Nehemia 7 - Baibuli Ekibono kya Katonda 2014

¹ Ekimante bwe kyawa okuzimbibwa era nga mmaze n'okutaamu endhigi dhaamu, naataagho abakuumi b'emiryango, n'abembi, era naagha n'Abalevi abandi emirimo gyaibwe egy'okukolanga.

² Agho naataagho muganda wange Hanani ni Hanania omufuzi eyakuliranga ekifo eky'okwewogomamu, naabagha obukumu okulabiriranga Yerusalemu. Hanania oyo yali mwesigwa era nga atya Katonda okusinga abantu abandi boonaboona.

³ Naabakoba nti: “Mutalagiranga kwigulagho miryango gya Yerusalemu nkyo, okutuusa ng'akasana kali kwebbalangula. Era mulagirenga bagiigale bagisibe ng'abakuumi bakaakuma. Mutengagho abakuumi nga mubatoola mu batyamye b'omu Yerusalemu mwene omwo, bakuumenga mu mpalo, nga buli mukuumi akuuma ekiketezo ekiri emberi w'endhu ye.”

Olukalala olw'abantu abaira okuva mu bunhage

⁴ Ekibuga Yerusalemu kyali kinene era nga kigazi, aye ng'abantu abakirimu batono era nga n'endhu dhe baakazimbamu ti nhingi.

⁵ Katonda yanta mu mwoyo ekirowoozo, nkobe abakungu n'abakulembeze b'abantu, n'abantu abandi boonaboona, beesoloze beeghandiise ng'obuzaale bwaibwe bwe bwali. Era naazuula ekitabo kye baaghandiikamu obuzaale bw'abo abaasooka okuva mu bunhage nga kirimu bino:

⁶ Gano n'amaina ag'abantu ab'omu kiketezo eky'e Buyudaaya abaira nga bava e Babilonia mu bunhage, kyabazinga waayo Nebukadinezzari ye yali abatwaire nga basibe. Abantu abo baira e Yerusalemu n'e Buyudaaya, buli muntu ng'airayo mu kibuga eky'ewaibwe.

⁷ Abakulembeze baibwe baali bano: Zerubbabeli, Yeshua, Nehemia, Azaria, Raamia, Nahamani, Morodekai, Bilishani, Misiperethi, Bigivai, Nehumu, ni Baana. Guno n'omughendo ogw'Abaisiraeli abaira okuva mu bunhage:

⁸ Ab'oku nda ya Paroshi baali enkumi babiri na kikumi na nsanvu na ibiri (2,172);

⁹ ab'oku nda ya Shefatia baali ebikumi bisatu na nsanvu na babiri (372);

¹⁰ ab'oku nda ya Ara baali lusanvu na nsanvu na bataanu (775);

¹¹ ab'oku nda ya Pahathimoabu, batane ba Yeshua ni Yoabu baali enkumi ibiri na lunaana na ikumi na babiri (2,812);

¹² ab'oku nda ya Elamu baali lukumi na bibiri n'ataanu na bana (1,254);

¹³ ab'oku nda ya Zattu baali lwenda na bina n'ana na bataanu (945);

¹⁴ ab'oku nda ya Zakkai baali lusanvu na nkaaga (760);

¹⁵ ab'oku nda ya Bani baali lukaaga na bina na babiri (642);

¹⁶ ab'oku nda ya Bebai baali lukaaga na bibiri na basatu (623);

¹⁷ ab'oku nda ya Azigadi baali lukumi na bibiri n'abiri na babiri (1,222);

¹⁸ ab'oku nda ya Adonikamu baali lukaaga na nkaaga na mukaaga (666);

¹⁹ ab'oku nda ya Bigivai baali enkumi ibiri n'ataanu na mukaaga (2,056);

²⁰ ab'oku nda ya Adini baali ebikumi bina n'ataanu na bana (454);

²¹ ab'oku nda ya Ateri, oyo era nga ni Hezekia, baali Kyenda na munaana (98);

²² ab'oku nda ya Bezai baali ebikumi bisatu n'abiri na basatu (323);

²³ ab'oku nda ya Yora baali kikumi na ikumi na babiri (112);

²⁴ ab'oku nda ya Hushumu baali ebikumi bibiri n'abiri na basatu (223);

²⁵ ate ab'oku nda ya Gibbari baaba kyenda na bataanu (95).

²⁶ Abantu ab'e Bethelehemu n'ab'e Netofa baali kikumi na kinaana na munaana (188);

²⁷ abantu ab'e Anathothi baali kikumi n'abiri na munaana (128);

²⁸ abantu ab'e Bethi Azimavethi baali amakumi ana na babiri (42);

²⁹ abantu ab'e Kiriathi Yearimu, n'ab'e Kefira, n'ab'e Beerothi, baali lusanvu n'ana na basatu (743);

³⁰ abantu ab'e Rama n'ab'e Geba baali lukaaga n'abiri na mulala (621);

³¹ abantu ab'e Mikimasi baali kikumi n'abiri na babiri (122);

³² abantu ab'e Betheli n'ab'e Ayi baali ebikumi bibiri n'abiri na basatu (223);

³³ abantu ab'e Nebo kire ekindi baali amakumi ataanu na babiri (52);

³⁴ abantu ab'e Elamu kire ekindi baali lukumi na bibiri n'ataanu na bana (1,254);

³⁵ abantu ab'e Harimu baali ebikumi bisatu n'abiri (320);

³⁶ abantu ab'e Yeriko baali ebikumi bisatu n'ana na bataanu (345);

³⁷ Abantu ab'e Lodi, n'ab'e Hadida, n'ab'e Ono, baali lusanvu n'abiri na mulala (721);

³⁸ ate abantu ab'e Senaa baaba enkumi isatu na lwenda n'asatu (3,930).

³⁹ Mu baira okuva mu bunhage, mwalimu bakabona bano: Ab'oku nda ya Yedaia nga basimuka mu Yeshua baali lwenda na nsanvu na basatu (973);

⁴⁰ ab'oku nda ya Immeri baali lukumi n'ataanu na babiri (1,052);

⁴¹ ab'oku nda ya Pashuhuri baali Lukumi na bibiri n'ana na musanvu (1,247);

⁴² ate ab'oku nda ya Harimu baaba lukumi na ikumi na musanvu (1,017).

⁴³ Mu baira okuva mu bunhage mwalimu Abalevi bano: Ab'oku nda ya Yeshua, n'ab'oku nda ya Kadimieli, nga basimuka mu Hodavia, baali nsanvu na bana (74).

⁴⁴ Abembi b'omu isinzizo baali ba ku nda ya Asafu, era baali kikumi n'ana munaana (148).

⁴⁵ Abakuumi b'emiryango gy'eisinzizo baali, ba ku nda ya Shallumu, n'ab'oku ya Ateri, n'ab'oku ya Talumoni, n'ab'oku ya Akkubu, n'ab'oku ya Hatita, n'ab'oku ya Shobai boonaboona aghalala baaba kikumi n'asatu na munaana (138).

⁴⁶ Abagheereza b'omu isinzizo baali, ba ku nda ya Ziha, n'ab'oku ya Hasufa, n'ab'oku ya Tabbaothi;

⁴⁷ ab'oku nda ya Kerosi, n'ab'oku ya Sia, n'ab'oku ya Padoni;

⁴⁸ ab'oku nda ya Lebana, n'ab'oku ya Hagaba, n'ab'oku ya Shalimai;

⁴⁹ ab'oku nda ya Hanani, n'ab'oku ya Giddeli, n'ab'oku ya Gahari;

⁵⁰ ab'oku nda ya Reayia, n'ab'oku ya Rezini, n'ab'oku ya Nekoda;

⁵¹ ab'oku nda ya Gazzamu, n'ab'oku ya Uzza, n'ab'oku ya Pasea;

⁵² ab'oku nda ya Besai, n'ab'oku ya Meunimu, n'ab'oku ya Nefushesimu;

⁵³ ab'oku nda ya Bakubuku, n'ab'oku ya Hakufa, n'ab'oku ya Harihura;

⁵⁴ ab'oku nda ya Bazalithi, n'ab'oku ya Mehida, n'ab'oku ya Harisha;

⁵⁵ ab'oku nda ya Barakosi, n'ab'oku ya Sisera, n'ab'oku ya Tema;

⁵⁶ n'ab'oku nda ya Nezia, n'ab'oku ya Hatifa.

⁵⁷ Mu baira okuva mu bunhage mwalimu abagheereza aba Solomoni bano: Ab'oku nda ya Sotai, n'ab'oku ya Soferethi, n'ab'oku ya Perida;

⁵⁸ ab'oku nda ya Yaala, n'ab'oku ya Darikoni, n'ab'oku ya Giddeli;

⁵⁹ ab'oku nda ya Shefatia, n'ab'oku ya Hattili, n'ab'oku ya Pokerethi, n'ab'oku ya Hazzebaimu, n'ab'oku ya Amoni.

⁶⁰ Abagheereza b'omu isinzizo n'abagheereza aba Solomoni boonaboona aghalala baali ebikumi bisatu na kyenda na babiri (392).

⁶¹ Mu baira okuva mu bunhage mwalimu abaava e Telimela, n'e Teliharisha, n'e Kerubu, n'e Addoni, n'e Immeri aye ng'abantu abo tibeekakasa nda dha baiseibwe dhe baavaaku, waire okukakasa nga Baisiraeli beenebeene.

⁶² Abantu abo ni bano: Ab'oku nda ya Delaia, n'ab'oku ya Tobia, n'ab'oku ya Nekoda. Abo boonaboona aghalala baali lukaaga n'ana na babiri (642).

⁶³ Ghaligho n'abandi abaali abaana ba bakabona, nga ni bano: Ab'oku nda ya Habaia, n'ab'oku ya Hakkozi, n'ab'oku ya Barazillai, ye baatuuma eriina eryo olw'okuba yafumbirwa owundi ku baghala ba Barazillai Omugileadi.

⁶⁴ Abantu abo baabanoonia mu nkalala dh'obuzaale aye nga tibabonekamu, kale baabalekeza okukola nga bakabona, nga batwalibwa ng'abatali balongoofu.

⁶⁵ Eyali omufuzi mu kiseera ekyo yaabalobera okulyanga ku bigheebwayo eri Katonda okutuusa nga bafunie kabona aghanga okwebuuza ku Musengwa Katonda ng'akozesa Urimu ni Thummimu.

⁶⁶ Ekikunsu kyonakyona aghalala eky'abo abaira okuva mu bunhage, kyalimu abantu emitwalo ena n'enkumi ibiri na bisatu na nkaaga (42,360).

⁶⁷ Abagheereza abasaadha n'abakazi be baira nabo baali, kasanvu na bisatu na n'asatu na musanvu (7,337). Baira n'abembi abasaadha n'abakazi ebikumi bibiri n'ana na bataanu (245).

⁶⁸ Baira n'embalaasi dhaibwe lusanvu n'asatu na mukaaga (736), n'enhumbu ebikumi bibiri n'ana na itaanu (245),

⁶⁹ n'engamiya ebikumi bina n'asatu na itaanu (435), n'endogoyi kakaaga na lusanvu n'abiri (6,720).

⁷⁰ Agho abandi ku bakulu b'endhu dha baiseibwe baaghaayo ebintu eby'okukola omulimo ogw'okuzimba. Omufuzi w'omu kiketezo ekyo yaaghaayo: kilo munaana (8) edha zaabu, n'ebbakuli amakumi ataanu (50), n'ebivaalo bya bakabona ebikumi bitaanu n'asatu (530).

⁷¹ N'abandi ku bakulu b'endhu dha baiseibwe baaghaayo: kilo kikumi na nkaaga na munaana (168) edha zaabu, ni kilo lukumi na bibiri n'ataanu (1,250) edha feeza.

⁷² Abantu boonaboona abaasigalagho baaghaayo: kilo kikumi na nkaaga na munaana (168) edha zaabu, ni kilo kikumi n'ana (140) edha feeza, n'ebivaalo bya bakabona nkaaga na musanvu (67).

⁷³ Kale bakabona n'Abalevi, n'abaigazi b'emiryango, n'abembi, n'abandi ku bantu ababuliidho, n'abagheereza b'omu isinzizo, n'Abaisiraeli abandi, baaja baaba mu bibuga byaibwe. Era omwezi ogwomusanvu okuja okutuuka ng'Abaisiraeli abandi boonaboona bali mu bibuga byaibwe.