Matayo 9 - Baibuli Ekibono kya Katonda 2014

Okuwonia omugogomu

¹ Agho Yesu yaaniina mu lyato, yaasomoka yaatuuka mu kibuga eky'ewaibwe.

² Tibwalwa, nga bamuleetera omuntu eyagogoma, ng'alambaire ku ndiri. Yesu bwe yabona okwikiriza kwaibwe, yaakoba omugogomu ati: “Guma omwoyo mwana wange, ebibi byo bikusoniyiibwa.”

³ Agho, abandi ku Banamateeka, mule munda baakoba bati: “Ono avuma Katonda!”

⁴ Aye Yesu yategeera ebidhuubo byaibwe, yaakoba ati: “Lwaki muba n'ebidhuubo ebibi bityo?

⁵ Kiki ekisinga obwangu? Okukoba oti, ‘Ebibi bikusoniyiibwa,’ oba okukoba oti, ‘Situka otambule’?

⁶ Aye ka mbalage ng'Omwana ow'Omuntu ali n'obukumu ku nsi obusonigha ebibi.” Agho yaakoba omugogomu ati: “Situka, ogeme endiri yo, oje ewaimwe.”

⁷ Yaasituka yaaja ewaibwe.

⁸ Abantu bwe baabona, baatya era baagha Katonda ekitiisa eyagha abantu obukumu obwaga agho.

Yesu ayeta Matayo

⁹ Agho Yesu bwe yali ng'atambula, ng'ava eyo, yaabona omuntu ng'atyaime ghe bawooleza, nga bamweta Matayo, era yaamukoba ati: “Nnonereza.” Yaasituka yaamunonereza.

¹⁰ Bwe yali ng'atyaime ku kiiwulo mu ndhu, abaghooza kamaala n'aboonooni baidha baatyama ni Yesu n'Abeegeresebwa be okulya.

¹¹ Abafarisaayo bwe baabona ekyo, baakoba Abeegeresebwa be bati: “Lwaki omwegeresa waimwe alya n'abaghooza n'aboonooni?”

¹² Yesu bwe yawulira, yaakoba ati: “Abalamu ti n'abenda omuyigha aye abalwaire.

¹³ Kale muje mwege amakulu ga kino, ‘Ekisa kye nhenda aye ti misengo.’ Tinaidha kweta batuufu, aye aboonooni.”

Ebigema ku kusiiba

¹⁴ Agho abeegeresebwa ba Yoanne baidha ye Yesu nga bakoba bati: “Lwaki ife n'Abafarisaayo tusiiba emikuzi kamaala aye nga Abeegeresebwa bo tibasiiba?”

¹⁵ Yesu yaabakoba ati: “Abageni b'oyo abayiiza basobola okunakughala ng'abayiiza akaali nabo? Enaku bwe dhirituuka, abayiiza n'abatoolebwaku, olwo ni balisiiba.

¹⁶ “Ghazira atunga kighero kya lugoye luyaaka mu lugoye lukaire, kuba kikanukagho, ekituli kyeyongera bweyongere.

¹⁷ Era tibata mwenge gwa mizabbibu musu mu nsawo dha luwu nkaire. Bwe bakikola, ensawo dhitulika, omwenge gwafukika era n'ensawo dhaadhagalika. Aye omwenge gw'emizabbibu omusu baguta mu nsawo dha luwu mpyaka, olwo byombi byakuumibwa bukalamu.”

Mughala wa Yairo n'omukazi eyagema ku kivaalo kya Yesu

¹⁸ Yesu bwe yali ng'akaayogera nabo ebyo, omukungu mulala yaatuuka, yaakuba amakiryaivu, yaakoba ati: “Mughala wange yaakakutuka aye idha omugemeku n'omukono gwo, aidha kulama.”

¹⁹ Yesu yaasituka yaamunonereza ghalala n'Abeegeresebwa be.

²⁰ Ghaabaagho omukazi eyali alwaire ekikulukuto okumala emyaka ikumi n'ebiri, yaava emugongo wa Yesu, yaagema ku lusa lw'ekivaalo kye

²¹ kuba mule yali akoba ati: “Ni bwenaagema obw'oku kivaalo kye ndidha kuwona.”

²² Yesu bwe yakyuka yaamubona, yaakoba ati: “Mughala iwe guma omwoyo okwikiriza kwo kukuwoniiza.” Era ku saawa eyo yeene omukazi yaawona.

²³ Yesu bwe yatuuka mu ndhu ey'omukungu, yaabona abafuuyi b'endere n'abantu abaali babyangatana,

²⁴ yaakoba ati: “Muveeyo, omughala tafiire, aye atendwike!” Baamusekerera.

²⁵ Aye bwe baamala okufulumya abantu, Yesu yangira yaamugema ku mukono, omughala yaayemerera.

²⁶ Amawulire gano gaabuna ekiketezo ekyo kyonakyona.

Okuwonia abatulu ababiri

²⁷ Olwava agho, abatulu babiri baamunonereza, bwe baasiikana nga bakoba bati: “Omwana wa Daudi tusaasire!”

²⁸ Yesu bwe yatuuka mu ndhu abatulu baaseeta gh'ali, era yaabakoba ati: “Mwikiriza nga nsobola okubawonia?” Baamukoba bati: “Yii, Musengwa!”

²⁹ Agho yaagema ku maiso gaibwe yaakoba ati: “Kibe kityo nga bwe mwikiriiza.”

³⁰ Agho amaiso gaibwe gaazibuka. Yesu yaabasikirira ati: “Mubone nga tighaba akimanha.”

³¹ Aye bano olwava agho baaja baamulaalaisa mu nsi eyo yoonayoona.

Yesu awonia kasiru

³² Abo bwe baali nga bafuluma, ghaabaagho kasiru ng'aliku omuzimu omubi.

³³ Omuzimu bwe gwamala okubingibwa, kasiru yaayogera abantu kamaala beewuunhia inho, baakoba bati: “Ekintu kiti tikibonekangaku mu Isiraeli!”

³⁴ Aye Abafarisaayo baakoba bati: “Emizimu agibinga na buyinza bwa mukulu waagyo.”

Yesu agemerwa abantu ekisa

³⁵ Agho Yesu yaaja ng'abita mu bibuga byonabyona ni mu byalo, nga bw'ayegeresa mu sinagoga dhaibwe era nga bw'abakobera Amawulire Amalungi ag'Obwakyabazinga yaawonia kiisi bulwaire na bugodhe.

³⁶ Bwe yabona abantu kamaala batyo, yaabagemerwa ekisa, kuba baali beinhamiire era nga babundaire ng'oti n'entaama edhiziraku mwayi.

³⁷ Agho ni yaakoba Abeegeresebwa be ati: “Eby'okukungula biri kamaala, aye abakungula n'abatono.

³⁸ Kale ni musabe mwene bikungulwa asindike abakozi mu bikungulwa bye.”