Nehemia 3 - Baibuli Ekibono kya Katonda 2014

Bairamu okuzimba ekimante ekyezungulula Yerusalemu

¹ Agho Eliashibu Omukulu wa Bakabona ni bakabona baine, baasitukiramu baazimba ogwetebwa Omulyango ogw'Entaama, baakola omukolo ogw'okugutukuza, era baagutaamu n'endhigi dhaamu. Baatukuza ekimante ekyo okutuuka ku kyetebwa Ekituuti Ekirengererwaku Ekyekikumi, n'okutuuka ku kindi ekyetebwa Ekituuti ekya Hananeli.

² Abantu ab'e Yeriko baazimba ekitundu ekyairaku ku kimante ekyo. Zakkuri mutabane wa Imuri yaazimba ekitundu ekyairaku.

³ Batabane ba Hassena baazimba ogwetebwa Omulyango ogw'Ebyenhandha. Baasimbagho emyango gyagwo, baataamu endhigi dhaamu, era endhigi edho baadhitaaku eminhololo n'ebisiba ebindi.

⁴ Ekitundu ekyairaku, Meremothi mutabane wa Uria era mwidhukulu wa Hakkozi, n'eyakizimba. Ku oyo kwairaku Meshullamu mutabane wa Berekia era mwidhukulu wa Meshezabeli, yaazimba ekitundu ekyairaku ku kimante ekyo. Zadoki mutabane wa Baana yairaku, yaazimba ekitundu ekyairaku.

⁵ Abantu ab'e Tekoa baazimba ekitundu ekyairaku ku kimante ekyo, aye abakungu baayo baaloba okukola omulimo Musengwa Katonda waibwe gwe yabagha.

⁶ Yoiyada mutabane wa Pasea ni Meshullamu mutabane wa Besodeia, baalongoosa ogwetebwa Omulyango Omukaire. Baasimbagho emyango gyagwo, baataamu endhigi dhaamu, era endhigi edho baadhitaaku eminhololo n'ebisiba ebindi.

⁷ Ku abo kwairaku Melatia ow'e Gibeoni, ni Yadoni ow'e Meronothi, n'abantu abandi ab'e Gibeoni n'ab'e Mizipa abaali bafugibwa omukungu w'ekiketezo ekiri ere ng'osomoike omwiga Eufurate abo boona baakola ogw'okulongoosa.

⁸ Uzzieli mutabane wa Harihaia, omugheesi w'ebintu bya zaabu, yairaku, yaalongoosa ekitundu ekyairaku ku kimante ekyo. Ku oyo kwairaku Hanania omukozi w'obuwoowo, yaalongoosa ekitundu ekyairaku ku kimante ekyo, okutuuka ku Kimante Ekigazi.

⁹ Ku oyo kwairaku Refaia mutabane wa Huri eyafuganga ekitundu ku kiketezo ky'e Yerusalemu, yaalongoosa ekitundu ekyairaku ku kimante ekyo.

¹⁰ Ku oyo kwairaku Yedaia mutabane wa Harumafa, yaalongoosa ekitundu ekyairaku ku kimante ekyo, ekyali okumpi n'endhu ye. Ku oyo kwairaku Hattushi mutabane wa Hashabuneia, yaalongoosa ekitundu ekyairaku ku kimante ekyo.

¹¹ Malikiya mutabane wa Harimu, ni Hassihubu mutabane wa Pahathi Moabu, bombi baalongoosa ekitundu ekyairaku ku kimante ekyo, era baalongoosa n'Omunaala ogw'Eziiko.

¹² Ku abo kwairaku Shallumu mutabane wa Halloheshi, eyafuganga ekitundu ekindi ku kiketezo kire eky'e Yerusalemu, yaalongoosa ekitundu ekyairaku ku kimante ekyo, ng'ayambibwaku baghala be.

¹³ Hanuni n'abatyamye ab'omu kibuga Zanoa n'abaalongoosa ogwetebwa Omulyango ogw'omu Kiiko. Baaguzimba buyaaka, baagutaamu endhigi dhaamu, era endhigi edho baadhitaaku eminhololo n'ebisiba ebindi. Era baalongoosa ekitundu ku kimante ekyo nga kigheza mita ebikumi bina n'ana (440), baakituusa ku Mulyango gw'Obusa.

¹⁴ Malikiya mutabane wa Rekabu eyafuganga ekiketezo ky'e Bethi Hakkeremu n'eyalongoosa ogwetebwa Omulyango ogw'Obusa. Yaaguzimba buyaaka, yaagutaamu endhigi dhaamu, era endhigi edho yaadhitaaku eminhololo n'ebisiba ebindi.

¹⁵ Shallumu mutabane wa Kolihoze, eyafuganga ekiketezo ky'e Mizipa, n'eyalongoosa ogwetebwa Omulyango ogw'Ensulo. Yaaguzimba buyaaka, yaagusereka, yaagutaamu endhigi dhaamu, era endhigi edho yaadhitaaku eminhololo n'ebisiba ebindi. Era yaazimba n'ekimante eky'oku Kidiba kya Shela okumpi n'enimiro ya kyabazinga, yaakituukiza irala aghaali amadaala agaika okuva mu kyetebwa Ekibuga kya Daudi.

¹⁶ Ku oyo kwairaku Nehemia mutabane wa Azibuka eyafuganga ekitundu ku kiketezo ky'e Bethizuri, yaalongoosa ekitundu ekyairaku ku kimante ekyo okutuukira irala ku magombe ga Daudi, ni ku kidiba kye baasima obusime, ni ku ndhu ey'abalwani ab'amaani.

Abalevi abaakola ogw'okuzimba ekimante ekyo

¹⁷ Abalevi bano, n'abaalongoosa ebitundu ebyairaku ku kimante ekyo: Rehumu mutabane wa Bani n'eyasooka okulongoosa ekitundu ekyairaku ku kimante ekyo. Ku oyo kwairaku Hashabia eyafuganga ekitundu ku kiketezo eky'e Keila, yaalongoosa ekitundu ekyairaku ku kimante ekyo, ku lw'abantu b'ekiketezo kye.

¹⁸ Ku oyo kwairaku Bavvai mutabane wa Henadadi eyafuganga ekitundu ekindi ku kiketezo kire eky'e Keila, yaalongoosa ekitundu ekyairaku ku kimante ekyo.

¹⁹ Ku oyo kwairaku Ezeri mutabane wa Yeshua eyafuganga ekiketezo eky'e Mizipa, yaalongoosa ekitundu ekiringiriire ghe batereka eby'okulwanisa, okutuukira irala ku kimante ghe kigonhokera.

²⁰ Ku oyo kwairaku Baruku mutabane wa Zabbai, yaalongoosa ekitundu ekindi okuva ekimante ghe kigonhokera, okutuuka ku mulyango ogw'endhu ey'Omukulu wa Bakabona ayetebwa Eliashibu.

²¹ Ku oyo kwairaku Meremothi mutabane wa Uria era mwidhukulu wa Hakkozi, yaalongoosa ekitundu ekyairaku ku kimante ekyo, okuva ku mulyango gw'endhu ya Eliashibu okutuuka endhu eyo gh'ekanga.

Bakabona abaakola ogw'okuzimba ekimante ekyo

²² Bakabona ab'omu kiketezo eky'oku museetwe bano, n'abaalongoosa ebitundu ebyairaku ku kimante ekyo:

²³ Benjamini ni Hassihubu, n'abaalongoosa ekitundu ekyairaku ku kimante ekyo, ekyali nga kirinzagainia n'endhu dhaibwe. Ku abo kwairaku Azaria mutabane wa Maaseia era mwidhukulu wa Anania, yaalongoosa ekitundu ekyairaku ku kimante ekyo, ekyali kiriiraine endhu ye.

²⁴ Ku oyo kwairaku Binnui mutabane wa Henadadi, yaalongoosa ekitundu ekyairaku ku kimante ekyo, okuva ku ndhu ya Azaria okutuuka ekimante ghe kigonhokera.

²⁵ Palali mutabane wa Uzai n'eyalongoosa ekitundu ekyairaku ku kimante ekyo, okuva ghale ng'olingiriiza ekimante ghe kigonhokera aghaali n'ekituuti ekirengererwaku ekiri ku ndhu ya kyabazinga ghaigulu, okumpi n'endhu y'abakuumi. Ku oyo kwairaku Pedaia mutabane wa Paroshi,

²⁶ n'abagheereza ab'omu isinzizo abaabanga mu kifo ekyayetebwanga Ofeli. Abo baalongoosa ekitundu ekyairaku ku kimante ekyo, okutuuka mu kifo ekiringiriire ogwetebwa Omulyango ogw'Amaadhi mu buvandhuba, era nga n'aghali ekituuti ekirengererwaku ekireeyiriri.

Abandi abaakola ogw'okuzimba ekimante ekyo

²⁷ Abantu ab'e Tekoa baalongoosa kabiri ekitundu ekindi ekyairaku ku kimante ekyo, okuva agho ng'olingiriire ekituuti ekirengererwaku ekikologho era ekireeyiriri, okutuuka ku kimante kya Ofeli.

²⁸ Ghaabaagho bakabona abaalongoosa ekitundu ekyairaku ku kimante ekyo, okuva eitale ku Mulyango ogw'Embalaasi, nga buli muntu alongoosa ekitundu ku kimante ekyo ekiringiriire endhu ye.

²⁹ Ku abo kwairaku Zadoki mutabane wa Immeri, yaalongoosa ekitundu ekyairaku ku kimante ekyo ekiringiriire endhu ye. Ku oyo kwairaku Shemaia mutabane wa Shekania omukuumi w'Omulyango ogw'e Buvandhuba, yaalongoosa ekitundu ekyairaku ku kimante ekyo.

³⁰ Ku oyo kwairaku Hanania mutabane wa Shelemia, ni Hanuni omwana owomukaaga owa Zalafu, baalongoosa kabiri ekitundu ekindi ekyairaku ku kimante ekyo. Ku abo kwairaku Meshullamu mutabane wa Berekia, yaalongoosa ekitundu ekyairaku ku kimante ekyo ekiringiriire endhu ye.

³¹ Ku oyo kwairaku Malikiya omugheesi ow'ebintu bya zaabu, yaalongoosa ekitundu ekyairaku ku kimante ekyo, okutuuka ku ndhu ey'abagheereza ab'omu isinzizo n'ey'abasuubuzi, edhaali dhirinzagainia n'ogwetebwa Omulyango gwa Hammifakadi okumpi n'ensonda y'ekimante ekyo kwe baazimbira akasenge aka ghaigulu.

³² Agho abagheesi ab'ebintu bya zaabu, N'abasuubuzi, baalongoosa ekitundu ekyasembayo ku kimante ekyo, okuva ku nsonda eyo eyaliku akasenge aka ghaigulu okutuuka ku Mulyango ogw'Entaama.