Matayo 4 - Baibuli Ekibono kya Katonda 2014

Yesu akemebwa

¹ Agho Mwoyo yaatwala Yesu mu irungu, Sitaani amukeme.

² Bwe yamala okusiiba enaku amakumi ana (40), omusana n'obwire, endhala yaamuluma.

³ Omukemi yaaseeta, yaamukoba ati: “Oba oli Mwana wa Katonda koba amabaale gano gafuuke emigaati.”

⁴ Aye Yesu yaakoba ati: “Kyaghandiikibwa kiti: ‘Omuntu taba mulamu lwa mugaati gwonka, aye na buli kibono ekiva mu munwa gwa Katonda.’ ”

⁵ Agho Sitaani yaatwala Yesu mu kibuga ekitukuvu, yaamuniinia ku kasulya ak'eisinzizo,

⁶ yaamukoba ati: “Oba oli Mwana wa Katonda, weesuule ghansi kuba kyaghandiikibwa kiti: ‘Aliragira bamalaika be baakugemerera mu mikono gyaibwe, olobe kwekontola kigere ku ibaale.’ ”

⁷ Yesu yaamukoba ati: “Era kyaghandiikibwa kiti, ‘Tokemanga Musengwa Katonda wo.’ ”

⁸ Kabiri Sitaani yaamutwala ku lusozi oluleeyi einho, yaamulaga obwakyabazinga obw'ensi n'ekitiisa kyabwo.

⁹ Era yaamukoba ati: “Ebyo byonabyona ndidha kubikugha bwe weeyala ghansi n'onsinza.”

¹⁰ Agho Yesu yaamukoba ati: “Sitaani ja ere! Kuba kyaghandiikibwa kiti, ‘Osinzanga Musengwa Katonda wo, era ni yenka y'ogheerezanga.’ ”

¹¹ Agho Sitaani yaamuleka, era bamalaika baidha baamugheereza.

Yesu atoolera okwegeresa mu Galilaaya

¹² Agho Yesu bwe yawulira ati Yoanne bamugemye, yaaja e Galilaaya.

¹³ Yaava e Nazarethi, yaaja yaaba e Kaperinaumu eky'oku nhandha, mu biketezo eby'e Zebuluni ni Nafutali

¹⁴ okutuukiriza omulanzi Isaia kye yakoba, ati:

¹⁵ “Ekiketezo kya Zebuluni n'ekya Nafutali, ku ngira ey'oku nhandha ng'osomoike Yorudani. Galilaaya ey'abamaghanga agandi!

¹⁶ Abantu abaabanga mu kizikiiza baboine obutangaavu obunene. N'abo ababaire mu nsi ey'olumbe n'ekinsense kyayo, ekimulika kibaakiire.”

¹⁷ Okuva olwo Yesu yainhama okwegeresa n'okukoba ati: “Mwenenie kuba Obwakyabazinga obw'omu igulu buseese.”

Ayeta abavubi bana

¹⁸ Yesu yali ng'atambula ku mbali okw'enhandha ey'e Galilaaya, yaabona aboluganda babiri: Simoni ayetebwa Petero ni Anderea muganda we, nga bali kutega akatimba mu nhandha kuba baali bavubi.

¹⁹ Yaakoba ati: “Munnonereze, ndidha kubafuula abavubi ab'abantu.”

²⁰ Era mangu ago baaleka obutimba baamunonereza.

²¹ Bwe yava agho, yeeyongerayo, yaabona aboluganda abandi babiri: Yakobo ni Yoanne, abaana ba Zebedaayo, nga bali mu lyato n'iseibwe Zebedaayo nga batereeza obutimba bwaibwe yaabeeta.

²² Era mangu ago baaleka eryato ni iseibwe, baamunonereza.

Ayegeresa era bw'awonia n'abalwaire kamaala

²³ Agho Yesu yeezungulula Galilaaya yoonayoona, ng'ayegeresa mu sinagoga dhaibwe, era ng'abakobera Amawulire Amalungi ag'Obwakyabazinga yaawonia buli bulwaire na buli bugodhe mu bantu.

²⁴ Yaawulikika mu Siria mwonamwona baamuleetera boonaboona abaali obubi: abaalwala endwaire edha buli nsambo, n'abaali na buli kibaluma, abaaliku emizimu, n'abasimbu, n'abalema, era yaabawonia.

²⁵ Ebiyindi by'abantu byava mu Galilaaya, ni mu Dekapoli, ni mu Yerusalemu, ni mu Buyudaaya, n'okusomoka Yorudani, byamunonereza.