Matayo 5 - Baibuli Ekibono kya Katonda 2014

Okwegeresa okwali ku lusozi

¹ Agho Yesu bwe yabona abantu kamaala batyo, yaaniina ku lusozi, era bwe yamala okutyama, Abeegeresebwa be baaseeta gh'ali.

² Yaabeegeresa ng'akoba ati:

Enkabi

³ “Ba nkabi abaavu mu mwoyo, kuba Obwakyabazinga obw'omu igulu bwaibwe.

⁴ Ba nkabi abagegenga, kuba balyesiima.

⁵ Ba nkabi abawombeefu, kuba baligheebwa ensi Katonda ye yasuubiza.

⁶ Ba nkabi abalumwa endhala n'endiwo ey'okukola ebituufu, kuba baliigusibwa.

⁷ Ba nkabi ab'ekisa, kuba balisaasirwa.

⁸ Ba nkabi ab'omwoyo omulungi, kuba balibona Katonda.

⁹ Ba nkabi abakolerera emiraala, kuba balyetebwa baana ba Katonda.

¹⁰ Ba nkabi abakirigibwa olw'obutuufu, kuba Obwakyabazinga obw'omu igulu bwaibwe.

¹¹ “Muli ba nkabi bwe banaabavumanga, ni babakiriga, era ni baboogeraku buli kibi kyonakyona olw'okuba nze, nga basubagha.

¹² Musangaale era musagambe, kuba empeera yaimwe eri mu igulu nnene. Kuba batyo bwe baakiriga abalanzi abaabasooka.

Omuunhu era ekimulika

¹³ “Niimwe omuunhu ogw'ensi. Aye omuunhu bwe guwaamu ensa gwiramu gutya ensa! Kuba guba tigukaali na mugaso okutoolaku okusuulibwa ku luya abantu baagutyankirira.

¹⁴ “Niimwe ekimulika eky'ensi. Ekibuga ekizimbwa ku lusozi tikighanga kugisibwa.

¹⁵ Era tibakunaania itaala ni balifundikira mu kiibo, aye balighanika ku kikondo lyamulisa boonaboona ababa mu ndhu.

¹⁶ Ekimulika kyaimwe kyakire abantu kityo, babone ebikolwa byaimwe ebikalamu, baghe Iseimwe ow'omu igulu ekitiisa.

Okwegeresa ku Mateeka

¹⁷ “Muleke kudhuuba muti naidha okudibya Amateeka oba abalanzi, tyaidha kudibya aye kutuukiriza.

¹⁸ Bwenebwene mbakobera nti, okutuusa ng'eigulu n'ensi biwoiregho, enukuta endala waire akatoonheze akalala, tibiridibizibwa mu Mateeka, okutuusa nga byonabyona bibairegho.

¹⁹ Kale oyo yeenayeena alimenha ekirala ku biragiro bino ebitonioli, era n'ayegeresa atyo abantu, alyetebwa asembayo mu Bwakyabazinga obw'omu igulu aye oyo abigema era n'abyegeresa, alyetebwa wa kitiisa mu Bwakyabazinga obw'omu igulu.

²⁰ Ka mbakobere: okutoolaku ng'obutuufu bwaimwe busingaku obw'Abanamateeka n'Abafarisaayo, timulingira mu Bwakyabazinga bwa mu igulu.

Okwegeresa ku busungu

²¹ “Mwawulira nga bakoba ab'eira bati, ‘Otaitanga, oyo yeenayeena aliita alisalirwa omusango.’

²² Aye nze mbakoba nti, buli muntu alikoba muganda we ati, ‘Raka,’ alisalirwa omusango mu mbuga ate oyo alikoba ati, ‘Musiru iwe’, alisalirwa omusango gwa kusuulibwa mu muliro gwa geyeena.”

²³ Kale ni bw'oba otwala ekirabo kyo ku alutaari n'oidhukirira eyo oti muganda wo akuliku ekibono,

²⁴ leka agho ekirabo kyo mu maiso ga alutaari, oje otabagane ni muganda wo, memale oidhe ogheeyo ekirabo kyo.

²⁵ Isania ni y'owoza naye nga mukaali mu ngira, y'owoza naye alobe kukutwala ya mulamuzi, omulamuzi kukugemya mwisirukale kukusuula mu ikomera.

²⁶ Bwenebwene nkukobera nti, toliva omwo okutuusa ng'omaze okusasula n'akasente akasembayo.

Okwegeresa ku bwenzi

²⁷ “Mwawulira nga bakoba bati, ‘Toyendanga.’

²⁸ Aye nze mbakoba nti, buli alingirira omukazi olw'okumwegomba, aba amwenzeeku mule mu mwoyo.

²⁹ Kale oba nga eriiso lyo ery'oku mukono omusaadha likusuula mu kibi, litoolemu olisuule ekisingaku n'ekitundu ekirala ku iwe okuzikirira aye omubiri gwo gwonagwona gwaloba kusuulibwa mu geyeena.

³⁰ Oba nga omukono gwo omusaadha gukusuula mu kibi, gutemeku ogusuule kuba kisinga, ekitundu ekirala ku iwe okuzikirira aye omubiri gwo gwonagwona gwaloba kuja mu geyeena.

Okwegeresa ku kunoba

³¹ “Era kyakobwa kiti, ‘Oyo yeenayeena abinganga mukazi we amughanga embaluwa ey'okumubinga.’

³² Aye nze mbakoba nti, kiisi anaabinganga mukazi we, okutoolaku ng'amulanga bwenzi, aba amuleeteire okwenda ate n'oyo abayiza omukazi ye babinze aba ayenze.

Okwegeresa ku kulayira

³³ “Era mwawulira nga bakoba ab'eira bati, ‘Tolayiranga bya kusubagha, aye otuukirizanga by'olayiriire Musengwa.’

³⁴ Aye nze mbakoba nti: Mutalayiranga naire, waire okulayira eigulu, kuba n'ekityamo kya Katonda;

³⁵ waire ensi, kuba ni kw'ata ebigere bye; waire Yerusalemu, kuba n'ekibuga kya Kyabazinga omukulu;

³⁶ waire okulayira omutwe gwo, kuba n'oluviiri olulala tosobola kulufuula lweru oba lwirugavu.

³⁷ Endhogera yaimwe ebenga eti, ‘Yii,’ oba eti, ‘Busa!’ Kuba ekisinga ku ebyo nga kiviire mu mubi.

Okwegeresa ku kwesasuuza

³⁸ “Mwawulira nga bakoba bati, ‘Eriiso lisasulwa na liiso, n'eriino lisasulwa na liino.’

³⁹ Aye nze mbakoba nti: Mutatakanianga mubi era ole bw'akukubanga ku itama ery'omukono omusaadha omugaluliranga n'erindi.

⁴⁰ Ole ayenda okuwoza n'iwe atwale ekanzu yo, omulekeranga n'ekooti

⁴¹ Era oyo akukaka okuja naye kilomita endala, ojanga naye ibiri.

⁴² Oyo akusabanga omughanga, era n'oyo ayenda okukweyazikwaku omughanga.

Okugonza abazigu

⁴³ “Mwawulira nga bakoba bati, ‘Ogonzanga mukagwa wo era waakyagha omuzigu wo.’

⁴⁴ Aye nze mbakoba nti: Mugonzanga abazigu baimwe, era musabiranga abo ababakiriga.

⁴⁵ Memale olwo mube abaana ba Iseimwe ali mu igulu ayakiza endhuba ye abalungi n'ababi, n'agwikiza amaadhi ge abo abakolera ku mazima n'abatagakoleraku

⁴⁶ kuba bwe mugonza abo ababagonza mufunamu ki? Abaghooza boona tibwebakola?

⁴⁷ Era oba nga mulamusa baganda baimwe bonka, kye musinga abandi kiri gha? N'abantu ab'ensi batyo tibwebakola?

⁴⁸ Kale ni, imwe mubenga batukuvu nga Iseimwe ow'omu igulu bw'ali omutukuvu.