Mika 5 - Baibuli Ekibono kya Katonda 2014

¹ Abantu ab'e Yerusalemu mwesoloze mukole eigye! Batuzingiiza! Bakubye omufuzi wa Isiraeli ku itama n'olwigo.

Katonda asuubiza Isiraeli omufuzi asimuka e Bethelehemu

² Musengwa Katonda akoba ati: “Bethelehemu Efuratha, waire oli katono mu bibuga bya Buyudaaya, nja kukutoolamu omufuzi alifuga Isiraeli, ng'ali ku lulyo olw'abantu ab'eira einho abataja kwerabirwa.”

³ Kale Musengwa Katonda aja kulekulira agho abantu be Abaisiraeli okumala entangama, okutuusa omukazi ali kulumwa okuzaala lw'alizaala omufuzi oyo. Olwo Baisiraeli baine baja kwira okuva mu bunhage, beeyimbe ku baganda baibwe abaasigala.

⁴ Aja kufuga abantu be mu maani ga Musengwa Katonda, era Musengwa Katonda oyo amufuule okuba kyabazinga omukologho. Abantu be baja kuba n'emiraala, kuba ensi yoonayoona eja kumubona nga mukologho.

⁵ Kino kija kuleetagho emiraala. Ab'e Assiria bwe balitulumba, ni baghagula ebifo byaife ebigumu bye twesiga, tuja kusindika abakulembeze ab'amaani babalwanise.

Musengwa Katonda asuubiza abantu be obughanguzi

⁶ Abo, nga bakozesa eby'okulwanisa byaibwe, baja kughangula ekiketezo ekyo Assiria, ensi ya Nimurodi, batuwonie Abassiria bwe baliba batabaire nsi yaife.

⁷ Olwo Abaisiraeli abaliwonagho eyo ye baliba mu maghanga mu bunhage, baliba ng'oti n'omusulo oguva ye Musengwa Katonda, era baaba ng'oti n'amaadhi agagwa agakuza ebisimbe. Baja kwesiga maani ga Katonda gonka, se ti ga bantu.

⁸ Abaisiraeli abo abaliwonagho eyo mu maghanga, baliba ng'oti n'empologoma eri kuyiiga ensolo edh'omu nsiko mu kibira, oba eri kuyiiga entaama mu kyayiro. Kiisi y'etuukaku egituumiraku yaagikankanula nga ghazira isuubi lyonalyona lya kuwona.

⁹ Mu nsambo n'endala, Abaisiraeli baja kughangula abazigu baibwe boonaboona era babazikirize.

Musengwa Katonda yeesoomera okubonereza abantu be

¹⁰ Musengwa Katonda akoba ati: “Mu kiseera ekyo ndizikiriza embalaasi dhaimwe n'ebigaali byaimwe eby'omu lutalo.

¹¹ Ndizikiriza ebifo byaimwe eby'okwewogomamu n'ebibuga byonabyona.

¹² Ndizikiriza bye mukozesa okuloga byonabyona, era naatoolagho n'abalaguzi boonaboona.

¹³ Ndizikiriza ebintu bye musinza ebitali Katonda n'empango edh'amabaale dhe musinza, era naabalobera okusinza ebintu bye mwekoleire n'engalo dhaimwe beene.

¹⁴ Ndiiwululagho ebifaananie eby'omusambwa omukazi ogwetebwa Ashera era naazikiriza n'ebibuga byaimwe.

¹⁵ Olw'obusungu n'ekiruyi bye ndi nabyo, ndibonereza amaghanga agatangondera.”