Okubala 11 - Baibuli Ekibono kya Katonda 2014

Ekifo ekyetebwa Tabera

¹ Agho abantu beemuluguunhiza Musengwa Katonda ng'abawulira, olw'ebizibu ebyabatuukaku. Musengwa Katonda bweyabawulira, obusungu bwe bwabatumbukiraku ng'oti muliro. Agho omuliro gwa Musengwa Katonda oyo gwabaakiramu era gwayokya oluuyi olusembayo olw'ekifo ghe baasimba weema dhaibwe.

² Agho abantu baalirira Musa. Era Musa yaasaba Musengwa Katonda omuliro gwazikira.

³ Ekifo ekyo baakituuma eriina Tabera olw'okuba omuliro gwa Musengwa Katonda gwabaakiramu.

Musa alonda abakulembeze ensanvu

⁴ Mu Baisiraeli abo abaali bali kutambula, mwalimu abantu ab'endha abaali n'amairu amangi ag'emamba. Aye n'Abaisiraeli beene boona beemuluguunhia bati: “Wo, ngoli tuliku n'emamba ey'okulyaku!

⁵ Twidhukira ebyenhandha bye twalyanga mu Misiri ku bwereere! Twalyanga amaliibwa aga buli nsambo n'obutungulu obwa buli nsambo.

⁶ Aye buti titukaali na maani naire. Era tuzira kya kulya kindi kye tubonaku okutoolaku mannu eno yonka.”

⁷ Mannu eyo yalinga ng'oti n'obusigo obutono era nga langi yaayo ndheru.

⁸ Abantu baagisolozanga, baagisanga ku mmengo oba baagisekulanga mu binu. Olwo baamalanga baagitogosa mu ntamu baafumbamu emigaati emitono egyawoomanga ng'oti n'emigaati emitono gye bafumbye n'omuzigo.

⁹ Mannu eyo yagwanga bwire, ng'egwira kulala n'omusulo.

¹⁰ Musa yaawulira ng'abantu beemuluguunhia, buli muntu n'ab'omu ndhu ye nga bali ku miryango gy'eweema dhaibwe. Obusungu bwa Musengwa Katonda bwayaka ng'oti muliro, ni Musa yaanakughala.

¹¹ Musa yaakoba Musengwa Katonda ati: “Wo Musengwa Katonda, lwaki ombisiisa obubi otyo nze omugheereza wo? Lwaki onsungughaliire, n'ontwika obuvunaanizibwa obw'abantu abo boonaboona?

¹² Ti ninze eyatoola enda ni nzaala abantu abo, memale onkobe okubabbeedera mu kifuba ng'omulezi bw'abbeeda omwana ayonka. Era oti mbatwale mbatuuse mu nsi ye walayirira okugha badhaadha baibwe.

¹³ Nze nnaatoola gha emamba ey'okugha abantu abo boonaboona, abandirira bati, ‘Tughe emamba tulye’?

¹⁴ Tighanga kwetwika buvunaanizibwa bwa bantu abo boonaboona zenka. Ekyo kiba nga kinzitoogherera inho.

¹⁵ Bw'oba ng'otyo bw'oidha okumbisanga, mala gansaasira ondhite mangu mpegaano, ndobe kutuuka ku kudaagadaaga.”

¹⁶ Agho Musengwa Katonda yaakoba Musa ati: “Nsololeza abantu nsanvu boidhi nga bakulu ba bikunsu mu Isiraeli era abakulembeze, obaleete mu Weema ey'Okwagaananirangamu ni Musengwa Katonda, beemerere agho ghalala n'iwe.

¹⁷ Ndidha kwika ndhogere n'iwe agho, era ntoole ku mwoyo oguli ku iwe boona ngubateeku. Olwo babe nga bakubeeraku okwetwika obuvunaanizibwa obw'abantu abo, bulobe kubanga ku iwe wenka.

¹⁸ Era koba abantu oti, ‘Mwetukuze nga mwetegekera olunaku olwenkyo. Olunaku olwenkyo olwo mwidha kulya emamba, kuba mulize nga ni Musengwa Katonda abawulira, muti naani anaatugha emamba ey'okulya? Twalinga bukalamu mu nsi Misiri. Mpegaano ni, Musengwa Katonda aidha kubaghanga emamba ye munaalyanga.

¹⁹ Timwidha kugirya lunaku lulala, oba ibiri, oba itaanu, oba ikumi, oba waire amakumi abiri,

²⁰ aye mwidha kugirya omwezi mulamba okutuusa lw'eribafulumira mu nhindo n'ebasemba ku mwoyo. Ebyo bija kuba bityo kuba mwava ku Musengwa Katonda ali mu imwe, mwamwemuluguunhiza muti kale lwaki twava e Misiri?’ ”

²¹ Musa yaakoba Musengwa Katonda ati: “Oba nga abantu be ndi nabo baghera emitwalo nkaaga (600,000), memale iwe oghanga otya okukoba oti oidha kubagha emamba ebamala okulya omwezi omulamba?

²² Ghaligho engo edh'ente, n'ebighaso eby'embuzi n'eby'entaama ebinaitibwa ni bimala abantu abaaga agho? Oba ebyenhandha byonabyona binaasolozebwa memale bisobole okubamala?”

²³ Musengwa Katonda yaamwiramu ati: “Olowooza oti amaani gange ghaligho ghe gakoma? Buti oidha kubona oba nga kye nkobye kinaatuukirira oba tikiituukirire.”

²⁴ Kale Musa yaaja yaakobera abantu Musengwa Katonda bye yakoba. Era yaasoloza abantu ensanvu abakulu ab'ebikunsu mu Isiraeli, yaabeemereza agho okwezungulula Eweema ey'Okwagaananirangamu ni Musengwa Katonda.

²⁵ Agho Musengwa Katonda yaikira mu kire yaayogera ni Musa, era yaatoola ku mwoyo ogwali ku Musa yaaguta ku bantu abo. Era omwoyo ogwo bwe gwabaidhaku baayogera eby'obulanzi. Aye baakoma ku olwo, tibaakikola mukuzi gundi.

²⁶ Ghaaligho abantu babiri, ku bakulembeze ensanvu, abaasigala mu kifo abantu ghe baasimba weema dhaibwe, owundi nga ni Elidadi ate owundi nga ni Medadi. Abo baali nga tibajiire mu Weema ni banaibwe. Agho omwoyo gwabaidhiraku eyo, baayogera eby'obulanzi.

²⁷ Ghaabaagho omwisuka eyalumuka n'aja n'akobera Musa ati: “Elidadi ni Medadi bali eyo mu kifo abantu ghe baasimba weema dhaibwe, bali kwogera eby'obulanzi.”

²⁸ Yoshua mutabane wa Nuni, nga mugheereza wa Musa, era owundi ku bantu ba Musa oyo abalondemu, yaakoba Musa ati: “Musengwa balobere!”

²⁹ Aye Musa yaamwiramu ati: “Enkikidi ekugemye ku lwange? Kyandibaire kikalamu nguli Musengwa Katonda ata omwoyo gwe ku bantu be boonaboona baaba balanzi.”

³⁰ Agho Musa n'abakulu ab'ebikunsu mu Isiraeli bairayo ere abantu ye baasimba weema dhaibwe.

Musengwa Katonda asindikira Abaisiraeli obunhonhi obuli ng'oti bukologo

³¹ Agho Musengwa Katonda yaasindika empewo ng'eva ku nhandha, yaafuuwa obunhonhi obuli ng'oti bukologo. Bwaidha nga bugulukira ghansi inho mita ng'oti ndala yonka okuva ku itaka, bwagwa agho okwezungulula ekifo Abaisiraeli ghe baasimba weema dhaibwe. Nga buli luuyi lw'osimbiraku otambula olugendo lwa lunaku lulamba memale waatuuka ghe bukanga.

³² Abantu baasituka, baamala olunaku olwo lwonalwona, n'obwire bwonabwona, n'olunaku olwairirira lwonalwona, nga bali kusoloza obunhonhi obwo bwebabubunga. Eyasoloza obusinga okuba obutono, n'eyali n'obuzito obwa kilo olukumi (1,000). Agho baamala, buli muntu yaayanika obubwe okwezunguluza ekifo ekyo.

³³ Bwe baali nga bakaalya emamba yaibwe mu bungi, obusungu bwa Musengwa Katonda bwabatumbukiraku ng'oti muliro, yaababonereza ng'abasindikira ekibamba eky'amaani.

³⁴ Ekifo ekyo baakyeta Kiburothi Hattaava, ekitegeeza: Amagombe ag'ab'amairu; kuba baaziikagho abantu ab'amairu.

³⁵ Bwe baava e Kiburothi Hattaava, beeyongerayo baatuuka e Hazerothi, baasimba eyo weema dhaibwe.