Mika 3 - Baibuli Ekibono kya Katonda 2014

Abakulembeze ababi n'abalanzi abaguya

¹ Imwe abakulu ab'ebikunsu mu Isiraeli, muwulirise bino: Niimwe abateekwa okumanha abantu bwe bagwaniire okubisibwa mu butuufu.

² Aye kabiri niimwe abatenda kukola bulungi, mwagonza okukola obubi. Bye mukola, muli ng'ababaaga abantu bange ni mubatoolaku oluwutu, era ni mughalagata emamba ku magumba gaibwe.

³ Abantu bange mubabaagaku oluwutu, mwatematema emamba yaibwe, mwamenhamenha n'amagumba gaibwe, mwabafumba mu nsaka mwabalya.

⁴ Aye ekiseera kiri kwidha, mulirire Musengwa Katonda, aye alobe kubafaaku. Mumusabe, aye alobe kubakolera kye muli kumusaba. Kuba ebikolwa byaimwe bibi.

⁵ Abalanzi abaguya badaaliimya abantu nga basuubiza miraala oyo abagha eky'okulya, ate baalanga okwidha kw'olutalo eri oyo azira ky'abaghaire.

⁶ Musengwa Katonda akoba abalanzi abo ati: “Abalanzi imwe, obwaimwe buli kuziba, endhuba eri kugwa! Olw'okuba mudaaliimya abantu bange, timukaayolekerwa, era timukaasobola kulanga kintu ni kituukirira.”

⁷ Abo abalengera ebiri mu maiso n'abalaguzi boonaboona baja kuswazibwa olw'okulemwa okukoba ebituufu. Baja kwegema mu maiso nga baswaire olwa Katonda okubasiriikirira.

⁸ Aye nze, Musengwa Katonda andidhwiza omwoyo gwe, era yampa amaani n'obutatya, okukobera Abaisiraeli omuntu bw'agwaine okubisibwa mu butuufu, era n'okubakobera ebibi bye bakola.

⁹ Imwe abakulu ab'ebikunsu mu Isiraeli muwulire bino: mukyagha okukola ebituufu, era ebikolwa ebyandibaire ebirungi mwabifuulania byaba bibi.

¹⁰ Muzimba Yerusalemu ekibuga kya Katonda nga mukozesa ebyo bye mufuna mu kutemula, ni mu magira agandi agatali matuufu.

¹¹ Abakulembeze baamu bagulirirwa nguzi memale baalamula. Bakabona baamu tibeegeresa mateeka ga Katonda okutoolaku nga bapangisiibwa. Era waire abalanzi baamu, boona bamala kugheebwa mpiiya memale baakoba okwolekebwa kwaibwe. Ate nga boonaboona beefuula okuba nga beesigama ku Musengwa Katonda, era baakoba bati: “Ghazira kabi koonakoona kaja kututuukaku kuba Musengwa Katonda ali n'ife.”

¹² Kale ni ku lwaimwe, olusozi Sioni balirulima ng'oti nimiro, ekibuga kya Katonda Yerusalemu kyasigala agho nga mmungo ya bifunfugu n'olusozi lwonalwona oluliku eisinzizo lwafuuka kibira.