Matayo 27 - Baibuli Ekibono kya Katonda 2014

Yesu ng'ali mu maiso ga Pilato

¹ Obwire bwe bwakya, Bakabona Abakulu boonaboona n'abakulu ab'ebika baateesa ensambo ey'okwitamu Yesu.

² Agho baamusiba baamutwala era baamughaayo ew'omufuzi Pilato.

Okufa kwa Yuda

³ Agho Yuda, eyamulyamu olukwe, bwe yabona nga bamusalire gwa kufa, yeenenia. Yaizaayo ebitundu bya feeza bire amakumi asatu ye Bakabona Abakulu n'abakulu ab'ebika.

⁴ Yaabakoba ati: “Nayona okughaayo omusaayi ogw'omuntu azira musango.” Aye baamukoba bati: “Ebyo bibyo ife tibitugemaaku.”

⁵ Agho Yuda yaasuula ebitundu bya feeza bire mu isinzizo. Yaava agho, yaaja yeetuga.

⁶ Aye Bakabona Abakulu baatoola ebitundu bya feeza ebyo bakoba bati: “Tikiikirizibwa kuta mpiiya dhino mu ndyanga ya isinzizo, kuba mpiiya dha musaayi.”

⁷ Agho ni baateesa, era baadhigulamu ekibandha eky'omuwumbi, nga n'omw'okuziikanga abatamanhiibwa.

⁸ Kyova ekibandha ekyo kyetebwa ekibandha eky'omusaayi ni ye buli eno.

⁹ Agho kyatuukirira Yeremia omulanzi kye yalanga ng'akoba ati: “Baatoola feeza emwamwa amakumi asatu, omughendo ogugula oyo, abandi ku bantu ba Isiraeli gwe baasalagho okumutunda,

¹⁰ baagulamu ekibandha eky'omuwumbi, nga Musengwa bwe yankoba.”

Pilato abuuza Yesu ebibuuzo

¹¹ Agho Yesu yaayemerera mu maiso ag'omufuzi, Pilato era Pilato yaamubuuza ati: “Niiwe kyabazinga ow'Abayudaaya?” Yesu yaakoba ati: “Niiwe okyogeire.”

¹² Aye Bakabona Abakulu n'abakulu ab'ebika bwe baamuseegha azira kye yairamu.

¹³ Agho Pilato n'okumukoba ati: “Towulira byaga agho bano bye bakuvunaana?”

¹⁴ Yaaloba kumwiramu waire kibono kirala, era omufuzi oyo yeewuunhia ekibitiriire.

Yesu asalirwa ogw'okufa

¹⁵ Mperaano, buli ku lunaku olw'Ekibinuko eky'Okubitizibwa, omufuzi oyo yali amanhiriire okulekulirayo abantu omusibe mulala ye baabanga nga basabye.

¹⁶ Ku mukuzi guno ghaaligho omusibe eyali amanhiibwa einho, nga ni Barabba.

¹⁷ Kale, bwe baali nga beesoloiza, Pilato yaabakoba ati: “Mwenda mbalekulire ani? Barabba oba Yesu ayetebwa Kurisito?”

¹⁸ Kuba yali aidhi nga baamughaayo lwa nsaalwa.

¹⁹ Mperaano, Pilato bwe yali ng'atyaime ku kityamo kye eky'obulamuzi, mukazi we yaamutumira obukwenda nga bukoba buti: “Omuntu oyo azira musango otaba ni ky'omukola kuba ebintu by'oyo kamaala byandaaziiza mu kirooto.”

²⁰ Aye Bakabona Abakulu n'abakulu ab'ebika baapikiriza abantu basabe Barabba, aye Yesu aitibwe.

²¹ Omufuzi oyo yairamu kabiri yaabuuza ati: “Ku babiri naani ye mwenda mbalekulire?” Baakoba bati: “Barabba.”

²² Pilato yaabakoba ati: “Memale olwo Yesu ayetebwa Kurisito mmukole ki?” Boonaboona baakoba bati: “Mukomerere ku musalaba.”

²³ Aye yaabakoba ati: “Lwaki, yakola kibi ki?” Aye bale baakaalaama bukaalaame nga bakoba bati: “Akomererwe ku musalaba.”

²⁴ Pilato bwe yabona nga byonabyona bya bwereere, okudhagalala nga n'okuligho, yaatoola amaadhi yaanaaba mu ngalo mu maiso ag'eikuukuubira ng'akoba ati: “Nze nzira musango ku kuyugha omusaayi ogw'omuntu ono niimwe beene abalibona.”

²⁵ Abantu boonaboona baakoba bati: “Omusaayi gwe gube ku ife ni ku baana baife.”

²⁶ Agho Pilato yaabalekulira Barabba ate Yesu nga bamaze okumuwaiga enkoba, yaamubagemya bamukomerere ku musalaba.

Abaisirukale badaaza Yesu

²⁷ Agho abaisirukale ab'omufuzi oyo baatwala Yesu munda mu kisaagaati ekyetebwa Puraetorio, era eigye lyonalyona lyesololeza gh'ali.

²⁸ Baamutoolamu ebivaalo bye, baamuvaaza olugoye olw'ekitiibwa olwa kasaayisaayi.

²⁹ Baaluka engule ey'amawa baagimuta ku mutwe, baamugemya n'olugada mu mukono omusaadha. Agho ni baakuba amakiryaivu mu maiso ge baamukiina nga bakoba bati: “Ghangaala Kyabazinga ow'Abayudaaya!”

³⁰ Baamufuudhaku amatanta, baatoola olugada baamukonta mu mutwe.

³¹ Agho nga bamaze okumudaazadaaza, baamutoolamu olugoye olumyufu, baamuvaaza ebivaalo bye, baamutwala okumukomerera ku musalaba.

Yesu aitibwa

³² Bwe baali bafuluma bati, baayagaana omusaadha Omukurenayo, ye baayetanga Simoni ono baamukaka okubbeeda omusalaba gwa Yesu.

³³ Baatuuka mu kifo ekyetebwa Gologotha, ekitegeeza ekifo eky'ekighanga.

³⁴ Agho baamugha omwenge ogw'emizabbibu okunhwa nga gutabwirwamu ekintu ekikaagha era bwe yakombaku yaaloba kugunhwa.

³⁵ Bwe bamala okumukomerera ku musalaba, baagabana ebivaalo bye nga babikubaku akalulu.

³⁶ Baatyama agho baamukuuma.

³⁷ Agho nga ghaigulu gh'omutwe gwe baataagho ensonga ye baamulanga ng'eghandiikiibwa eti: ONO NI YESU KYABAZINGA OW'ABAYUDAAYA.

³⁸ Baamukomerera n'abanhazi babiri omulala ku mukono omusaadha, ate owundi ku mugooda.

³⁹ Ababise baamuvuma bwe batengeesa emitwe gyaibwe,

⁴⁰ nga bakoba bati: “Iwe omenha eisinzizo, ate n'olizimba mu nnaku eisatu! Oba ng'oli Mwana wa Katonda weewonie, va ku musalaba oike.”

⁴¹ Era ni Bakabona Abakulu baakoba n'ekirala, baamukiina, aghalala n'Abanamateeka n'abakulu ab'ebika baakoba bati:

⁴² “Yawonianga abandi, mwene taghanga kwewonia! Mbu ni kyabazinga wa Isiraeli, mperaano aike ave ku musalaba, olwo tumwikirize.

⁴³ Yeesiga Katonda. Mperaano amuwonie, oba nga amwenda kuba yakobanga ati Mwana wa Katonda.”

⁴⁴ Abanhazi be baamukomerera nabo boona batyo baamuduula.

Okufa kwa Yesu

⁴⁵ Mperaano, okuva ku saawa eyomukaaga enzikiiza yaagema ensi yoonayoona okutuuka ku saawa eyomwenda.

⁴⁶ Era nga ku saawa eyomwenda, Yesu yaaleekaana ati: “Eloi, Eloi, lama sabakitani?” Ekitegeeza kiti: “Katonda wange, Katonda wange, lwaki ondekuliire agho?”

⁴⁷ Abandi ku baali beemereire agho olwakiwulira baakoba bati: “Ali kweta Eliya!”

⁴⁸ Era mangu ago owundi yaalumuka yaatoola ekyangu yaakiinhika mu mwenge ogw'emizabbibu endoota, era yaakita ku lugada yaamugha anhwe.

⁴⁹ Aye abandi baakoba bati: “Leka tubone oba nga Eliya anaidha okumuwonia.”

⁵⁰ Yesu kabiri yaaleekaana mu iroboozi ery'amaani, era bwe yamala yaisa omuuka ogwasembayo.

⁵¹ Agho olusuubo olw'omu isinzizo lwakanukamu ghabiri, okuva ghaigulu okutuuka ghansi ensi yeesuukunda, embaale dhaayatika.

⁵² Amagombe gaiguka, era emibiri kamaala egy'abatuukirivu abaafa gyazuukizibwa,

⁵³ baava mu magombe. Era ng'amaze okuzuukira baaja mu kibuga ekitukuvu era abantu kamaala baababona.

⁵⁴ Agho omukulu w'ekikunsu eky'abaisirukale n'abo abaali naye nga bakuuma Yesu bwe baabona musisi n'ebintu engeri ye byabaamu, baatya ekibitiriire, baakoba bati: “Bwenebwene, ono abaire Mwana wa Katonda!”

⁵⁵ Agho era ghaaligho abakazi kamaala, abaali bali kulengera nga baliku ghala, abaanonereza Yesu okuva e Galilaaya nga bamugheereza.

⁵⁶ Mu abo mwalimu Maria Magadalene ni Maria mukaire wa Yakobo ni Yosefu, ni mukaire wa batabane ba Zebedaayo.

Okuziikibwa kwa Yesu

⁵⁷ Eigulo bwe lyatuuka ghaidhagho omusaadha omukombe okuva mu Arimathea, eriina lye nga ni Yosefu, ate ng'era yali mwegeresebwa wa Yesu.

⁵⁸ Ono yaaja ye Pilato yaamusaba omulambo gwa Yesu. Pilato yaalagira bagumughe.

⁵⁹ Agho Yosefu yaatoola omulambo yaaguzinga mu lugoye olweru.

⁶⁰ Yaaguta mu magombe agage amayaaka, ge yali asimye mu lubaale. Agho yaagalangula ogubaale ogunene yaaguta mu mulyango ogw'amagombe, yaagolola.

⁶¹ Maria Magadalene ni Maria ole owundi baali agho nga batyaime nga balingiriire amagombe.

⁶² Ku lunaku olwairirira nga n'olunaku olwiririra okutegeka, Bakabona Abakulu n'Abafarisaayo baaja ewa Pilato.

⁶³ Baakoba bati: “Musengwa twidhukiire ng'omuguya oyo bwe yali ng'akaali mulamu yakoba ati, ‘Nga ghabiseegho enaku isatu ndizuukira.’

⁶⁴ Kale ni lagira amagombe gakuumirwe irala okutuusa olunaku olwokusatu, tomanha Beegeresebwa bwe baidha ni bamwiba ate ni bakoba bantu bati, ‘Azuukire mu bafu.’ Era olwo obuguya obunairirira bwidha kuba bubi okusinga obwasooka.”

⁶⁵ Pilato yaabakoba ati: “Abakuumi muli nabo. Muje mukuume nga bwe mughanga.”

⁶⁶ Agho baaja baakalangula amagombe nga eibaale balitaaku akamanhiso, era baataagho n'abakuumi.