Matayo 3 - Baibuli Ekibono kya Katonda 2014

Okwegeresa kwa Yoanne Omubatiza

¹ Mu nnaku edho, Yoanne Omubatiza yaatuuka era yaayegeresa mu irungu ery'e Buyudaaya,

² yaakoba ati: “Mwenenie kuba Obwakyabazinga obw'omu igulu buseese.”

³ Ono, omulanzi Isaia ye yayogeraku bwe yakoba ati: “Ghaligho amamiro g'oyo alangirira mu irungu ati: ‘Mutegeke Musengwa gh'anaabita, era mutereeze obugira bwe.’ ”

⁴ Yoanne ono, yali n'ekivaalo kye nga kya buviiri bwa ngamiya n'olukoba olw'oluwu mu nkende era emere ye yali nga nzige na mudheenene gwa mu nsiko.

⁵ Abantu okuva e Yerusalemu ni mu Buyudaaya mwonamwona, ni mu biketezo ebiriinaine omwiga Yorudani boonaboona baaja y'ali

⁶ era yaababatiza mu mwiga Yorudani nga bwe baatula ebibi byaibwe.

⁷ Bwe yabona Abafarisaayo kamaala n'Abasaddukaayo nga baidha y'ali okubatizibwa, yaabakoba ati: “Imwe eizaire ery'emisota naani eyabalabula okulumuka ekibonerezo ekiri kwidha?

⁸ Kale ni mwanie ebibala ebyoleka okwenenia.

⁹ Era muteeyinula nga mukoba muti, ‘Tuli ni iseife Aburahamu,’ kuba, ka mbakobere, mu mabaale gano Katonda aghanga okufuniramu Aburahamu abaana!

¹⁰ Kwo n'okuba empasa eteereibwa ku kikolo eky'emiti kale buli muti ogutaania bibala bikalamu gwa kutemebwa gusuulibwe mu muliro.

¹¹ “Bwenebwene nze mbabatiza na maadhi okulaga okwenenia kwaimwe, aye anvaaku einhuma n'asinga nze obukumu, oyo ye ntagwanira na kuba mu kifo kye alibatiza mu Mwoyo Mutukuvu ni mu muliro.

¹² Agemye olugali mu ngalo, aidha kulongoosa bukalamu ekifo kye aghakubirwa engaano, engaano agikungaanize mu kyagi, omusinsi agwokye mu muliro ogutazikira.”

Okubatizibwa kwa Yesu

¹³ Agho Yesu yaava e Galilaaya yaatuuka ku Yorudani ye Yoanne, Yoanne amubatize.

¹⁴ Yoanne yaagezaaku okumulobera ng'akoba ati: “Ninze ngwaine iwe ombatize kabiri niiwe oidha ye ndi?”

¹⁵ Yesu yaamukoba ati: “Mperaano leka kibe kityo kuba tutyo ife bwe tugwaine okutuukiriza obutuufu bwonabwona.” Agho yaamuganha.

¹⁶ Yesu bwe yamala okubatizibwa, mangu ago yaava mu maadhi, era okuja okubona ng'eigulu limubwikulirwa, yaabona Mwoyo wa Katonda ng'aika ng'enjiibwa, ng'amwikaku.

¹⁷ N'eiroboozi lyava mu igulu lyakoba liti: “Ono ni mutabane wange omugonzi, mwe neesiimira einho.”