁴⁰ Kale mwidha kwidhukiranga era mugonderenga amateeka gange, olwo mubenga abatuukiriire eri nze Katonda waimwe.

⁴¹ Ninze Musengwa Katonda waimwe, eyabatoola mu nsi Misiri, nsobole okubanga Katonda waimwe. Ni nze Musengwa Katonda waimwe.”