Nehemia 8 - Baibuli Ekibono kya Katonda 2014

Ezera asomera abantu Amateeka

¹ Agho Abaisiraeli boonaboona nga bali kitole, beesololeza mu luya emberi gh'ogwetebwa Omulyango ogw'Amaadhi. Baakoba Ezera omunamateeka aleete Ekitabo ky'Amateeka, Musengwa Katonda ge yagha Isiraeli ng'abita mu Musa.

² Kale ku lunaku olusooka olw'omwezi ogwomusanvu, Ezera kabona yaaleeta Ekitabo ekyo mu kifo abantu boonaboona, abasaadha, abakazi, n'abantu abandi boonaboona abaali nga basobola okutegeera, ghe baali nga beesololeiza.

³ Yaakibasomera boonaboona okuva ku nkyo okutuusa mu kasana ghagati, ng'alingiriire y'oluya oluli emberi gh'Omulyango ogw'Amaadhi. Era boonaboona baatega amatu okuwulirisa ebiva mu Kitabo ekyo eky'Amateeka.

⁴ Ezera oyo, eyali omunamateeka, yaayemerera ku kituuti kye baakola mu mbaawo olw'omukolo ogwo. Era agho okumpi naye, ku luuyi lwe olw'omukono omusaadha ghaayemereragho, Mattithia, Shema, Anaia, Uria, Hilikia, ni Maaseia. Ate ku luuyi lwe olw'omukono omugooda, ghaayemereragho bano: Pedaia, Mishaeli, Malikiya, Hashumu, Hashibaddana, Zekaria, ni Meshullamu.

⁵ Agho Ezera yaabwikula ekitabo ng'abantu boonaboona babona, kuba yali ghaigulu ghaibwe boonaboona. Olwakibwikula ati, abantu boonaboona baayemerera.

⁶ Ezera oyo yaasaaka Musengwa Katonda, Katonda omukologho. Abantu boonaboona bairamu bati: “Amiina, Amiina,” nga basituliire emikono gyaibwe ghaigulu. Era baakuba amakiryaivu, baakutama n'ebyeni byatuuka ku itaka, baasinza Musengwa Katonda.

⁷ Agho abantu baasigala mu bifo byaibwe, Yeshua, ni Bani, ni Sherebia, ni Yamini, ni Akkubu, ni Shabbethai, ni Hodia, ni Maaseia, ni Kelita, ni Azaria, ni Yozabadi, ni Hanani, ni Pelaia, n'Abalevi, bainhonhola abantu abo amateeka.

⁸ Baasoma mu Kitabo eky'Amateeka ga Katonda mu nsambo etegeerekeka obukalamu, era nga bagha n'amakulu agalimu, abantu boonaboona baategeera ebisomeibwa.

⁹ Abantu bwe baawulira Amateeka bye gabalagira okukola, boonaboona baalira amaziga. Kale Nehemia eyali omufuzi w'ekiketezo ekyo, ni Ezera kabona era omunamateeka, n'Abalevi abaayegeresa abantu Amateeka, baabakoba bati: “Olunaku luno lwa Musengwa Katonda waimwe era lutukuvu. Kale ni mulobe kunakughala waire okulira amaziga.

¹⁰ Buti mwireyo ewaimwe, mulye ebisavu, munhwe omwenge ogw'emizabbibu oguwooma einho, era mugabireku n'abo abazira ghe batoola kuba olunaku lwa Musengwa Katonda waife luno lutukuvu. Agho ni mutanakughala, kuba eisanhu Musengwa Katonda ly'abagha imwe, n'eribaleetera okuba ab'amaani.”

¹¹ Kale Abalevi baawooyawooya abantu nga babakoba bati: “Mube baikaikamu kuba luno olunaku lutukuvu, mutanakughala.”

¹² Agho abantu boonaboona baagolola ewaibwe, baalya, baanhwa, era baagabiraku n'abo abazira ghe batoola. Baaba mu kusagamba okw'amaani olw'okuba baategeera ebibono bye baabakoba.

Ekibinuko eky'Entindi

¹³ Ku lunaku olwairirira, abakulu ab'enda dha balata b'abantu boonaboona, ghalala ni bakabona n'Abalevi, baidha ye Ezera omunamateeka okwega ebiri mu mateeka.

¹⁴ Baazuula nga kyaghandiikibwa mu Mateeka, Musengwa Katonda ge yagha ng'abita mu Musa, kiti Abaisiraeli bali n'okusulanga mu ntindi mu kiseera eky'ekibinuko eky'omu mwezi ogwomusanvu.

¹⁵ Era baazuula nga bali n'okulangirira bamanhise ab'omu bibuga byaibwe byonabyona ni mu Yerusalemu bati: “Muje mu nsozi muleete ensaga edh'emiti emyoliva, egyo gye baasimba obusimbe n'egyo egyamera gyene, n'ensaga edh'emiti eminaazi, n'edh'emiti egindi egy'amakaba amangi, muzimbise entindi, nga bwe kyaghandiikibwa.”

¹⁶ Kale abantu baaja baaleeta ensaga edho, baazimba entindi ku ngulu kw'endhu dhaibwe, ni mu mpya dhaibwe, ni mu luya olw'eisinzizo lya Katonda, ni mu luya oluli gha Mulyango ogw'Amaadhi, ni mu luya oluli gha Mulyango ogw'Efuraimu.

¹⁷ Abantu boonaboona abaira okuva mu bunhage, baazimba entindi, baadhisulamu. Guno n'ogwali omukuzi ogusooka okukola batyo, okuviira irala mu biseera bya Yoshua mutabane wa Nuni. Kale ghaabaagho okusagamba okw'amaani.

¹⁸ Buli lunaku, okuva ku lwasooka mu kibinuko ekyo okutuuka ku lwasembayo, baasomanga ekitundu okuva mu Kitabo eky'Amateeka ga Katonda. Baaba ku kibinuko okumala enaku musanvu, ate ku lw'omunaana beesoloza okusinza Katonda, ng'Amateeka bwe galagira.