Nehemia 6 - Baibuli Ekibono kya Katonda 2014

Enkwe edh'okulemesa Nehemia

¹ Agho baakobera Saniballati, ni Tobia, ni Geshemu Omuwarabu, n'abazigu baife abandi boonaboona, bati namala okuzimba ekimante ekyo, era nga tikikaalimu bituli aye nga mu butuufu, mu kiseera ekyo nali nkaali kuta ndhigi mu miryango.

² Saniballati ni Geshemu bampeereza obukwenda nga bakoba bati: “Idha twagaanane mu kyalo ekirala ku ebyo ebiri mu kiketezo eky'oku museetwe ogwetebwa Ono.” Aye nga baali n'ekigendererwa kyaibwe kya kunkola kabi.

³ Naabagheereza abakwenda nga mbakoba nti: “Tighanga kwidha eyo, kuba omulimo gwe ndiku mukologho. Ndeka ntya omulimo ni gwemerera mbu kuba ndi kwidha eyo ye muli?”

⁴ Bampeereza obwo batyo emikuzi ena, era zeena nga mbairamu mu nsambo n'endala.

⁵ Agho Saniballati yaatuma omugheereza we mu nsambo n'endala eyo omukuzi ogwokutaanu, yaidha ng'ali n'embaluwa mu ngalo etali nsibe yaaku.

⁶ Embaluwa eyo yagighandiika ati: “Abamaghanga agandi bakoba, era ni Geshemu yeena yaakikakasa ati, iwe n'Abayudaaya muli kwetegeka kudheema. Kyemuva muli kuzimba ekimante ekyo. Era akoba ati iwe oli kwenda kufuuka kyabazinga waibwe,

⁷ era otairegho abalanzi akulangirira mu Yerusalemu bati niiwe kyabazinga wa Buyudaaya. Kale ni idha tugheedhagane amagezi ku nsonga eyo, kuba abantu tibaalobe kugikoberaku kyabazinga.”

⁸ Agho naabagheereza obukwenda nga bukoba buti: “Ghazira ku ebyo byonabyona bye muli kukoba, kyali kibaireghooku naire, muli kubipaatiikagho bupaatiike imwe beene.”

⁹ Baali bali kugezaaku bwa kututiisa nga badhuuba bati ekyo kinaatunafuya, twalekera agho okukola. Aye naasaba nti: “Wo Katonda wange nhongera amaani.”

¹⁰ Agho naajaaku mu ndhu ya Shemaia mutabane wa Delaia era nga mwidhukulu wa Mehetabela, eyali nga taikirizibwa kuva agho. Yankoba ati: “Tuje tweigalize mu Kifo Ekitukuvu, mu isinzizo lya Katonda, kuba baidha kwidha bakwite. Obwire baidha kwidha bakwite.”

¹¹ Aye nze naamwiramu nti: “Omuntu ng'oti ninze nsobola ntya okulumukagho ni neegisa? Era nsobola ntya okuja mu isinzizo olw'okuwonia obulamu bwange? Busa, ekyo tiidha kukikola.”

¹² Bwe nakirowoozaaku einho, naakitegeera nga Katonda ti n'eyatuma Shemaia oyo okwogera ebyo, aye nga Tobia ni Saniballati, n'abaamugula yeeyogeze ebyo abe ng'oti n'ali kundabula.

¹³ Baamugula ayogere atyo, nze ntye era nkole ekibi, olwo beene bandhogereku bubi era banswazeswaze.

¹⁴ Agho naasaba nti: “Wo Katonda wange, otasonigha Tobia ni Saniballati okusinziira ku ebyo bye bakoze, oba waire okusonigha omulanzi omukazi Noadia, n'abalanzi abandi boonaboona abaayenda okuntiisatiisa.”

Okumaliriza omulimo

¹⁵ Kale ku lunaku olwamakumi abiri n'eitaanu (25) olw'omwezi ogwetebwa Elulu, twamaliriza okuzimba ekimante ekyo. Omulimo ogwo twagukola mu nnaku amakumi ataanu na ibiri.

¹⁶ Abazigu baife boonaboona abaali mu maghanga agandi agatwezungulwire bwe baakiwulira, baatya era baaweeramu irala amaani, kuba baakimanha ng'omulimo ogwo gwawa lwa Katonda mwene kutuyamba.

¹⁷ Ate era, mu biseera ebyo abakungu Abayudaaya baaghandiikiranga Tobia embaluwa kamaala. Tobia yeena yaabairangamu.

¹⁸ Baakolanga batyo, kuba mu Buyudaaya mwalimu abantu kamaala be yasala nabo omukago, bwe yabayiza mughala wa Shekania mutabane wa Ara. Ate ni mutabane we Yehohanani yali nga yabayiza mughala wa Meshullamu mutabane wa Berekia.

¹⁹ Era abantu nga bwe baba ghe ndi, boogera ku birungi Tobaia oyo by'akola, era baamukoberanga bye nayogeranga. Agho Tobia oyo yaayongeranga okumpandiikira embaluwa okuntiisatiisa.