Mika 1 - Baibuli Ekibono kya Katonda 2014

¹ Mu biseera bya Yothamu, n'ebya Ahazi, n'ebya Hezekia, abaali ba kyabazinga ba Buyudaaya, Musengwa Katonda yayoleka Mika ow'omu kyalo Moreshetha ebintu bino ebigema ku Samaria ni ku Yerusalemu.

Mika alira olwa Samaria ni Yerusalemu

² Abantu mwenamwena ab'amaghanga muwulirise; imwe mwenamwena ababa ku nsi mutege kutu. Muwulire! Musengwa Katonda aja kwogerera mu isinzizo lye ery'omu igulu. Aja kubaghaaku obudhulizi obunaabalumiriza.

³ Bona eno, Musengwa Katonda aja kuva mu kifo kye ekitukuvu aidhe. Era bw'aliidha aja kutambulira ku nsozi.

⁴ Buli lusozi lw'alitangaku ekigere nga lusaanuuka ng'oti muzigo bagutaire ku muliro. Era nga luyuyika mu kiiko ng'oti maadhi gayuyika kuva ku lusozi.

⁵ Ebyo bija kubaagho olw'okuba Abaisiraeli baaloba okugondera amateeka ga Musengwa Katonda, baayonoona. Mukoba muti ogwo musango gw'ani? Musango gwa Samaria ekibuga ekikulu kyene! Era mulowooza muti naani avuunaanibwa olw'Abayudaaya okusinza ebitali Katonda? Ti ni Yerusalemu ekibuga ekikulu kyene!

⁶ Kyova Musengwa Katonda akoba ati: “Nja kufuula Samaria kibe mmungo ya bifunfugu ebiri eyo mu nsiko, kibe ekifo ekigwaine obw'okusimbamu amasamba g'emizabbibu. Amabaale ge baazimbisa endhu dhaamu nja kugayugha ere mu kiiko, emisingi gyadho gisigale agho nga gidangalaire?

⁷ “Ebifaananie abantu baamu bye babaire basinzanga, abazigu baibwe baja kubimenhamenha. Ebintu ebyagheebwanga bamalaaya ab'omu masabo byonabyona bija kwokebwa omuliro. Ebyo byonabyona ebisinzibwa ebitali Katonda bija kubungibwa bwagho. Olw'okuba ebintu ebyo byafunibwa mu ebyo ebigheebwa bamalaaya, era n'abazigu boona baidha kubitwala bigheebwe bamalaaya abandi.”

⁸ Agho Mika yaakoba ati: “Ebyo n'ebindiza amaziga naagegenga. Era ndidha kutambulanga madu nga tivaire na ngaito, okwoleka nga bwendi mu bughafu. Ndidha kukubanga oluwungu ng'oti kibe, era ndidha kujanga nga ndira ng'oti maaya.

⁹ Kuba Samaria alwaire amabwa ga kokolo agatali ga kuwona, era gatuuse n'okugema Buyudaaya okuzikirira kuseese kwatuukira irala ku mulyango gwa Yerusalemu, ekibuga abantu bange mwe baba.”

Abazigu baseeta ku Yerusalemu

¹⁰ Aye mutakobera bazigu baife abali mu Gathi, era mutabaganha kubabona nga mulira. Imwe abantu ab'e Betha Leafura mwegalangule mu nkungu okwoleka obubi obw'embeera ye tulimu.

¹¹ Imwe abantu ab'e Shafira mwidha kutwalibwa mu bunhage nga muli madu era nga muswaire. Imwe ababa mu kibuga Zaanaani mutageza ni muva mu kibuga kyaimwe. Bwe munaawulira okulira okuva e Bethezeli munaamanha ng'eyo bw'ezira gha kwewogoma.

¹² Abantu ab'e Marothi beeraliikirivu nga tibaidhi oba banaafuna anaabayamba, kuba babona nga Musengwa Katonda aseesiisa ebizibu kumpi inho ni Yerusalemu.

¹³ Imwe abantu ababa mu kibuga Lakishi musibe ebigaali byaimwe eby'omu lutalo ku mbalaasi dhaimwe mwetegeke. Mwakoopa ebibi eby'Abaisiraeli, mwaleetera ab'e Yerusalemu boona baababoneraku, baatoolera okukola ebibi n'ebirala ebyo.

¹⁴ Mperaano ni, musiibule ekibuga Moreshethi Gathi mukighe n'ebirabo kuba baja kukinhaga. Abantu ab'ekibuga Akazibu, baguya, tibaja kubeera bakyabazinga ba mu Isiraeli naire.

¹⁵ Imwe abantu ab'e Maresha, Musengwa Katonda akobye ati aja kubaleetaku abazigu abanaabaghangula ni bagema ekibuga kyaimwe. Era abakulembeze mu Isiraeli baja kwegisa mu mpuku eri e Adullamu.

¹⁶ Mumweku enviiri okwoleka nga muli kulira abaana baimwe be mugonza. Mughalagate emitwe mube n'empaata ng'oti nsega, kuba abaana baimwe baja kutwalibwa mu bunhage.