Okubala 14 - Baibuli Ekibono kya Katonda 2014

Abaisiraeli beemuluguunhia

¹ Agho abantu boonaboona baakuba empungu era baagegenga obwire obwo.

² Beemuluguunhiza Musa ni Aaroni nga bakoba bati: “Nguli twafiira mu nsi Misiri, oba ni tufiira ghano mu irungu, ekyo n'ekyandisinze!

³ Lwaki Musengwa Katonda ali kututwala mu nsi eyo okufiira mu lutalo? Bakazi baife n'abaana baife baidha kufuuka munhago! Okwirayo e Misiri ti n'ekyandisinzeeku?”

⁴ Agho beeteesaamu beene na beene bati: “Ka twerondemu omukulembeze twireyo e Misiri.”

⁵ Agho Musa ni Aaroni baakutama n'ebyeni byatuuka ku itaka agho mu maiso ag'Abaisiraeli boonaboona abeesoloza.

⁶ Aye Yoshua mutabane wa Nuni, ni Kalebu mutabane wa Yefune, abaali ku abo abaaja okukeeta, baakanulamu ebivaalo byaibwe olw'okunakughala.

⁷ Baakoba Abaisiraeli boonaboona abeesoloza bati: “Ensi ye twaja okukeeta nungi ebitaloodheka.

⁸ Musengwa Katonda bw'aba ng'atusiimye aidha kututwala mu nsi eyo engimu era erimu ebirungi kamaala, agitughe.

⁹ Kye mutagwaine kukola, n'okudheemera Musengwa Katonda. Mutatya bantu bale, kuba baidha kutwanguyira okughangula, ng'oti bwetwanguyirwa okulya emere. Ekibakuuma kibatooleibwaku, era Musengwa Katonda ali ku luuyi lwaife.”

¹⁰ Aye abantu boonaboona abeesoloza baayenda bwa kubakuba mabaale. Agho ekitiisa kya Musengwa Katonda kyabonekera Abaisiraeli boonaboona ku Weema ey'Okwagaananirangamu ni Musengwa Katonda.

Musa asabira abantu

¹¹ Era Musengwa Katonda yaakoba Musa ati: “Abantu bano balituusa li okuunhooma? Era balituusa li obutaneesiga, waire nga nkoze obumanhiso kamaala nga babona.

¹² Ndidha kubasindikira obulwaire obubi mbazikirize, iwe nkufuulemu eighanga einene era ery'amaani okusinga beene.”

¹³ Aye Musa yaakoba Musengwa Katonda ati: “Wo Musengwa Katonda, iwe watoola abantu bano ku Bamisiri ng'okozesa obuyinza bwo. Mperaano Abamisiri bwe baliwulira ng'okoze otyo,

¹⁴ baja kukobera abantu ababa mu nsi eno, kuba baawulira nga iwe oba mu bantu bano era ng'obonebwa maiso ku maiso. Era baawulira ng'ekire kyo kyemerera ghaigulu gh'abantu bano, ng'oli kubakulemberamu ng'oli mu kire ekiri ng'oti mpango omusana, era waaba mu muliro oguli ng'oti mpango obwire.

¹⁵ Kale bw'onaita abantu bano boonaboona n'obamalagho, amaghanga agaakuwuliraku eby'amaani bye wakoba, galikoba gati,

¹⁶ ‘Musengwa Katonda yalemwa okutuusa abantu bano mu nsi ye yabalayirira okubagha, kyeyava n'abaitira mu irungu.’

¹⁷ Kale buti ni nkweghemba, oyoleke obuyinza bwo, okole kye wasuubiza, bwe wakoba oti,

¹⁸ ‘Nze Musengwa Katonda ndwagho okusungughala, ngonza abantu obutalekera, era naasonigha aboonooni n'abadheemu. Aye tiriroba kubonereza aliku musango. Ndibonereza abaana n'abaidhukulu olw'ebibi eby'abazaire baibwe, okutuukira irala ku luse olwokusatu n'olwokuna.’

¹⁹ Nkweghemba osonighe abantu bano ebibi byaibwe olw'okugonza kwo okungi okutakoma, era nga bw'obaire obasonighanga kasookanga bava e Misiri n'okutuusa mpegaano.”

²⁰ Agho Musengwa Katonda yaakoba ati: “Kale mbasoniighe nga bw'osabye.

²¹ Aye bwenebwene nga bwendi omulamu, era ng'ensi bw'eidhula ekitiisa kyange,

²² ghazira ku bantu abo alituuka mu nsi eyo. Abantu abo baabona ekitiisa kyange n'obumanhiso bye nakolera mu Misiri ni mu irungu, aye era bansonsoonia emikuzi gino eikumi, baaloba kuwulira bye mbakoba.

²³ Abantu abo tibalibona ku nsi ye nasuubiza okugha badhaadha baibwe, era ghazira waire omulala ku abo boonaboona abaanhooma, aligingiramu.

²⁴ Aye olw'okuba omugheereza wange Kalebu ali n'omwoyo ogw'endhawulo, era nga aneesigira irala mu bwidhuvu, ndidha kumwingiza mu nsi ye yakeeta. Era baidhukulu be n'abaliba beene nsi eyo.

²⁵ Nga mpegaano Abamaleki n'Abakanaani bwe bali mu biiko, imwe enkyo mukyuke mutambule nga mwolekeire eirungu, mugeme engira etuuka ku Nhandha Emyufu.”

Musengwa Katonda abonereza Abaisiraeli olw'okwemuluguunhia

²⁶ Agho Musengwa Katonda yaakoba Musa ni Aaroni ati:

²⁷ “Abantu bano abakozi b'ebibi, balirekera li okuneemuluguunhiza? Mpuliire okwemuluguunhia kwaibwe, kwatuuka n'okunsina.

²⁸ Kale ni mubakobe muti, Musengwa Katonda akoba ati, ‘Nga nze Musengwa Katonda bwendi omulamu, ndidha kubakola ekyo kyene kye mukobye nga mpulira.

²⁹ Mwidha kufa, emirambo gyaimwe gigwe mu irungu muno. Era abo boonaboona ku imwe abagheza emyaka amakumi abiri egy'obukulu n'okusingagho, abaneemuluguunhiza,

³⁰ ghazira waire mulala ati alituuka mu nsi ye nabalayirira okubagha, okutoolaku Kalebu mutabane wa Yefune, ni Yoshua mutabane wa Nuni.

³¹ Aye abaana baimwe abato be mwakoba muti baja kufuuka munhago, abo be ndingiza ni batyama mu nsi eyo, imwe ye mwanhoomerera.

³² Aye imwe emirambo gyaimwe giidha kuziikibwa mu irungu muno.

³³ Abaana baimwe baidha kuba baayi mu irungu lino okumala emyaka amakumi ana nga badaagadaaga, olwa imwe obutaba beesigwa, okutuusa omulambo gw'oyo alisembayo ku imwe okufa lwe guligwa mu irungu muno.

³⁴ Mwidha kudaagadaaga olw'ebibi byaimwe okumala emyaka amakumi ana. Buli lunaku, ku nnaku amakumi ana dhe mwamala nga mukeeta ensi eyo, mwidha kulusasulangamu mwaka mulamba. Memale olwo mumanhe nga tiri musangaavu.

³⁵ Nze Musengwa Katonda, ninze ndhogeire. Bwenebwene ntyo bwenja okukola abantu bano ababi abeesoloiza okuntakania. Mu irungu lino boonaboona mwe baja okufiira baweegho.’ ”

³⁶ Abantu Musa be yatuma okukeeta ensi eyo, ni baira ni baleetera Abaisiraeli boonaboona okwemuluguunhia olw'amawulire ag'obulimba ge baaleeta agagema ku nsi eyo,

³⁷ Musengwa Katonda yabasindikira ekibamba baafa.

³⁸ Okutoolaku Yoshua mutabane wa Nuni ni Kalebu mutabane wa Yefune, n'abataafa ku abo abaaja okukeeta ensi eyo.

Okulumba ensi Kanaani omukuzi ogwasooka

³⁹ Musa bweyakobera Abaisiraeli boonaboona ebyo Musengwa Katonda by'akobye, baalira gaabawa.

⁴⁰ Baawuuna ku nkyo inho baaniinaniina nga baaja mu kiketezo eky'oku nsozi, bakoba bati: “Bona eno tuli beetegefu okuja mu kifo Musengwa Katonda kye yatusuubiza. Bwenebwene tuboine nga twayonoona olw'okwemuluguunhia.”

⁴¹ Aye Musa yaabakoba ati: “Lwaki mpegaano muli kudheemera ekiragiro kya Musengwa Katonda? Ti mwidha kughangula.

⁴² Mutaja, abazigu baidha kubakubira eyo, kuba Musengwa Katonda tali n'imwe.

⁴³ Mwidha kwagaanana n'Abamaleki n'Abakanaani abali eyo, babaitire mu lutalo. Musengwa Katonda taidha kuba n'imwe, kuba mwamuvaaku mwaloba okumugondera.”

⁴⁴ Aye beene baakana, baaniinaniina mu kiketezo eky'oku nsozi, waire ng'Esanduuku ey'Endagaano ya Musengwa Katonda tiyava mu kifo ghe baasimba weema dhaibwe, oba Musa okuva mu kifo ekyo.

⁴⁵ Agho Abamaleki n'Abakanaani abaabanga mu biketezo ebyo eby'oku nsozi, baabalumba, baabaghangula, era baababingirira okubatuukiza irala e Horuma.