Nehemia 9 - Baibuli Ekibono kya Katonda 2014

Abantu baatula ebibi byaibwe

¹ Ku lunaku olwamakumi abiri n'eina (24) olw'omwezi gwene ogwo, Abaisiraeli beesoloza, baasiiba nga tibaliire, nga bavaire ekutiya era nga beefuse n'enkungu mu mitwe, olw'ebibi byaibwe okubanakughaza.

² Agho Abaisiraeli abo, nga beeyawire ku bamaghanga agandi, baayemerera okwatula ebibi byaibwe n'ebyonoono bya badhaadha baibwe.

³ Baayemerera batyo okumala esaawa ng'oti isatu, nga bawulirisa Amateeka ga Musengwa Katonda waibwe ge baali bali kubasomera. Baamala esaawa ng'oti isatu edhindi nga baatula ebibi byaibwe era nga basinza Musengwa Katonda waibwe.

⁴ Abalevi bano: Yeshua, Bani, Kadimieli, Shebania, Bunni, Sherebia, Bani, ni Kenani, baayemerera ku madaala g'Abalevi, baasaba Musengwa Katonda waibwe mu mamiro ag'amaani.

⁵ Agho Abalevi bano: Yeshua, Kadimieli, Bani, Hashabuneia, Hodia, Shebania, ni Pethahia, baakoba abantu bati: “Mwemerere musaake Musengwa Katonda waimwe; mumusaakenga ebyanda n'ebyanda. Eriina lye ery'ekitiisa lisaakibwenga, eriswikiriire okusaaka okw'abantu kwonakwona.”

⁶ Ezera yaakoba ati: “Wo Musengwa Katonda, niiwe wenka eyatonda eigulu, n'ebiri ghaigulu mu ibbanga byonabyona. Niiwe eyatonda ensi n'ebigirimu byonabyona. Waatonda n'enhandha n'ebigirimu byonabyona, era byonabyona waabigha obulamu. Ebiri mu igulu byonabyona bikusinza.

⁷ Niiwe Musengwa Katonda, Katonda oyo eyalonda Aburamu, n'omutoola mu Uri ensi ey'Abakaladea, n'omutuuma Aburahamu.

⁸ Wamubona ng'omwoyo gwe mwesigwa y'oli, waakola naye endagaano. Waasuubiza okugha baidhukulu be, ensi ey'Abakanaani, n'Abahitti, n'Abamori, n'Abaperizzi, n'Abayebusi, n'Abagirigashi. Era waatuukiriza kye wasuubiza, kuba oli mutukuvu.

⁹ Wabona okudaazibwadaazibwa kwa badhaadha baife nga bali mu Misiri, era waabawulira bwe baakulirira nga bali ku Nhandha Emyufu.

¹⁰ Wakola ebyewuunhio n'ebyewuninkiriza eri kyabazinga w'e Misiri, n'eri abakungu be boonaboona, n'abantu b'omu nsi ye, kuba wamanha nga bwe baatuntuza badhaadha baife. Agho weekolera eriina erikaaligho ni ye buli eno.

¹¹ Waleetera amaadhi g'enhandha okweyawulamu aghabiri, Abaisiraeli baabita ghagati mu nhandha ku itaka eikalu. Abo abaali bali kubabingirira waabasuula mu maadhi amaleeyi, ng'oti n'amabaale bwe gadimira mu maadhi amangi einho.

¹² Omusana wabakulemberangamu ng'oli mu kire ekiri ng'oti mpango ate obwire waabanga mu muliro oguli ng'oti mpango, okubamuliikirira engira ye babe babitemu.

¹³ Wava mu igulu waika ku lusozi Sinai, waayogera nabo, waabagha endhegeresa entuufu, ey'amateeka n'ebiragiro eby'amazima.

¹⁴ Wabeegeresa okukuumanga olunaku lwo olwa Sabbato nga lutukuvu, waabagha ebiragiro byo n'amateeka go ng'obita mu mugheereza wo Musa.

¹⁵ Wabagha emere okuva mu igulu okubawonia endhala, era waabagha amaadhi okuva mu lubaale okubawonia endiwo. Waabakoba baje batoole ebiketezo bye wasuubiza okubagha, bibe ebyaibwe ku bwaibwe.

¹⁶ Aye badhaadha baife beekuluntaza, baakalangusa emyoyo gyaibwe, baaloba kugondera biragiro byo.

¹⁷ Baaloba kuwulira na kwidhukira ebyewuninkiriza bye wabakolamu. Baakalangusa bwa myoyo gyaibwe, baataagho omuntu abakulembere abaizeeyo mu bwiru e Misiri. Aye iwe oli Katonda asonigha, ekiseera kyonakyona. Oli wa kivunika, osaasira, era olwagho okusungughala. Era olw'okuba iwe obagonza inho obutalekera, tiwabalekulira agho.

¹⁸ Beekolera ekifaananie eky'ente ento enume mu kyuma ekisaanuusiibwa, baakoba bati: ‘Isiraeli, ono ni katonda wo eyakutoola mu Misiri.’ Era baakola ebintu kamaala ebikunhoomesa.

¹⁹ Aye iwe olw'okusaasira kwo okungi tiwabalekulira agho nga bali mu irungu. Tiwabatoolaku kire ekiri ng'oti mpango, ekyabakulemberangamu omusana, waire okubatoolaku omuliro oguli ng'oti mpango, ogwabamuliikiriranga obwire engira ye babe babitemu.

²⁰ Wabagha omwoyo gwo omulungi gubagalagirenga eky'okukola. Tiwalekeraku kubaghanga mannu kulya, era waabaghanga amaadhi okubawonia endiwo.

²¹ Wabakuuma okumala emyaka amakumi ana (40) nga bali mu irungu, nga ghazira kye badhulirira. Ebivaalo byaimwe tibyakairighaku waire ebigere okubazimbaku.

²² Wabagha okughangula bakyabazinga n'amaghanga agandi agabeezungulwire. Baatwala ensi ya Sihoni kyabazinga w'e Heshiboni, n'eya Ogi kyabazinga w'e Bashani, dhaaba dhaibwe ku bwaibwe.

²³ Wabagha abaidhukulu kamaala, baayala ng'oti n'emuunienie edh'oku igulu, waabatuusa mu nsi ye wakoba badhaadha baibwe batwale ebe eyaibwe ku bwaibwe.

²⁴ Kale abaidhukulu abo bangira mu nsi eyo, baagitwala yaaba yaibwe ku bwaibwe. Waabaghangulira Abakanaani abaali abatyamye baamu. Bakyabazinga Abakanaani n'abantu baibwe, waabata mu ngalo dh'abaidhukulu abo, okubakola kye benda.

²⁵ Abaidhukulu abo baanhaga ebibuga ebyezungulwirwa ebimante ebigumu baatoola eitaka eigimu n'endhu edhiidhwire ebintu ebirungi; baatoola ensulo ensime, amasamba ag'emizabbibu, n'ag'emiti emyoliva, n'ag'emiti egindi egy'ebibala kamaala. Kale baalyanga baigutanga era baageedha, beesanhukiza ku birungi ebingi bye wabagha.

²⁶ Aye abantu bo abo baakudheemera, baalobanga kukuwulira, baava ku Mateeka go. Baita abalanzi bo abaabalabulanga okubakyusa baire y'oli. Baakola ebintu kamaala ebikuvumagania.

²⁷ Kye wava n'obaghaayo mu ngalo edh'abazigu baibwe, abaabadaazadaaza. Nga bali mu kudaagadaaga batyo, baakulirira, waabawulira ng'oli mu igulu. Era olw'okusaasira kwo okungi einho, waabagheerezanga abanunuzi abaabanunulanga okuva mu ngalo dh'abazigu baibwe.

²⁸ Bwe baafunangamu emiraala, nga kabiri bairamu okwonoona. Era waabalekuliranga agho, abazigu baibwe baabafuganga. Ate bwe baakyukanga ni bakulirira, waabawuliranga ng'oli mu igulu. Emikuzi kamaala waabanunulanga olw'okusaasira kwo okutaloodheka.

²⁹ Waabalabulanga, basobole okukyuka bagondere amateeka go. Aye beekuluntaza, baaloba kugondera biragiro byo, baakola bukole bibi. Ate nga mu kutuukiriza ebiragiro omuntu mw'afunira obulamu. Aye baakolanga bwa mpwitu era baakalangusanga emyoyo gyaibwe, baaloba kukugondera.

³⁰ Waabaguminkiriza emyaka kamaala, era waata omwoyo gwo mu balanzi bo baje babalabule, aye nga basembye amatu gaibwe. Kyewava n'obaghaayo mu ngalo edh'abamaghanga agandi.

³¹ Aye era olw'okusaasira kwo okutaloodheka, tiwabalekulira agho waire okubazikiriza, kuba oli Katonda wa kivunika era asaasira.

³² Wo Katonda waife omukologho, oli w'amaani era wa ntiisa. Iwe okuuma endagaano era waagonza abantu obutakoma. Agho ni, ebizibu byonabyona ebyatwidhira, ife ni bakyabazinga baife, n'abakungu baife, ni bakabona baife, n'abalanzi baife, ni badhaadha baife, n'abantu bo boonaboona, okuviira irala ku byanda bya bakyabazinga ba Assiria, okutuusa ni ye buli eno, otabitwala ng'ekintu ekitono.

³³ Aye ate, mu byonabyona ebyatutuukaku, iwe wali mutuufu okutubonereza, kuba iwe wasigala ng'oli mwesigwa, aye ife twayonoona bwonoone.

³⁴ Bakyabazinga baife, n'abakungu baife, ni bakabona baife, ni badhaadha baife, tibaagemanga Mateeka go, oba okujiiranga ku biragiro byo, waire okufangayo ku kulabula kwo.

³⁵ Tibaakyuka ni bava ku bibi byaibwe kukugheereza, waire nga mu bwakyabazinga bwaibwe wabagha ebirungi kamaala, baaba mu ensi engazi era engimu.

³⁶ Bona, mperaano tuli bairu bwiru mu nsi ye wagha badhaadha baife okubangamu n'okulyanga ebibala byamu, n'ebirungi ebindi ebigirimu byonabyona.

³⁷ Bakyabazinga be wataagho okutufuganga, n'abatwala ebyo ebiva mu nsi eyo, olw'okuba twayonoona. Bali n'obuyinza okukola kye benda ku byayo byaife ni ku ife beene. Kale tuli mu bughafu obutoogerekeka.”

Abantu bakola endagaano

³⁸ “Olw'ebyo byonabyona, kyetuva tuli kukola endagaano enkakafu mu bughandiike. Era abakungu baife, n'Abalevi baife, ni bakabona baife, bagitaireku ebinkumu byaibwe.”