Nehemia 1 - Baibuli Ekibono kya Katonda 2014

Nehemia alumirwa inho Yerusalemu

¹ Bino n'ebibono bya Nehemia mutabane wa Hakalia: Mu mwezi ogwetebwa Kisilevu, mu mwaka ogwamakumi abiri (20) ogwa kyabazinga Arutazerizesi nga n'afuga Perusia, nali ndi e Susa mu kibuga ekikulu eky'ensi eyo Perusia.

² Owundi ku baganda bange ayetebwa Hanani, yaidha n'abantu abandi nga bava e Buyudaaya. Naababuuza ebifa ku Bayudaaya abaawonagho ni bava mu bunhage, n'ebifa ku Yerusalemu.

³ Bankoba bati: “Abo abaawonagho ni bava mu bunhage, bali mu buzibu obw'amaani era baswavu inho. Ekimante ekyezungululanga ekibuga Yerusalemu kyamenhebwa n'emiryango gyakyo gyayokebwa omuliro.”

⁴ Bwe nawulira ebyo byonabyona naatyama ghansi, naalira amaziga. Naamala enaku nga ndi kulira obughafu, naasiiba era naasaba Katonda ow'eigulu,

⁵ nga nkoba nti: “Wo Musengwa Katonda ow'eigulu, oli mukologho era ow'entiisa. Iwe akuuma endagaano yo era waagonza obutalekera abo abakugonza ni bagema ebiragiro byo.

⁶ Lingirira nze omugheereza wo, otege kutu wo owulire bye nkusaba omusana n'obwire ku lw'abagheereza bo Abaisiraeli. Ndhatula nti bwenebwene ife Abaisiraeli twayonoona.

⁷ Twebisa bubi y'oli, twaloba okugema amateeka go n'ebiragiro bye watugha ng'obita mu mugheereza wo Musa.

⁸ Idhukira ekibono kye wakoba omugheereza wo Musa, oti, ‘Bwe mutaabenga beesigwa ye ndi, ndidha kubasansaanizanga eyo mu maghanga.

⁹ Aye bwe munaakyukanga ni mwira ye ndi, ni mujiira ku biragiro byange, ndidha kubakungaanianga ni bwe munaabanga nga musansaanire eyo eghala einho, mbaleete mu kifo kye nalonda okunsinzizangamu.’

¹⁰ “Wo Musengwa Katonda, abo n'abantu bo abakugheereza be wanunula n'obuyinza bwo obungi era n'amaani go agataloodheka.

¹¹ Wo Musengwa Katonda, tega kutu wo owulire nze omugheereza wo bye nkusaba, owulire n'eby'abagheereza bo abandi, abasanhukira einho okutya eriina lyo. Nze omugheereza wo nkusaba ompe obughanguzi olwaleero luno, oleetere omusaadha ono okunsaasira.” Mu kiseera ekyo, ninze nagheerezanga kyabazinga eby'okunhwa.