Mika 4 - Baibuli Ekibono kya Katonda 2014

Obufuzi bwa Musengwa Katonda obw'emiraala buja kumaamira ensi

¹ Ekiseera kiidha kutuuka, olusozi oluliku eisinzizo lube nga n'olusinga buleeyi mu dhoonadhoona, era nga lusooloobye obusozi bwonabwona. Abantu abamaghanga kamaala balisomboka baidha ku lusozi olwo,

² abantu abangi abo balikoba bati: “Mwidhe tuje ku lusozi lwa Musengwa Katonda, mu isinzizo lya Katonda wa Isiraeli, atwegerese by'ayenda tukole era tujiire ku ebyo by'atwegeresa; kuba Musengwa Katonda aba eyo mu Yerusalemu yaayegeresa abantu be, era aba eyo mu Sioni yaayogera n'abantu be.”

³ Musengwa Katonda aliramula amaghanga ag'amaani, ag'okumpi n'eghala. Edhibaire empiima dhaibwe edh'okulwanisa balidhigheesaamu mbago, ate amafumo gaibwe baagagheesaamu busolobyo bwa kuwoolera. Amaghanga tigaliirayo kulwana ntalo, waire okwirayo okutendekebwa mu by'entalo.

⁴ Buli muntu aidha kuwuliranga emiraala ng'ali mu masamba ge ag'emizabbibu n'ag'emiti emitiini, nga ghazira muntu yeenayeena amutiisa naire. Kuba Musengwa Katonda afuga amagye, mwene n'akobye.

⁵ Abantu aba buli ighanga basinza era baagondera bakatonda baalyo, aye ife twidha kusinzanga era tugonderenga Musengwa Katonda, Katonda waife ebyanda n'ebyanda.

Abaisiraeli baja kuvaayo baire okuva mu bunhage

⁶ Musengwa Katonda akoba ati: “Ekiseera kiidha kutuuka, nsoloze ghalala abantu be nabonereza, ni mbaleka batwalibwa mu bunhage okudaagiradaagira eyo.

⁷ Waire nga balema era nga baatwalibwa eghala einho okuva ewaibwe, ndidha kubafuula bakaawonagho era mbafuule eighanga ery'amaani. Era nze Musengwa Katonda mwene, ndidha kubafugiranga ku lusozi Sioni okuva n'olwo okutuusa ebyanda n'ebyanda.”

⁸ Era iwe Yerusalemu, ekibuga Katonda mw'aba n'alengera abantu be, ng'omwayi bw'ayemerera ku kituuti n'alengera entaama dhe, oliiramu waaba ekibuga ekikulu eky'obwakyabazinga nga bwe wabanga eira.

⁹ Yerusalemu, lwaki olira n'owowoola? Lwaki osinda ng'oti n'omukazi ali kulumwa okuzaala? Lwa kubula kyabazinga? Lwa kuba tokaali na bakugha magezi?

¹⁰ Abantu ab'omu Yerusalemu, mwegalangule era musinde ng'oti n'omukazi ali kulumwa okuzaala. Kuba mutuuse okutoolebwa mu kibuga kyaimwe muje nga musula eyo mutyo mu nsiko, mutwalibwe e Babiloni. Aye nga muli eyo, Musengwa Katonda aja kubanunula abatoole mu ngalo edh'abazigu baimwe.

¹¹ Amaghanga kamaala geesoloiza okubalumba, nga gakoba gati: “Yerusalemu kizikirizibwe, tukibone nga kisigaire bifunfugu byereere.”

¹² Aye amaghanga ago tigaidhi Musengwa Katonda ky'ategeike kugakola. Tigaidhi nga Musengwa Katonda agasoloiza ghalala kugabonereza ng'oti n'engaano bwe solozebwa mu kifo gh'ekubirwa.

¹³ Musengwa Katonda akoba abantu be ati: “Imwe abantu ab'e Yerusalemu, musitukiremu muje mukube abazigu baimwe. Imwe ndidha kubafuula mube ba maani ng'oti n'ensolo enume eri n'amayiga ag'ekyuma ekigumu einho, n'ebigere ebiriku ebinuulo eby'ekyuma eky'ekikomo. Mwidha kukuba era mumulungule abantu ab'amaghanga kamaala, eby'obukombe byaibwe bye bali nabyo ni bye baanhaga, mwidha kubighaayo ye Musengwa Katonda ow'ensi yoonayoona.”