Nahumu 1 - Baibuli Ekibono kya Katonda 2014

¹ Buno n'obukwenda obwava ye Katonda nga bugema ku kibuga Nineve. Nahumu ow'oku kyalo Elikoshi yafuna okwolekebwa, era bye yabona mu kwolekebwa ni bino ebyaghandiikibwa mu kitabo kino.

Musengwa Katonda asungughalira ab'e Nineve

² Musengwa Katonda wa nkikidi, tayenda bantu be kusinza bakatonda bandi. Abatakola nga bw'ayenda ababonereza; abamutakania abasungughalira era yaabasasulamu ebibonerezo ebikakali.

³ Musengwa Katonda alwagho okusungughala, era ali n'obuyinza obutaloodheka. Musengwa Katonda taleka muntu aliku musango nga tamubonereiza. Musengwa Katonda gh'atambulira ghabaagho kiwunga n'empewo eyeezungulula n'amaani. Era ebire, n'ebiba enkungu ebigere bye ye bisiikuula ng'ali kutambula.

⁴ Alagira enhandha yaakala, era akaliiza emiiga. Olwo emisiri egy'e Bashani gyawotoka, ate n'egy'oku lusozi Karumeli gyakala era n'ebimuli eby'oku nsozi edh'e Lebanoni byona byakala.

⁵ Musengwa Katonda gh'aba, musisi atengeesa ensozi enene, obusozi obutono bwasaanuuka, ensi yoonayoona yeesunda, n'abantu baamu boonaboona baadhugumira.

⁶ Bw'asungughala ghazira abaagho nga mulamu, era ghazira aghanga kugumira busungu bwe obuli ng'oti muliro. Obusungu bwe obwo bwe butumbuka, ni bwe luba olubaale lumenhekamenheka, lwesa ng'oti nkungu.

⁷ Musengwa Katonda mulungi, oyo n'ekifo eky'okwewogomamu mu biseera ebizibu; alabirira abo abamwesiga.

⁸ Aye abazigu be abazikiriza n'omwidhuzo ogw'amaadhi ag'amaani. Abo abamutakania abasindika mu nzikiiza ey'omu magombe.

⁹ Imwe muli kwesoomera kukola ki Musengwa Katonda? Aidha kubazikiriza. Ezira asobola kumutakania kuswika ku mukuzi mulala.

¹⁰ Waire muli ng'oti n'amawa amakaadaanie, era mwaba ng'oti n'abanhwi b'omwenge abatamiire, muja kusaanagho ng'eisubi eikalu bwe limamuka n'omuliro.

¹¹ Omuntu yava mu imwe eyo e Nineve ng'ali n'ebibi kamaala by'ategeike okukola yaidha yeesoomera Musengwa Katonda.

¹² Aye Musengwa Katonda akoba ati: “Abantu bange Abaisiraeli, waire nga Abassiria bali kamaala batyo era nga ba maani inho, nja kubazikiriza baweegho. Imwe waire nabatuusa ku kudaazibwadaazibwa, tija kwirayo kubaganha kudaagadaaga.

¹³ Buti ni, nja kumenhamenha ebikoligo Abassiria abo bye baabata imwe mu nkoto, n'endhegere dhe baabasibya.”

¹⁴ Kino Musengwa Katonda ky'alagiire ekigema ku imwe Abassiria ati: “Eriina lyaimwe lija kwerabirwa, kuba tija kubaganha kufuna baidhukulu. Nja kuzikiriza ebifaananie eby'emisambwa gyaimwe ebyabaadhibwa, n'ebyo ebyakolebwa mu kyuma ekisaanuusiibwa ebiri mu masabo. Ndidha kubasimira amagombe, kuba timugwaine kuba ku nsi nga muli balamu.”

¹⁵ Abantu ab'e Buyudaaya mubone eno! Omukwenda ali kwidhira ku nsozi ng'aleeta amawulire amalungi era ng'alangirira emiraala. Buti ni mukole ekibinuko era mutuukirize bye mweyama ye Musengwa Katonda kuba ababi abo tibaja kwirayo kabiri kulumba nsi yaimwe. Bazikiriziibwa baawaagho.