Nehemia 5 - Baibuli Ekibono kya Katonda 2014

Okukiriga abaavu

¹ Agho ghaabaagho abasaadha ni bakazi baibwe abeemuluguunhiza Bayudaaya banaibwe.

² Abandi nga bakoba bati: “Ife n'abaana baife tuli abantu kamaala, kale twetaaga engaano tulye tube abalamu.”

³ Ghaabaagho abandi nga bakoba bati: “Ife tuli kusinga enimiro dhaife, n'amasamba gaife ag'emizabbibu, n'endhu dhaife, okufuna engaano ey'okulya tuwone endhala.”

⁴ Ate abandi nga bakoba bati: “Twewola empiiya okusasula omusolo gwa kyabazinga ku nimiro dhaife, ni ku masamba gaife ag'emizabbibu.

⁵ Ate nga twena tuli ba musaayi mulala ni Bayudaaya banaife abo. Abaana abaife, boona baana ng'oti n'abaibwe bwe bali. Aye ife tukaka batabane baife ni baghala baife okuba abairu. Era baghala baife abandi twabatunda ira mu bwiru. Ate nga ekyo titughanga kukyebeera, kuba enimiro dhaife, n'amasamba gaife ag'emizabbibu, biri mu buyinza bwa bantu bandi.”

⁶ Bwe nawulira okwemuluguunhia kwaibwe, naasungughala inho.

⁷ Kale neebuuza mwene mule mu mwoyo eky'okukola. Agho naavumirira abakulembeze n'abakungu abo. Naabakoba nti: “Imwe muli kukamula mu baganda baimwe amagoba!” Era naayeta abantu okwesoloza, memale mbakobeku.

⁸ Agho naabakoba nti: “Tukoze inho nga bwe tusobola, twanunula baganda baife, Bayudaaya banaife, okubatoola mu maghanga agandi ye baatundibwa. Aye mperaano mwena muli kutunda baganda baife abo, ife beene tubagule!” Abakulembeze abo baasiriikirira ng'eky'okwogera kibabuze.

⁹ Naabakoba nti: “Kye muli kukola ti kirungi naire! Ekyandibagwaniire n'okutyanga Katonda waife memale olwo mwalobera abazigu baife abo abamaghanga agandi okutuyeeyerezanga.

¹⁰ Nze mwene, ni banange, n'abakozi bange, tubairenga nga tuwola abantu abo empiiya n'engaano. Nze mbeeghemba tubasonighe amagoba ago.

¹¹ Mubairize olwaleero luno ebyo bye mubaire mubakakanga babaghe: enimiro dhaibwe, n'amasamba gaibwe ag'emizabbibu, n'ag'emiti emyoliva, n'endhu dhaibwe, n'ekitundu ekirala ekirala ku buli bitundu kikumi eby'empiiya dhe bafuna, n'engaano, n'omwenge ogw'emizabbibu, n'omuzigo ogw'emiti emyoliva.”

¹² Agho abakulembeze abo baakoba bati: “Twidha kubairiza ebintu ebyo, era titukaababandha kintu kyonakyona. Twidha kukola nga bw'okobye.” Naayeta bakabona baalayiza abakulembeze abo, okukola nga bwe baasuubiza.

¹³ Era naakunkumula olusibiro lwange nga nkoba nti: “Katonda agwananga yaakunkumula atyo omuntu yeenayeena ataatuukirizenga kisuubizo ky'akoze olwaleero luno, yaamutoola mu ndhu ye ni ku mulimo gwe. Omuntu oyo akunkumulwenga, asigalenga mukaya bekayakaya.” Abantu abaali beesoloiza bairamu buti: “Amiina!” Era baasaaka Musengwa Katonda. Abantu baakola nga bwe baasuubiza.

Ekisa Nehemia kye yali nakyo

¹⁴ Mu myaka gyonagyona eikumi n'ebiri gye namala nga ndi mufuzi wa Buyudaaya, okuva mu mwaka ogwamakumi abiri (20) nga Arutazerizesi ni kyabazinga, okutuuka mu mwaka gwe ogwamakumi asatu n'ebiri (32), nze waire baganda bange, ghazira yalya ku mere eyandibaire esalirwa abantu okugireetera omufuzi.

¹⁵ Abafuzi abansooka okufuga Buyudaaya, baakaluubirizanga abantu nga babasalira okuleeta emere, n'omwenge ogw'emizabbibu, n'ebitundu bya feeza amakumi ana (40). Ate n'abagheereza b'abafuzi abo, boona baakaluubirizanga abantu. Aye nze nga tikola ntyo, kuba nga ntya Katonda.

¹⁶ Nze neefubirizanga ku mulimo gwa kuzimba kimante kino gwonka, naaloba kwegulira kibandha. N'abagheereza bange boonaboona beemalira ku kukolanga mulimo ogwo ogw'okuzimba.

¹⁷ Ate nga naliisanga abantu kikumi n'ataanu (150), nga mu abo n'omuli Abayudaaya, n'abakulembeze, n'abantu abaidhanga ye tuli nga bava mu maghanga agatwezungulwire.

¹⁸ Buli lunaku nagabulanga ente enume ndala, n'entaama ensavu einho mukaaga, n'enkoko kamaala. Era enaku eikumi buli lwe dhaawangaku, nga ngabula omwenge ogw'emizabbibu omuyaaka kamaala. Aye waire ebyo byali bityo, tyasaliraku bantu kundeeteranga mere eyandibaire egheebwa omufuzi, kuba abantu abo baakakibwanga okukola ebintu kamaala ebyabakaluubirizanga.

¹⁹ Wo Katonda wange, idhukiranga ebyo byonabyona bye nkoleire abantu bano, zeena onsasulemu ebirungi.