Nehemia 12 - Baibuli Ekibono kya Katonda 2014

Olukalala lwa Bakabona n'Abalevi

¹ Luno n'olukalala lwa bakabona n'Abalevi abaira okuva mu bunhage, ni Zerubbabeli mutabane wa Shealutieli, era ni Yeshua. Seraia, ni Yeremia, ni Ezera,

Bakabona baali bano:

² ni Amaria, ni Malluki, ni Hattushi,

³ ni Shekania, ni Rehumu, ni Meremothi,

⁴ ni Iddo, ni Ginnethoi, ni Abiya,

⁵ ni Miyamini, ni Maadia, ni Biliga,

⁶ ni Shemaia, ni Yoiaribu, ni Yedaia,

⁷ ni Sallu, ni Amoki, ni Hilikia, ni Yedaia. Abo n'abaakuliranga bakabona banaibwe mu biseera Yeshua ghe yabeera Kabona Omukulu.

⁸ Abalevi baali bano: Yeshua, ni Binnui, ni Kadimieli, ni Sherebia, ni Yuda, ni Mattania. Abo n'abaakulemberanga enhembo edh'okwebaza ni Balevi banaibwe abandi.

⁹ Ate Bakabukia, ni Unni, ni Balevi banaibwe abandi nga n'abeemerera emberi gh'abo, okwemba eby'okwiramu.

Bakabona abaasimuka mu Yeshua Kabona Omukulu

¹⁰ Yeshua yazaala Yoiakimu, Yoiakimu yaazaala Eliashibu, Eliashibu yaazaala Yoiada,

¹¹ Yoiada yaazaala Yonathani, Yonathani yaazaala Yaddua.

Abakulu ab'enda dha Bakabona

¹² Mu biseera bya Yoiakimu, bano n'abaakuliranga enda dha bakabona: Meraia nga n'akulira enda ya Seraia; Hanania yaakulira eya Yeremia;

¹³ Meshullamu yaakulira eya Ezera; Yehohanani yaakulira eya Amaria;

¹⁴ Yonathani yaakulira eya Malluki; Yosefu yaakulira eya Shebania;

¹⁵ Adana yaakulira eya Harimu; Helikai yaakulira eya Meraiothi;

¹⁶ Zekaria yaakulira eya Iddo; Meshullamu yaakulira eya Ginnethoni;

¹⁷ Zikiri yaakulira eya Abiya; ... yaakulira eya Miniamini; Pilitai yaakulira eya Moadia;

¹⁸ Shammua yaakulira eya Biliga; Yehonathani yaakulira eya Shemaia;

¹⁹ Mattenai yaakulira eya Yoiaribu; Uzzi yaakulira eya Yedaia;

²⁰ Kallai yaakulira eya Sallai; Eberi yaakulira eya Amoki;

²¹ Hashabia yaakulira eya Hilikia; ate Nethaneli yaakulira eya Yedaia.

Ebighandiiko ebyoleka enda dha Bakabona n'Abalevi

²² Mu biseera bya Eliashibu n'ebya Yoiada n'ebya Yohanani n'ebya Yaddua, bye baabeera nga n'Abakulu ba Bakabona, abakulu ab'enda edh'Abalevi aghalala n'abakulu ab'enda dha bakabona baaja nga baghandiikibwa okutuusa mu biseera Dario bye yabeeramu kyabazinga w'e Perusia.

²³ Aye abakulu ab'enda edh'Abalevi baaghandiikibwa mu kitabo ky'Ebyomubyanda bya Bakyabazinga, kutuuka bwa mu biseera bya Yohanani mutabane wa Eliashibu.

Engaba ey'emirimo egy'omu isinzizo

²⁴ Abalevi nga bakulemberwa Hashabia, ni Sherebia, ni Yeshua mutabane wa Kadimieli, beegabaniamu ebikunsu. Nga ku buli mukuzi ghabaagho ebikunsu bibiri ebiba biri kwemba enhembo edhisaaka n'okwebaza Katonda, ng'ekindi kiri kwemba eby'okwiramu, nga kyabazinga Daudi omuntu wa Katonda bwe yalagira.

²⁵ Mattania, ni Bakabukia, ni Obadia, ni Meshullamu, ni Talimoni, ni Akkubu, n'abaali abaigazi b'emiryango abaakuumanga amaterekero agaali ku miryango.

²⁶ Abantu abo baaligho mu kiseera kya Yoiakimu mutabane wa Yeshua era mwidhukulu wa Yozadaki, ni mu kiseera kya Nehemia eyali omufuzi, ni mu kya Ezera eyali kabona era omunamateeka.

Nehemia atukuza ekimante ekyezungulwire ekibuga

²⁷ Ekiseera bwe kyatuuka okutukuza ekimante ekyezungulwire ekibuga Yerusalemu, baasoloza Abalevi boonaboona ye baali baba, baidhe beeyimbe mu mukolo ogwo ogw'okusagamba n'okwebaza, nga bemba enhembo era nga bakubiraku ebide, n'entongooli, n'endingidi.

²⁸ Abalevi ab'oku nda edh'abembi beesoloza okuva mu biketezo ebyezungulwire Yerusalemu ni mu byalo by'e Netofa,

²⁹ n'okuva e Bethigiligali, n'okuva mu kiketezo ky'e Geba ni mu Azimavethi kuba abembi baali basenze mu byalo ebyezungulwire Yerusalemu.

³⁰ Agho bakabona n'Abalevi baakola omukolo ogw'okwetukuza, n'okutukuza abantu, n'emiryango, n'ekimante ekyezungulwire ekibuga.

³¹ Agho naayeta abakulu ab'omu Buyudaaya, beesololeza ku kimante ghaigulu. Naabagemya ebikunsu by'abantu bibiri ebikologho, byatambula nga bija bwe byemba enhembo edheebaza Katonda. Ekikunsu ekindi kyasimbira ku luuyi olw'omukono omusaadha, ku ngulu ku kimante, nga kyolekeire omulyango ogwetebwa Ogwobusa.

³² Hoshaia yaabavangaku einhuma, ng'ali n'ekitundu ku bakulu bale ab'omu Buyudaaya,

³³ ni Azaria, ni Ezera, ni Meshullamu,

³⁴ ni Yuda, ni Benjamini, ni Shemaia, ni Yeremia,

³⁵ n'abandi ku bakabona abaajanga nga bafuuwa amagwala, bano: Zekaria mutabane wa Yonathani era mwidhukulu wa Shemaia, Shemaia yaaba mutabane wa Mattania, Mattania yaaba mutabane wa Mikaia, Mikaia yaaba mutabane wa Zakkuri, ate Zakkuri yaaba mutabane wa Asafu.

³⁶ Hoshaia oyo era yaaja n'aboluganda lwe abandi bano: Shemaia, ni Azareli, ni Milalai, ni Gilalai, ni Maai, ni Nethaneli, ni Yuda, ni Hanani, abaajanga nga bakuba ebivuga ng'ebya kyabazinga Daudi omuntu wa Katonda. Ezera omunamateeka n'eyabakulemberamu.

³⁷ Agho baatuuka ku gwetebwa Omulyango ogw'Ensulo, baaja busimbalaala baaniina amadaala ag'ekyetebwa Ekibuga kya Daudi, okutuuka ekimante ekyo ghe kibitira ku ndhu ya Daudi, olwo baatuuka ku gwetebwa Omulyango ogw'Amaadhi e buvandhuba w'ekibuga.

³⁸ Ekikunsu ekindi eky'abo abaali nga baidhie okwebaza, kyasimbira ku luuyi olw'omukono omugooda, era nga boona bali ku ngulu ku kimante. Nze n'ekitundu kire ekyasigalagho ku bakulu b'omu Buyudaaya bale, twabanonereza. Twabita ku kyetebwa Ekituuti Ekyebyokero, twatuuka ku kyetebwa Ekimante Ekigazi.

³⁹ Bwe twava agho, twatuuka ku gwetebwa Omulyango Ogwa Efuraimu, era twaja twatuuka ku gwetebwa Omulyango Omukaire. Era tweyongerayo twatuuka ku gwetebwa Omulyango ogw'Ebyenhandha, ni ku kyetebwa Ekituuti ekya Hananeli, era ni ku kyetebwa Ekituuti Ekyekikumi. Bwe twava agho twatuuka ku gwetebwa Omulyango gw'Entaama, olwo twatuuka ku gwetebwa Omulyango Ogwabakuumi, era twakoma agho.

⁴⁰ Kale ebikunsu ebyo byombi eby'abo abaali nga baidhie okwebaza, byatuuka aghali eisinzizo. Ninze zeena, nga ndi ghalala n'ekitundu kire ekyasigalagho ku bakulu b'omu Buyudaaya bale, twayemerera agho,

⁴¹ aghalala ni bakabona bano: Eliakimu, ni Maaseia, ni Miniamini, ni Mikaia, ni Elioenai, ni Zekaria, ni Hanania, nga bali kufuuwa amagwala gaibwe.

⁴² Ni bakabona bano boona baayemerera agho: Maaseia, ni Shemaia, ni Eleazari, ni Uzzi, ni Yehohanani, ni Malikiya, ni Elamu, ni Ezeri. Abembi baayemba nga bakulemberwa Yezerahia.

⁴³ Ku lunaku olwo baaghaayo emisengo kamaala inho, nga basagamba olw'okuba Katonda yabagha eisanhu lingi inho. Abakazi n'abaana boona baasagamba, era okusanhuka okwali mu Yerusalemu kwatuuka ghala inho okuva agho.

Ebyagheebwangayo mu kusinza okw'omu isinzizo

⁴⁴ Ku lunaku olwo baataagho abantu ab'okulabiriranga amaterekero omwateebwanga ebigheebwayo eby'eisinzizo bino: ebirime ebisooka okukungulwa, n'ekintu ekirala ekirala ku buli bintu ikumi omuntu by'afuna. Era mu materekero omwo, mwe baasololezanga emigabo egyagheebwanga bakabona n'Abalevi okuva mu misiri egya buli kibuga, ng'Amateeka bwe galagira. Abayudaaya baakola batyo kuba baasanhukira inho ensambo bakabona n'Abalevi ye baagheerezangamu Katonda,

⁴⁵ nga baakola emikolo egy'okwetukuza, n'emikolo egindi, ng'oti n'abembi boona bwe baakolanga ogw'okwemba, n'abakuumi b'emiryango ni baakola ogw'okukuuma, bajiira ku kiragiro kya Daudi ni mutabane we Solomoni.

⁴⁶ Okuviira irala mu biseera bya Daudi ni Asafu, ghaabangagho akulira abembi era ghaabangagho n'enhembo edh'okusaaka n'edh'okwebaza Katonda.

⁴⁷ Era mu biseera bya Zerubbabeli ni mu bya Nehemia, Abaisiraeli boonaboona baaghangayo omugabo buli lunaku gwe baaghanga abembi n'abakuumi ab'emiryango. Era baaghangayo n'emigabo gy'Abalevi, ate Abalevi boona baayawulanga ku egyo, baaghaaku abaana ba Aaroni.