Matayo 7 - Baibuli Ekibono kya Katonda 2014

Okusalira abandi omusango

¹ “Mutasaliranga bandi musango, olwo mwena bwe gutalibasalirwa

² kuba nga bwe musalira abandi omusango, mwena bwe gulibasalirwa, era n'ekipimo kye munaapimirangamu banaimwe, mwena n'ekiribapimirwamu.

³ Lwaki olingirira akakaba akali mu liiso lya muganda wo, aye n'oloba okubona ekisiki ekiri mu liryo?

⁴ Oba, okoba otya muganda wo oti, ‘Ka nkutoole akakaba mu liiso,’ aye nga mu liiso lyo mulimu ekisiki?

⁵ Mukuusa iwe, sooka otoole ekisiki mu liiso eriryo, memale obone bukalamu akakaba akali mu liiso lya muganda wo n'okukatoolamu.

⁶ “Embwa mutadhighanga bitukuvu, kuba dhisobola okubakyukira dhaabakankada. Ate amabaale ag'omughendo mutagasuuliranga mbiidhi, kuba dhiganiinirira buniinirire.

Musabe, mwagale, mukonkone

⁷ “Musabe muligheebwa mwagale mulizuula mukonkone ku lwigi muliigulirwagho.

⁸ Kuba buli asaba afuna, oyo ayagala azuula, n'oyo akonkona ku lwigi aliigulirwagho.

⁹ Kale naani mu imwe agha omwana we eibaale ng'amusabye omugaati?

¹⁰ Oba ng'amusabye ekyenhandha n'amugha omusota?

¹¹ Kale, oba nga imwe ababi mwidhi okugha abaana baimwe ebirabo ebirungi, Iseimwe ali mu igulu talisingagho inho okugha ebirungi abamusaba?

¹² “Kale ni ebyo byonabyona bye mwenda abantu babakolere, mutyo mwena mubibakolerenga kuba ekyo Amateeka n'abalanzi kye bitegeeza.

Omulyango omufunda

¹³ “Mwingirire mu mulyango omutono kuba omulyango omunene, n'engira enene etuuka mu kuzikirira, era abantu kamaala bagema eyo.

¹⁴ Ate omulyango omutono, n'engira enfunda etuuka mu bulamu, era n'abagizuula batono.

Omuti gumanhirwa ku bibala byagwo

¹⁵ “Mwekuume abalanzi abaguya, abo abaidha ye muli nga beefuula bawolu oti ntaama, ate nga munda n'emisege emiswankuzi.

¹⁶ Mulibamanhira ku bikolwa byaibwe. Koodhi emizabbibu baginoga ku miwa, oba emitiini ku lukandwa?

¹⁷ Omuti omulungi gwania ebibala bikalamu, n'omuti omubi gwayania ebibala ebibi.

¹⁸ Omuti omulungi tigusobola kwania bibala bibi, era n'omuti omubi tigusobola kwania bibala bikalamu.

¹⁹ Buli muti ogutaania bibala bikalamu gutemebwa era gwasuulibwa mu muliro.

²⁰ Kale, ku bikolwa byaibwe kwe mulibamanhira.

Yesu okubeegaana ati tabaidhi

²¹ “Buli muntu andheta ati: ‘Musengwa, Musengwa’, ti n'alingira mu Bwakyabazinga obw'omu igulu, aye oyo akola Lata wange ali mu igulu ky'ayenda.

²² Ku lunaku olwo, abantu kamaala balinkoba bati, ‘Musengwa, Musengwa, titwalanganga mu liina lyo, twabinganga emizimu emibi, era titwakolanga byewuunhio kamaala mu liina lyo?’

²³ Agho ni ndibaatulira nti: tibaidhi naire, munve mu maiso imwe abadheemu.

Yesu ayegeresa ku bazimbi ababiri

²⁴ “Kale buli awulira ebibono byange bino n'abijiiraku afaanana ng'omusaadha omugezigezi eyazimba endhu ye ku lubaale:

²⁵ Amaadhi gaagwa, omwidhuzo gwayoolooka, kiwunga yaakunta, byakuba endhu eyo aye tiyagwa; kuba yali ezimbiibwa ku lubaale.

²⁶ “Aye buli awulira ebibono byange bino n'atabijiiraku afaanana omusaadha omusirusiru eyazimba endhu ye ku musenho:

²⁷ Amaadhi gaagwa, mukoka yayoolooka, kiwunga yaakunta, byakuba endhu eyo era yaagwa, yaamenhekeragho irala.”

²⁸ Yesu bwe yamala okwogera ebibono ebyo abantu beewuunhia endhegeresa ye

²⁹ kuba yali abeegeresa nga mwene buyinza, ti ng'Abanamateeka baibwe.