Nehemia 2 - Baibuli Ekibono kya Katonda 2014

Nehemia aja e Yerusalemu

¹ Mu mwezi ogwetebwa Nisani mu mwaka ogwamakumi abiri (20) nga Arutazerizesi n'afuga Perusia, naaja naagheereza kyabazinga Arutazerizesi oyo omwenge ogw'emizabbibu ogwali mu maiso ge. Yali tambonangaku nga nnakughaire.

² Kale yambuuza ati: “Lwaki weekapye mu maiso, ate nga ndi kubona nga toli mulwaire? Kiboneka ghaligho enaku ekuli ku mwoyo.”

³ Agho naatya inho, naakoba kyabazinga nti: “Isebantu kyabazinga, ghangaala byanda na byanda! Nnaalobera ki okwekapa mu maiso, ng'ate ekibuga omuli amagombe ga badhaadha bange bakizikiriiza kiri bifulukwa byereere, nga n'emiryango gyakyo bagyokiikya omuliro?”

⁴ Kyabazinga yambuuza ati: “Buti oli kunsaba nkukolere ki?” Agho naasooka naasaba Katonda ow'eigulu,

⁵ memale naakoba kyabazinga nti: “Isebantu kyabazinga, bw'oba ng'osiima bye nkola era nga tikiikusungughaze, nkusaba ondeke nje e Buyudaaya, mu kibuga omuli amagombe ga badhaadha bange, ndhiremu okukizimba.”

⁶ Agho Isebantu kyabazinga oyo, nga n'inhebantu amutyamiire kumpi agho, yambuuza ati: “Oja kubaayo enaku imeka, era oliira li?” Kale kyabazinga yaaganha okundeka nje. Naamukobera ekiseera kye nali ow'okwiriraku.

⁷ Era naasaba kyabazinga ampe embaluwa ndhitwalire abafuzi b'ebiketezo ebiri ere ng'osomoike omwiga Eufurate, banganhe mbite mu biketezo byaibwe okutuuka e Buyudaaya.

⁸ Era naasaba n'embaluwa ntwalire Asafu omukuumi w'ekibira kya kyabazinga, aganhe okumpa emiti egy'okukolamu emiryango egy'ekifo eky'okwewogomamu ekyezungulwire eisinzizo, n'egy'okukolamu emiryango egy'ekimante ekyezungulwire ekibuga, era n'egy'okuzimbamu endhu ye nnaabangamu. Agho kyabazinga yaaganha okunkolera kye namusaba, kuba Katonda wange yali ghalala ninze.

⁹ Naatuuka eri abafuzi b'ebiketezo ebiri ere ng'osomoike omwiga Eufurate, naabagha embaluwa edhaava ye kyabazinga. Buti kyabazinga oyo yali amaze okuntuma, ghalala n'abandi ku bakulira amagye ge, n'abandi ku baisirukale ab'oku mbalaasi.

¹⁰ Aye Saniballati ow'e Bethi Horoni ni Tobia omugheereza Omuammoni bwe baakiwulira, baanakughala ebitaloodheka, okubona nga ghaligho omuntu eyali ali kukola ku lw'obulungi obw'abantu Abaisiraeli.

¹¹ Kale naaja naatuuka e Yerusalemu, naabaayo enaku isatu.

¹² Agho naasituka obwire, naaja n'abasaadha batonotono, aye nga ghazira muntu yeenayeena ye nkobeireku ekindi ku mwoyo, Katonda kye yankoba okukolera Yerusalemu. Tyali na nsolo yindi yoonayoona okutoolaku eyo ye nali ntyaimeku, nga ndi kuvuga.

¹³ Naaja obwire obwo naabita mu Mulyango ogw'omu Kiiko, era naabitira ku Nsulo ey'Ogusota, naatuuka ku Mulyango gw'Obusa. Naajanga nga neekebeedha ebimante ebyezungulwire Yerusalemu bye baamenhamenha, n'emiryango gyakyo gye baayokya omuliro.

¹⁴ Agho naaja ku gwetebwa Omulyango ogw'Ensulo, ku Kidiba kya Kyabazinga. Aye ng'eyo ezira ngira mwe mpanga kubisa nsolo ye nali ndi kuvuga.

¹⁵ Era obwire obwo naaja naabita mu kiiko nga bweneekebeedha ekimante ekyo. Bwe namala, naakyuka naira einhuma, naingirira mu Mulyango ogw'omu Kiiko, nairayo mu kibuga.

¹⁶ Abafuzi ti baamanha ye naja waire kye nakolayo. Era nali nkaali na kukobera Bayudaaya banange, oba bakabona, oba abakungu, oba abakulembeze, waire abantu abandi boonaboona abaali baja okukola omulimo ogwo.

¹⁷ Agho naabakoba nti: “Mubona obuzibu bwe tulimu? Buti Yerusalemu baakizikiriza kyafuuka bifulukwa byereere, n'emiryango gyakyo baagyokya omuliro. Kale ni mwidhe tuzimbe ekimante ku Yerusalemu tulekere agho kuswala.”

¹⁸ Kale naabakobera nga Katonda wange bwe yaba aghalala ninze n'anhamba, era naabakobera n'ebyo kyabazinga bye yankoba. Agho bankoba bati: “Tusitukiremu tuzimbe.” Era baafungiza beetegekera okukola omulimo ogwo omukalamu.

¹⁹ Aye Saniballati ow'e Bethi Horoni, ni Tobia omugheereza Omuammoni, ni Geshemu Omuwarabu, bwe baawulira kye tutegeka okukola, baatusekerera inho era baatunhooma. Batubuuza bati: “Muli kukola ki ekyo? Muli kudheemera kyabazinga?”

²⁰ Naabairamu nti: “Katonda ow'eigulu, aidha kutugha obughanguzi. Kale ni ife abagheereza be twidha kusitukiramu tuzimbe. Aye imwe mu Yerusalemu muno, muziramu mugabo gwaimwe, oba okubaamu n'ekintu ekyaimwe, waire ekiidhukizo obwidhukizo.”