Matayo 6 - Baibuli Ekibono kya Katonda 2014

Okugabira abaavu

¹ “Mwegendereze ebikolwa byaimwe ebirungi obutabikola mu maiso ga bantu nga mwenda bababone, kuba bwe mukola mutyo timulifuna mpeera wa Iseimwe ali mu igulu.

² “Kale ni bw'ogabiranga abaavu, otajanga ng'ofuuwa magwala, ng'abakuusa bwe bakola mu sinagoga ni mu nguudo, nga benda abantu babaghe ekitiisa. Bwenebwene mbakobera, nti empeera yaibwe bagifunie.

³ Aye iwe bw'ogabanga, toganhanga mukono gwo mugooda kumanha musaadha kye gukola.

⁴ Kityo ni ky'ogabye kyaba kya kyama era Lata wo abona eby'ekyama alikugha empeera.

Okwegeresa ku kusaba

⁵ “Bwe mubanga nga musaba mutabanga ng'abakuusa kuba benda okusaba nga beemereire mu sinagoga ni mu maagaanana ag'enguudo, abantu bababone bwenebwene mbakobera nti empeera yaibwe bagifunie.

⁶ Aye iwe bw'obanga ng'osaba, ongiranga mu kisenge kyo waigalagho olwigi, memale ni waasaba Lata wo oyo ataboneka. Era Lata wo oyo abona eby'ekyama alikugha empeera.

⁷ “Aye mu kusaba mutabalankananga ng'abatatya Katonda bwe bakola, kuba badhuuba bati mu bibono byaibwe kamaala mwe bawulirirwa.

⁸ Kale ni mutafaanana ng'abo, kuba Iseimwe aidhi kye mwenda nga mukaali na kukisaba.

⁹ Agho ni musabanga muti: ‘Iseife ali mu igulu, eriina lyo litiibwe.

¹⁰ Obwakyabazinga bwo bwidhe. By'oyenda bikolebwe mu nsi nga bwe bikolebwa mu igulu.

¹¹ Tughe leero emere yaife eyabuliidho.

¹² Tusonighe ebibi byaife, nga bwe tusonigha abatukola ebibi.

¹³ Totutwala mu kulebwa, aye tulokole mu bubi.’

¹⁴ “Bwe munaasonighanga abantu ebibi byaibwe Iseimwe ow'omu igulu mwena anaabasonighanga ebibi byaimwe.

¹⁵ Aye bwe mutaasonighenga bantu, ni Iseimwe taabasonighenga bibi byaimwe.

Okwegeresa ku kusiiba

¹⁶ “Bwe musiibanga, mutadhuunianga ng'abakuusa: Kuba beeyonoona emboneka yaibwe baboneke mu bantu nga basiiba. Bwenebwene ka mbakobere, abo empeera yaibwe bagifunie.

¹⁷ Iwe bw'osiibanga, osiiganga omutwe gwo omuzigo, era amaiso go oganaabanga,

¹⁸ olobe kuboneka mu bantu ng'osiiba, aye Lata wo ali mu ngiso n'abe akubone oyo Lata wo abona eby'ekyama alikugha empeera.

Okubiika eby'obukombe mu igulu

¹⁹ “Oteebiikiranga bya bukombe mu nsi muno, ebisiisa n'okutalaiga mwe bibyonoonera, n'abaibi mwe basima ni babiiba.

²⁰ Mwebiikire eby'obukombe mu igulu, eyo ebisiisa waire okutalaiga ye kutabyonoonera, era abaibi ye batasima waire okwiba;

²¹ kuba obukombe bwo ghe buli n'omwoyo gwo ghe guba.

Eitaala ery'omubiri

²² “Eriiso n'eitaala ery'omubiri. Kale eriiso lyo bweriba eiramu, omubiri gwo gwonagwona gwidhula obutangaavu.

²³ Aye eriiso lyo bweriba eibi, omubiri gwo gwonagwona guba mu nzikiiza. Kale ni oba nga obutangaavu obuli mu iwe bufuuse nzikiiza, memale olwo enzikiiza yeene enaayaga gha?

Katonda n'eby'obufuni

²⁴ “Ghazira asobola kugheereza basengwa babiri kuba, oba alikyagha mulala yaayenda owundi, oba aligumira ku mulala yaasambaadha owundi. Timusobola kugheereza Katonda ate na bya bufuni.

Okweta mu mikono gya Katonda

²⁵ “Kyenva mbakoba nti: muteeraliikiriranga mu bulamu bwaimwe kye munaalya oba kye munaanhwa, waire omubiri gwaimwe kye munaavaala. Obulamu ti bwa mughendo okusinga emere? N'omubiri ti gwa mughendo okusinga eby'okuvaala?

²⁶ Mubone enhonhi tidhirima mere, tidhikungula, tidhitereka mu byagi, aye Iseimwe ali mu igulu adhigha okulya! Imwe timuli ba mughendo y'ali okusinga enhonhi?

²⁷ Naani ku imwe, ni bwe yeeraliikirira atya, asobola okwongera akaseera ku bulamu bwe?

²⁸ “Eby'ebivaalo lwaki mubyeraliikirira? Mudhuubirize ku bimuli eby'omu nsiko nga bwe bikula: ghazira kye bikola waire kuluka ngoye.

²⁹ Aye ka mbakobere, waire Solomoni mu kitiisa kye kyonakyona tiyavaalanga ng'ekirala ku ebyo.

³⁰ Kale oba Katonda avaaza atyo eisubi ery'omu nsiko eririgho leero ate enkyo ni lisuulibwa mu muliro, talisingagho kubavaaza, imwe abali n'okwikiriza okutono?

³¹ “Kale ni muteeraliikiriranga nga mukoba muti tunaalya ki? Oba muti tunaanhwa ki? Oba muti tunaavaala ki?

³² Abataidhi Katonda n'abanoonia ebyo imwe Iseimwe ali mu igulu aidhi ati ebyo byonabyona mubyenda.

³³ Kale ni musookenga kunoonia Bwakyabazinga bwa Katonda n'obutuufu bwe, era byonabyona biribongerwaku.

³⁴ Mulekenga ni kweraliikirira byaidho kuba olwaidho lulyeraliikirira ebyalwo, buli lunaku luli n'ebizibu ebirumala.