Okubala 1 - Baibuli Ekibono kya Katonda 2014

Okubala Abaisiraeli okwasooka

¹ Ku lunaku olusooka mu mwezi ogwokubiri, mu mwaka ogwokubiri kasookanga Baisiraeli bava mu nsi Misiri, Musengwa Katonda yayogera ni Musa, mu irungu ery'e Sinai, mu Weema ey'Okwagaananirangamu ni Musengwa Katonda. Yaamukoba ati:

² “Mubale Abaisiraeli boonaboona abali mu buli kika ni mu buli nda. Mughandiike amaina ag'abasaadha boonaboona

³ abagheza emyaka amakumi abiri n'okusingagho, abasobola okulwana mu lutalo. Iwe ni Aaroni mubabale.

⁴ Mu buli kika mwidha kuvaamu omukulu waakyo mukole naye.”

⁵ Gano n'amaina ag'abantu abo be muja okukola nabo: Ow'omu kika eky'Abareubeni, ni Elizuri mutabane wa Shedeura.

⁶ Ow'omu kika eky'Abasimeoni, ni Shelumieli mutabane wa Zurishaddai.

⁷ Ow'omu kika eky'Abayuda, ni Nahashoni mutabane wa Amminadabu.

⁸ Ow'omu kika eky'Abaissakari, ni Nethaneli mutabane wa Zuari.

⁹ Ow'omu kika eky'Abazebuluni, ni Eliabu mutabane wa Heloni.

¹⁰ Ow'omu kika eky'Abaefuraimu, ekika ekyava mu baana ba Yosefu, ni Elishama mutabane wa Ammihudi. Ow'omu kika eky'Abamanasse, ni Gamalieli mutabane wa Pedahazuri.

¹¹ Ow'omu kika eky'Ababenjamini, ni Abidani mutabane wa Gideoni.

¹² Ow'omu kika eky'Abadani ni Ahiezeri mutabane wa Ammishaddai.

¹³ Ow'omu kika eky'Abasheri ni Pagieli mutabane wa Okarani.

¹⁴ Ow'omu kika eky'Abagadi ni Eliasafu mutabane wa Deueli.

¹⁵ Ow'omu kika eky'Abanafutali ni Ahira mutabane wa Enani.

¹⁶ Abo n'abakulembeze abaalondebwa okuva mu bantu boonaboona Abaisiraeli, era nga n'abakulu ab'ebika eby'Abaisiraeli.

¹⁷ Musa ni Aaroni baatwala abantu abo aboogeirwaku,

¹⁸ baayeta abantu boonaboona Abaisiraeli beesololeza ghalala ku lunaku olusooka mu mwezi ogwokubiri. Baaghandiika amaina ag'abantu boonaboona mu bika byaibwe ni mu nda dhaibwe, abaali bagheza emyaka amakumi abiri n'okusingagho.

¹⁹ Kale atyo Musa yaaghandiika abantu era yaababalira mu irungu ery'e Sinai nga Musengwa Katonda bweyamulagira.

²⁰ Amaina ag'abantu abaali nga bagheza emyaka amakumi abiri n'okusingagho, abaali basobola okulwana mu lutalo, gaaghandiikibwa nga gajiira ku bika byaibwe ni ku nda dhaibwe. Baatoolera n'ab'ekika kya Reubeni mutabane wa Yakobo omuberi, obungi bwaibwe nga bwaga buti:

²¹ Abareubeni baali emitwalo ena na kakaaga na bitaanu (46,500).

²² Abasimeoni

²³ baali emitwalo etaanu na kenda na bisatu (59,300).

²⁴ Abagadi

²⁵ baali emitwalo ena n'enkumi itaanu na lukaaga n'ataanu (45,650).

²⁶ Abayuda

²⁷ baali emitwalo musanvu n'enkumi ina na lukaaga (74,600).

²⁸ Abaissakari

²⁹ baali emitwalo etaanu n'enkumi ina na bina (54,400).

³⁰ Abazebuluni

³¹ baali emitwalo etaanu na kasanvu na bina (57,400).

³² Abantu abaava mu Yosefu ab'ekika eky'Abaefuraimu

³³ baali emitwalo ena na bitaanu (40,500).

³⁴ Abamanasse

³⁵ baali emitwalo esatu n'enkumi ibiri na bibiri (32,200).

³⁶ Ababenjamini

³⁷ baali emitwalo esatu n'enkumi itaanu na bina (35,400).

³⁸ Abadani

³⁹ baali emitwalo mukaaga n'enkumi ibiri na lusanvu (62,700).

⁴⁰ Abasheri

⁴¹ baali emitwalo ena na lukumi na bitaanu (41,500).

⁴² Abanafutali

⁴³ baali emitwalo etaanu n'enkumi isatu na bina (53,400).

⁴⁴ Abo Musa ni Aaroni be baabala nga bayambibwaku abakulembeze mu Isiraeli eikumi n'ababiri. Buli mulala ku abo yali nga n'akulembera ekika kye.

⁴⁵ Kale Abaisiraeli boonaboona abaali bagheza emyaka amakumi abiri n'okusingagho, era abaali basobola okulwana mu lutalo, nga baabalibwa nga bajiira ku nda dha baiseibwe,

⁴⁶ baali emitwalo nkaaga n'enkumi isatu na bitaanu n'ataanu (603,550).

⁴⁷ Aye Abalevi tibaabalibwa ghalala na bika bindi,

⁴⁸ kuba Musengwa Katonda yakoba Musa ati:

⁴⁹ “Ab'ekika ky'Abalevi otababala, era obungi bwaibwe otabugaita ku bwa Baisiraeli banaibwe.

⁵⁰ Aye oidha kubagha ogw'okulabiriranga Weema ey'Okwagaananirangamu ni Musengwa Katonda, n'ebikozesebwamu byonabyona. Baidha kugibbeedanga okugitwala n'ebikozesebwamu byonabyona, n'okukolanga emirimo gyamu. Era baidha kusimbanga eweema dhaibwe okugyezungulula.

⁵¹ Buli lwe munaagisengulanga, Abalevi n'abanaagisimbulangagho, era buli ghe munaagisimbanga, Abalevi n'abanaagisimbangagho. Atali Mulevi bw'anaagiseetangaku aidha kwitibwanga.

⁵² Abaisiraeli abandi boonaboona baidha kusimbanga weema dhaibwe mu bibbuututu buli muntu mu kikunsu kye aghali bendera yaakyo.

⁵³ Aye Abalevi baidha kusimbanga weema dhaibwe okwezungulula Weema ey'Okwagaananirangamu ni Musengwa Katonda, olwo Abaisiraeli balobe kusungughalirwa. Era Abalevi n'abanaabanga n'obuvunaanizibwa ku Weema ey'Okwagaananirangamu ni Musengwa Katonda.”

⁵⁴ Kale Abaisiraeli abo baakola byonabyona Musengwa Katonda bye yalagira Musa.