Matayo 28 - Baibuli Ekibono kya Katonda 2014

Okuzuukira kwa Yesu

¹ Olwa Sabbato bwe lwabita memale mu nkyonkyo ku lunaku olusooka ku Sabbato, Maria Magadalene ni Maria ole owundi baaja okuluutaku y'amagombe.

² Ghaabaagho musisi ow'amaani kuba malaika wa Musengwa yaikirira okuva mu igulu, yaidha yaagalangula eibaale yaalitoolagho yaalityamaku.

³ Yali afaanana ng'oti lukuba, n'ekivaalo kye nga kyeru oti mugozi.

⁴ Abakuumi baamutya inho baadhugumira, baaba oti bafiire.

⁵ Malaika yaakoba abakazi ati: “Mutatya, kuba ndidhi muli kwagala Yesu eyakomererwa ku musalaba.

⁶ Muno aziramu kuba azuukire nga bwe yakoba. Mwidhe mubone ekifo ghe yabaire ateereibwa.

⁷ Era mutezeeku muje mukobere Abeegeresebwa be muti, ‘Azuukire mu bafu, era abeesoosengayo e Galilaaya, eyo ye mulimubonera.’ Timwerabira bye mbakobeire.”

⁸ Baafuluma mangu mu magombe nga batya, ate n'eisanhu lingi baalumuka okukobera Abeegeresebwa be.

⁹ Tibwalwa Yesu yaabaagaana yaabakoba ati: “Miraala!” Baaseeta baamugema ku bigere, baamusinza.

¹⁰ Yesu yaabakoba ati: “Mutatya aye muje mukobere baganda bange, baje e Galilaaya eyo ye balimbonera.”

¹¹ Bwe baali baja abandi ku bakuumi baidha mu kibuga baakobera Bakabona Abakulu byonabyona ebyaligho.

¹² Bakabona Abakulu beesoloza n'abakulu ab'ebika, beekobaana baagha abakuumi empiiya kamaala.

¹³ Baabakoba bati: “Mukobere abantu muti, ‘Abeegeresebwa be baidha obwire baamwiba nga ife tutendwike.’

¹⁴ Era ekyo omufuzi bw'anaakiwulira, ife twidha kumwinhonhola tubawonie omusango.”

¹⁵ Baatwala empiiya baakola nga bwe baabakoba. Ekibono ekyo kyabuna mu Buyudaaya n'okutuusa buti.

Okutumibwa kw'Abeegeresebwa

¹⁶ Agho, Abeegeresebwa eikumi n'omulala baaja e Galilaaya, ku lusozi Yesu lwe yali abakobye.

¹⁷ Bwe baamubona, baamusinza aye abandi tibaakakasa.

¹⁸ Yesu yaaseeta yaayogera nabo ati: “Nagheebwa obuyinza bwonabwona mu igulu ni mu nsi.

¹⁹ Kale ni muje mu maghanga goonagoona, abantu mubafuule beegeresebwa, nga mubabatiza mu liina lya Lata n'erya Mwana, n'erya Mwoyo Mutukuvu

²⁰ nga mubeegeresa okugema byonabyona bye nabalagira, era mwidhukire nga nze ndi n'imwe enaku dhoonadhoona okutuusa ku nkomerero ey'ensi.”