Okubala 12 - Baibuli Ekibono kya Katonda 2014

Miriamu bamubonereza

¹ Agho Miriamu ni Aaroni beemuluguunhiza Musa, olwa Musa oyo okufumbirwa omukazi Omukushi.

² Baakoba bati: “Musengwa Katonda ayogerera mu Musa yenka? Tayogereraku ni mu ife twena?” Musengwa Katonda yaabawulira nga beemuluguunhia.

³ Musa yali muntu muwombeefu inho, okusinga abantu boonaboona ab'oku nsi.

⁴ Mangu ago, Musengwa Katonda yaakoba Musa, n'Aaroni, ni Miriamu, ati: “Mwensatule muje mu Weema ey'Okwagaananirangamu ni Musengwa Katonda.” Era bonsatule baaja.

⁵ Agho Musengwa Katonda yaikira mu kire ekiri ng'oti mpango, yaayemerera mu mulyango ogw'Eweema eyo, yaayeta Aaroni ni Miriamu, era bombi baidha.

⁶ Yaakoba ati: “Muwulire kye nkoba, bweghabaagho omulanzi mu imwe, nze Musengwa Katonda mwene mmweyoleka mu kubonekerwa, era naayogera naye mu kirooto.

⁷ Aye ntyo ti bwe nkola ku mugheereza wange Musa. Namugha okulabirira abantu bange boonaboona.

⁸ Oyo ndhogera naye butereevu maiso ku maiso, se ti mu bikoiko. Era ambona bukalamu nga bwe nfaanana. Kale mukana mutya ni mwemuluguunhiza omugheereza wange oyo Musa?”

⁹ Agho obusungu bwa Musengwa Katonda bwabatumbukiraku ng'oti muliro, era Musengwa Katonda oyo yaavaagho.

¹⁰ Ekire kire bwe kyava ku Weema eyo, okuja okubona nga Miriamu aidhwire endwaire ey'ebigenge, era ng'apaaluuse ng'oti mugozi. Aaroni bweyamulingaku n'abona nga yeenayeena aidhwire endwaire eyo,

¹¹ yaakoba Musa ati: “Wo musengwa wange, otatubonereza, olw'ekyo kye tukoze mu busiru ni twonoona.

¹² Otamuleka kuba ng'omuntu eyava mu nda ya inhina nga mufu, ng'omubiri gwe gwavundaku oluuyi.”

¹³ Agho Musa yaasaba Musengwa Katonda ati: “Wo Katonda wange, nkweghembye muwonie.”

¹⁴ Aye Musengwa Katonda yaamwiramu ati: “Nguli ise n'abaire ng'amufuudhie amatanta mu maiso, ti yandibaire na buswavu kumala nnaku musanvu? Kale leka asibirwe kuliya okw'ekifo abantu ghe baasimba weema dhaibwe okumala enaku musanvu, memale bamale bamwingize kabiri.”

¹⁵ Kale Miriamu yaasibirwa kuliya okw'ekifo abantu ghe baasimba weema dhaibwe okumala enaku musanvu. Era abantu tibaasimbukagho kutambula okutuusa lwe baamwiza ni bamwingiza kabiri.

¹⁶ Ebyo bwe byawa abantu baatoolera okutambula nga baava e Hazerothi, baaja baasimba weema dhaibwe mu irungu ery'e Parani.