Mika 2 - Baibuli Ekibono kya Katonda 2014

Ebija okutuuka ku abo abakiriga abaavu

¹ Bakagwireku abantu abo ababa mu buliri bwaibwe ni bakyesa obwire nga bayiiya ebibi bye banaakola. Era obwire olukya buti nga bakola nga bwe baba bayiiyiiza.

² Bwe beegwaniza omusiri, nga bagunhaga, oba ndhu, nga batwala butwale. Era nga bwebabisa ebintu eby'omuntu, n'omuntu mwene yeena bwe bamubisa.

³ Musengwa Katonda kyava n'akoba ati: “Bona eno, ndi kuyiiya akabi ke nnaatuusa ku bantu imwe, era ghazira ghe mughanga kukawonera. Mwidha kweyagaana mu buzibu obutoogerekeka n'amalala gabaweemu.

⁴ Olunaku olwo bwe lulituuka, abantu balibayiiyaamu olwembo olw'okubayeeyereza, era beeriza amaziga nga bakoba bati: Ee, ebintu nga bitufiiririire! Musengwa Katonda atutoireku eitaka lyaife, yaaligabira abo abaatutwala mu bunhage.”

⁵ Kale ni ekiseera bwe kirituuka okwiriza abantu ba Musengwa Katonda eitaka abaliba bava mu bunhage, imwe abatuntuza abaavu timuliba na mugabo.

⁶ Abantu bankoba bati: “Totukobera ebyo. Omuntu tagwaine kukoba ku bintu oti n'ebyo. Musengwa Katonda taja kutubonereza na kutuswaza bwaga agho.

⁷ Odhuuba oti Abaisiraeli Musengwa Katonda yatukolimira? Oba oti okuguminkiriza kwe kwakendeera? Mbo bwenebwene Musengwa Katonda aghanga okukola ebintu oti n'ebyo? Buliidho tayogera na kivunika n'abo abakola obulungi?”

⁸ Aye Musengwa Katonda abairamu ati: “Imwe mulumba abantu bange ng'oti abantu abo bazigu baimwe, mwabanhagaku ebivaalo nga tibabakobyeku. Ate nga abantu abo bababitaku nga bali kubeesiga bati ghazira kibi kye munaabakola, era nga tibali kulowooza ku lutalo naire.

⁹ Mubinga abakazi ab'abantu bange mu ndhu dhaibwe mwe bawulirira eisanhu, mwalobera abaana baibwe okubona ku kitiibwa kyange ebyanda n'ebyanda.

¹⁰ Musituke muje, ghano tighakaali miraala. Ekifo kino kija kuzikirizibwa olw'ebibi byaimwe.

¹¹ “Abantu bano benda omulanzi aja ng'abakobera obukwenda obwidhwire okuguya, ng'abakoba ati, ‘Mwidha kufunanga omwenge ogw'emizabbibu n'ebitamiiza ebindi.’

¹² “Aye imwe abantu bange Abaisiraeli, abaliwonagho, nja kubasoloza mbaleete ghalala ng'omwayi bw'asoloza entaama dhe mu kisibo kyadho. Era ekiketezo kyaimwe kija kwiramu okwidhula abantu nga baseregulya buseregulye ng'oti n'ekyayiro ekirimu entaama kamaala.”

¹³ Agho Mika yaalanga ati: “Katonda mwene aja kwiguliragho abantu be, abakulemberemu ng'abatoola mu bunhage. Baja kughagulagho omulyango ogw'ekibuga, babitemu baje nga ghazira na kibakobaku. Musengwa Katonda mwene era kyabazinga waibwe, n'aja okubakulemberamu abafulumye.”