Nehemia 11 - Baibuli Ekibono kya Katonda 2014

Abantu abaabanga mu Yerusalemu

¹ Agho abakulembeze b'abantu baasenga mu Yerusalemu baabanga omwo, aye abantu abaasigalagho abandi baakuba obululu okulonda omuntu omulala omulala ku buli bantu eikumi, okubanga mu Yerusalemu ekibuga ekitukuvu. Ate bale omwenda abasigalagho ku buli bantu eikumi, nga ba kubanga mu bibuga ebindi.

² Era abantu nga basanhukira inho omuntu asalagho ku lulwe okuja okubanga mu Yerusalemu.

³ Aye Abaisiraeli abandi, ni bakabona, n'Abalevi, n'abagheereza b'omu isinzizo, n'abaidhukulu ab'abagheereza ba Solomoni, nga buli muntu aba mu kibandha kye ekiri mu kibuga eky'ewaibwe. Bano n'abatyamye abakulu ab'omu kiketezo ekyo ekya Buyudaaya, abaabanga mu Yerusalemu:

⁴ Mwalimu abandi ku baidhukulu ba Yuda, n'abandi ku baidhukulu ba Benjamini. Mu baidhukulu ba Yuda mwalimu: Athaia mutabane wa Uzzia era mwidhukulu wa Zekaria, Zekaria yaaba mutabane wa Amaria, Amaria yaaba mutabane wa Shefatia, Shefatia yaaba mutabane wa Mahalaleli asimuka mu Perezi mutabane wa Yuda.

⁵ Mwalimu ni Maaseia mutabane wa Baruku, Baruku yaaba mutabane wa Kolihoze, Kolihoze yaaba mutabane wa Hazaia, Hazaia yaaba mutabane wa Adaia, Adaia yaaba mutabane wa Yoiaribu, Yoiaribu yaaba mutabane wa Zekaria asimuka mu Shela mutabane wa Yuda.

⁶ Abantu boonaboona abaasimuka mu Perezi abaabanga mu Yerusalemu baali ebikumi bina na nkaaga na munaana (468), nga boonaboona bantu abaziramu ntete.

⁷ Mu baidhukulu ba Benjamini mwalimu: Sallu mutabane wa Meshullamu, Meshullamu yaaba mutabane wa Yoedi, Yoedi yaaba mutabane wa Pedaia, Pedaia yaaba mutabane wa Kolaia, Kolaia yaaba mutabane wa Maaseia, Maaseia yaaba mutabane wa Ithieli, ate Ithieli yaaba mutabane wa Yeshaia.

⁸ Baidhukulu ba Benjamini abandi baali, Gabbai ni Sallai. Ababenjamini boonaboona abaabanga mu Yerusalemu baali lwenda n'abiri na munaana (928).

⁹ Yoeli mutabane wa Zikuri n'eyali omukulembeze waibwe, ate Yuda mutabane wa Hassenua n'eyaiririranga omukulu ow'ekibuga.

¹⁰ Mu bakabona mwalimu: Yedaia mutabane wa Yoiaribu, ni Yakini,

¹¹ ni Seraia mutabane wa Hilikia, Hilikia mutabane wa Meshullamu, Meshullamu yaaba mutabane wa Zadoki, Zadoki yaaba mutabane wa Meraiothi, Meraiothi yaaba mutabane wa Ahitubu, eyali Omukulu wa Bakabona akulira eisinzizo.

¹² Abantu boonaboona aghalala abaagheerezanga mu isinzizo baali lunaana n'abiri na babiri (822). Okwo nga kw'otaire ni Adaia mutabane wa Yerohamu, Yerohamu mutabane wa Pelalia, Pelalia yaaba mutabane wa Amuzi, Amuzi yaaba mutabane wa Zekaria, Zekaria yaaba mutabane wa Pashuhuri, ate Pashuhuri yaaba mutabane wa Malikiya.

¹³ Adaia oyo ni baganda be boonaboona aghalala, baali abantu ebikumi bibiri n'ana na babiri (242) abaakuliranga endha dha baiseibwe. Ate kabona owundi nga ni Amashisai mutabane wa Azareli, Azareli mutabane wa Ahazai, Ahazai yaaba mutabane wa Meshillemothi, Meshillemothi yaaba mutabane wa Immeri.

¹⁴ Abo boonaboona ghalala ni baganda baibwe, baali abantu kikumi n'abiri na munaana (128) nga balwani ba maani abaziramu ntete. Omukulu waibwe yali Zabadieli mutabane wa Haggedolimu.

¹⁵ Mu Balevi mwalimu: Shemaia mutabane wa Hassihubu, Hassihubu mutabane wa Azarikamu, Azarikamu yaaba mutabane wa Hashabia, ate Hashabia yaaba mutabane wa Bunni.

¹⁶ Okwo nga kw'otaire Shabbethai ni Yozabadi abandi ku Balevi abakulu, abaalabiriranga emirimo egy'okuliya okw'eisinzizo.

¹⁷ Waataaku ni Mattania mutabane wa Mika, Mika yaaba mutabane wa Zabadi, ate Zabadi yaaba mutabane wa Asafu, eyakulemberanga okusaba okw'okwebaza mu isinzizo. Waataaku ni Bakabukia, eyaiririranga Mattania, ni Abada mutabane wa Shammua, Shammua mutabane wa Galali, ate Galali yaaba mutabane wa Yeduthuni.

¹⁸ Abalevi boonaboona aghalala abaabanga mu Yerusalemu ekibuga ekitukuvu, baali ebikumi bibiri na kinaana na bana (284).

¹⁹ Mu bakuumi ab'emiryango egy'eisinzizo mwalimu: Akkubu, ni Talimoni, ni baganda baibwe. Boonaboona aghalala baali abantu kikumi na nsanvu na babiri (172).

²⁰ Abaisiraeli abandi, ni bakabona, n'Abalevi, baabanga mu bibuga ebindi byonabyona ebya Buyudaaya, nga buli muntu aba mu kibandha kye.

²¹ Aye abantu abaagheerezanga mu isinzizo, baabanga mu Yerusalemu mu kiketezo ekyetebwa Ofeli, era Ziha ni Gishipa nga n'abalabirira emirimo gyaibwe.

²² Eyalabiriranga Abalevi abaabanga mu Yerusalemu yali nga ni Uzzi mutabane wa Bani, Bani mutabane wa Hashabia, Hashabia mutabane wa Mattania, ate Mattania yaaba mutabane wa Mika. Uzzi ono yali asimuka mu Asafu, era ab'oku nda ya Asafu oyo n'abaali abembi mu isinzizo.

²³ Era kyabazinga yali nga yataagho enkola abembi abo ye baajiirangaku mu kukola omulimo gwaibwe buli lunaku.

²⁴ Pethahia mutabane wa Meshezabeli ow'oku nda ya Zera mutabane wa Yuda, n'eyayogererangayo abantu ye kyabazinga.

Abantu abaabanga mu bibuga ebindi n'ebyalo

²⁵ Abantu abandi baabanga mu bibuga ni mu byalo ebyabanga okumpi n'enimiro dhaibwe. Ab'ekika kya Yuda nga baba mu bibuga Kiriathi Araba, ni Diboni, ni Yekabizeeli, ni mu byalo ebibyezungulwire.

²⁶ Abandi nga baba mu bibuga Yeshua, ni Molada, ni Bethipeleti,

²⁷ ni Hazarishualo, ni Beerisheba, ni mu byalo ebibyezungulwire.

²⁸ Abandi baaba mu bibuga Zikulaga, ni Mekona, ni mu byalo ebibyezungulwire.

²⁹ Abandi baaba mu bibuga Enarimmoni, ni Zora, ni Yaramuthi,

³⁰ ni Zanoa, ni Adullamu, ni mu byalo ebibyezungulwire. Ate abandi baaba mu Lakishi, ni mu masamba agakiriinaine, ni mu Azeka, ni mu byalo ebikyezungulwire. Kale kyaba nti ab'ekika kya Yuda baabanga mu kiketezo ekiri ghagati gha Beerisheba n'ekiiko ky'e Hinnomu.

³¹ Ab'ekika kya Benjamini nga baba mu kibuga Geba, n'okweyongerayo okutuuka e Mikamashi, Aiya, Betheli, ni mu byalo ebibyezungulwire.

³² Abandi baaba mu Anathothi, ni mu Nobu, ni mu Anania,

³³ ni mu Hazori, ni mu Rama, ni mu Gittaimu,

³⁴ ni mu Hadida, ni mu Zeboimu, ni mu Neballati,

³⁵ ni mu Lodi, ni mu Ono, ni mu kiiko eky'abagheesi.

³⁶ Ghaligho ebikunsu eby'Abalevi ebyabanga mu kiketezo kya Yuda, ebyasengulwa ni biizibwa mu kiketezo kya Benjamini.