Nehemia 4 - Baibuli Ekibono kya Katonda 2014

Nehemia aghangula abaali batakania omulimo ogwo

¹ Agho Saniballati bwe yawulira ati tuli kuzimba ekimante okwezunguluza Yerusalemu, yaasungughala inho era yaabaaku ekiruyi ekitaloodheka. Olwo yaatoolera okutuma ife Abayudaaya.

² Yaayogera ng'ali ghalala ni baine, n'eigye lya Samaria, yaakoba ati: “Katyo bano Abayudaaya abadoofu bali kugezaaku kukola ki? Basuubira okwizaagho ebintu nga bwe byali? Obwo basuubira kughaayo misengo? Obwo omulimo Banaagumala mu lunaku lulala? Obwo banaaghanga okutoola amabaale agaayonoonebwa omuliro mu mmungo edh'ebikaba, bairamu okugazimbisa?”

³ Tobia Omuammoni eyali agho naye yaakoba ati: “Bwenebwene ekimante kyaibwe ekyo eky'amabaale kye bali kuzimba, ekibe bwe kikiniinaku kimenheka bumenheke.”

⁴ Agho naasaba nti: “Wo Katonda waife, wulira bwe bali kutunhoomoola. Nkusaba ebivumo bye bali kutuvuma bibairirengaku beene. Era obagheeyo y'abazigu babanhageku ebyaibwe, babatwale mu nsi eyindi nga banhage.

⁵ Otabasonigha naire omusango gwaibwe ogwo, waire okwerabira ekibi kyaibwe ekyo, kuba bakusoononkereiza, baakusungughaza mu maiso gaife abali kuzimba.”

⁶ Kale tweyongera okuzimba ekimante, twaja nga tukiyunga ghalala kyonakyona okwezungulula, twakituusa ghagati mu kuja ghaigulu kuba abantu baali n'omwoyo ogwenda okukola.

⁷ Aye Saniballati, ni Tobia, n'abantu ab'e Buwarabu, n'ab'omu Ammoni, n'ab'omu Ashidodi, bwe baawulira bati omulimo ogw'okulongoosa ekimante ekyezungulula Yerusalemu guli kuja mu maiso, era ng'abazimbi batooleire n'okusemba mu bituli ebyali mu kimante ekyo, baasungughala inho.

⁸ Era boonaboona beekobaana okulumba Yerusalemu, bakireetemu okutabukatabuka.

⁹ Aye twasaba Katonda waife era twataagho abakuumi omusana n'obwire okutangira abazigu abo.

¹⁰ Abantu ab'omu Buyudaaya baakoba bati: “Abantu ababbeeda ebizito amaani gali kuja nga gabawaamu, ate ng'ebifunfugu bikeebunze agho! Kale titukaaghanga kuzimba kimante.”

¹¹ Abazigu baife beekobaana bati: “Tibaidha kumanha era tibaidha kubona, okutuusa bwe tunaabatuukamu ni tubaita, ni tulekeza omulimo ogw'okuzimba okuja mu maiso.”

¹² Abayudaaya abaabanga aghalala n'abazigu baife, nga baidha emikuzi kamaala baatukoba bati: “Abazigu baife baidha kuva mu bifo yoonayoona ye baba, baidhe batulumbe.”

¹³ Kale buli inhuma gha kimante, ghe kyali nga kikaali kuwa kuzimbibwa, naajanga nga ntaayo abantu nga njiira ku nda dhaibwe, nga bagemye empiima dhaibwe, n'amafumo gaibwe, n'obulaso bwaibwe.

¹⁴ Bwe nabona ntyo naasitukiramu, naakoba abakulembeze, n'abakungu, n'abantu abandi boonaboona nti: “Abazigu abo mutabatya. Mwidhukire nga Musengwa Katonda mukologho era wa ntiisa. Kale mulwanirire baganda baimwe, ni batabane baimwe, ni baghala baimwe, ni bakazi baimwe, era n'amaka gaimwe.”

¹⁵ Abazigu baife baawulira nga twamanha olukwe lwaibwe, era nga Katonda n'eyatabulatabula entegeka dhaibwe. Agho twenatwena twairayo ku mulimo ogw'okuzimba ekimante.

¹⁶ Okuva olwo n'okweyongerayo, omulala ku buli bakozi bange ababiri ababiri, yaakolanga ogw'okuzimba, ate owundi yaagemanga eifumo, n'engabo, n'akalaso, era yaavaalanga n'ekivaalo eky'omu lutalo. Abakulembeze baizanga inho amaani mu Bayudaaya

¹⁷ abaali ku gw'okuzimba ekimante. Abo abaabbeedanga ebizito nga bakozesa omukono mulala, ate omukono ogundi gwagema eky'okulwanisa.

¹⁸ Era buli muzimbi yazimbanga nga yeesibye empiima ye mu nkende. Omuntu ow'okufuuwa eigwala ng'akamanhiso k'olutalo, ng'aba ghalala ninze.

¹⁹ Agho naakoba abakulembeze, n'abakungu, n'abantu abandi boonaboona, nti: “Omulimo gwe tuli kukola munene era gwesuulaine inho amabanga. Ekyo kituleeteire obutaba ghalala, buli muntu yaaba ghala okuva ku mwine.

²⁰ Kale bwe munaawuliranga eigwala eyo yoonayoona muli, mwidha kwesolokezanga ghe ndi. Katonda waife aidha kutulwaniriranga.”

²¹ Mu nsambo eyo twafaabiikananga n'omulimo, okuva obwire ghe busansaanira okutuusa emuunienie ghe dhiviirayo nga ku buli bantu bange ababiri ababiri, omulala agema eifumo ate owundi yaakola.

²² Era naakoba abantu mu kiseera ekyo nti: “Buli muntu ng'ali n'omugheereza we, basigalenga mu Yerusalemu, batukuumenga obwire era bakolenga omulimo omusana.”

²³ Ghazira muntu yeenayeena eyatoolangamu ebivaalo bye, k'abe nze, oba banange, oba abakozi bange, oba abankuumanga be natambulanga nabo. Buli muntu yagemanga eky'okulwanisa kye mu ngalo ekiseera kyonakyona.