Okubala 13 - Baibuli Ekibono kya Katonda 2014

Musa atuma abakeesi

¹ Agho Musengwa Katonda yaakoba Musa ati:

² “Tuma abantu baje bakeete ensi Kanaani, ye ndi kubagha imwe Abaisiraeli. Oidha kutumangaku mulala okuva mu buli kika, nga mukulembeze.”

³ Kale Musa yaatuma abakulembeze abo ab'ebika mu Isiraeli, nga bali mu irungu ery'e Parani nga Musengwa Katonda bweyalagira.

⁴ Gano n'amaina gaibwe: Shammua mutabane wa Zakkuri ow'omu kika kya Reubeni;

⁵ Shafati mutabane wa Hori ow'omu kika kya Simeoni;

⁶ Kalebu mutabane wa Yefune ow'omu kika kya Yuda;

⁷ Igali mutabane wa Yosefu ow'omu kika kya Issakari;

⁸ Hoshea mutabane wa Nuni ow'omu kika kya Efuraimu;

⁹ Palati mutabane wa Rafu ow'omu kika kya Benjamini;

¹⁰ Gaddieli mutabane wa Sodi ow'omu kika kya Zebuluni;

¹¹ Gaddi mutabane wa Susi ow'omu kika kya Yosefu, ekyo nga n'ekika kya Manasse;

¹² Ammieli mutabane wa Gemalli ow'omu kika kya Dani;

¹³ Sethuri mutabane wa Mikaeli ow'omu kika kya Asheri;

¹⁴ Nahabi mutabane wa Vopusi ow'omu kika kya Nafutali;

¹⁵ ni Geueli mutabane wa Maki ow'omu kika kya Gadi.

¹⁶ Ago n'amaina ag'abantu Musa be yatuma okukeeta ensi Kanaani. Era Musa yakyusa eriina lya Hoshea mutabane wa Nuni, yaamweta Yoshua.

¹⁷ Agho musa yaabatuma okukeeta mu nsi Kanaani, ng'abakoba ati: “Muje mubitire mu kiketezo ekikalukalu eky'oku luuyi olw'omukono omusaadha olw'e buvandhuba, mungire mu kiketezo eky'ensozi.

¹⁸ Mubone ensi eyo nga bw'eri, mubone oba abantu abagirimu ba maani oba banafu.

¹⁹ Mubone oba erimu abantu kamaala oba batono, oba nsi nungi oba mbi, oba ebibuga byamu baabizimba na weema oba biriku ebimante ebigumu.

²⁰ Era mubone oba eitaka lyayo igimu oba ikalukalu, era oba kuliku emiti oba kuzira. Era mufube okuleeta ku bibala byayo.” Ebiseera ebyo byali bya mizabbibu ghe gisookereza okwenza.

²¹ Kale abantu abo baaja baakeeta ensi eyo okuva ku irungu ery'e Zini okutuuka e Rehobu, agho gh'oingirira mu Hamathi.

²² Baaniinaniina baingira mu kiketezo ekikalukalu eky'oku luuyi olw'omukono omusaadha olw'e buvandhuba, baaja baatuuka e Heburoni. Eyo n'eyali ab'ekika kya Ahimani n'ab'ekika kya Sheshai n'ab'ekika kya Talumai, baidhukulu ba Anaki. Heburoni ekyo, n'ekyasooka okuzimbibwa ghaabitagho emyaka musanvu, memale Zoani kyazimbibwa mu Misiri.

²³ Agho baatuuka mu kiiko eky'e Eshikoli, baatemayo olusaga olwaliku ekifaaganda eky'emizabbibu kirala kiti, abantu babiri baakitwalira ku muti, ng'owundi agemyeku eruuyi n'owundi eruuyi. Baatwala ni ku bibala eby'emikomamawanga n'eby'emitiini.

²⁴ Era ekifo ekyo baakituuma Ekiiko eky'Ekifaaganda, olw'ekifaaganda eky'emizabbibu Abaisiraeli kye baatemayo.

²⁵ Nga bamaze okukeeta ensi Kanaani okumala enaku amakumi ana, abantu abo baira.

²⁶ Baaja ye Musa ni Aaroni, ni y'Abaisiraeli boonaboona nga beesoloiza e Kadeshi mu irungu ery'e Parani, baabakobera bye baabonayo, era baabooleka ni ku bibala bye baatoolayo.

²⁷ Baakobera Musa bati: “Twatuuka mu nsi ye watutuma okukeeta, twabona nga ngimu era ng'erimu ebirungi kamaala, era bino n'ebibala byamu.

²⁸ Aye abantu baayo ba maani, n'ebibuga byaibwe binene inho era nga baabyezunguluza ebimante ebigumu. Ate ebyo nga bikaali agho, twabonayo baidhukulu ba Anaki.

²⁹ Twabona nga Abamaleki baba mu kiketezo kyayo ekikalukalu eky'oku luuyi olw'omukono omusaadha olw'e buvandhuba, Abahitti n'Abayebusi n'Abamori, baaba mu kiketezo kyayo eky'ensozi, ate Abakanaani baaba ku mbali okw'enhandha, ni ku mbali okw'omwiga Yorudani.”

³⁰ Agho Kalebu yaasirisa abantu, agho mu maiso ga Musa, yaakoba ati: “Mukole tusitukiremu tuje tutwale ensi eyo. Kuba tusobolera irala bukalamu okugighangula.”

³¹ Aye abantu be yaja nabo baakoba bati: “Titusobola naire kuja kulumba bantu bale, kuba ba maani inho okutusinga.”

³² Kale baaleetera Abaisiraeli amawulire ag'obulimba agagema ku nsi ye baaja okukeeta, nga bakoba bati: “Ensi ye twaja okukeeta tebaza mere emala kuliisa bantu baamu. Abantu be twabonayo boonaboona baleeyi inho.

³³ Era twabonayo ni baidhukulu ba Anaki abawaigufu, abasimuka mu Nefili. Ife twebona nga tuli ng'oti bwa masisi, era boona tutyo bwe twababonekera.”