Matayo 26 - Baibuli Ekibono kya Katonda 2014

Olukwe olw'okwita Yesu

¹ Agho olwatuuka, Yesu bwe yamala okwogera ebyo byonabyona yaakoba Abeegeresebwa be ati:

² “Mwidhi ng'ebulayo enaku ibiri Ekibinuko eky'Okubitizibwa kituuke, era Omwana w'Omuntu aidha kugheebwayo akomererwe ku musalaba.”

³ Agho Bakabona Abakulu n'abakulu ab'ebika beesololeza mu kisaagaati kya Kayafa Omukulu wa Bakabona,

⁴ baasala olukwe olw'okugema Yesu mu ngiso bamwite.

⁵ Aye Bakabona baakoba bati: “Tutakikola ku lunaku lukulu, tomanha bantu bwe bakola keegugungo.”

Yesu bamusiiga omuzigo e Bethania

⁶ Agho Yesu bwe yali e Bethania mu ndhu ya Simoni eyali n'endwaire ey'ebigenge,

⁷ ng'ali ku kiiwulo alya, omukazi yaidha ng'ali n'akadoome ka alabasituro, nga kalimu omuzigo ogw'omughendo, yaagusiiga ku mutwe gwa Yesu!

⁸ Abeegeresebwa olwakibona baanakughala, baakoba bati: “Lwaki omuzigo ogwo gwonooneibwa?

⁹ Omuzigo ogwo gwandibaire gusobola okutanibwamu empiiya kamaala, dhaagheebwa abaavu.”

¹⁰ Aye Yesu yaakimanha, yaakoba ati: “Lwaki mutabula omukazi ono? Ekikolwa ky'ankoleire kikalamu

¹¹ kuba abaavu muli nabo buliidho, aye nze timwidha kuba ninze buliidho.

¹² Era kino ky'akoze okunsiiga omuzigo ku mubiri kibaire kunziraga.

¹³ Bwenebwene ka mbakobere: Buli Amawulire Amalungi gano ye galikoberwa, mu nsi yoonayoona, kino omukazi ky'akoze kyona kinaayogerwangaku okumwidhukira.”

Yuda aganha okulya mu Yesu olukwe

¹⁴ Agho mulala ku ikumi n'Ababiri ayetebwa Yuda Isikarioti, yaaja eri Bakabona Abakulu,

¹⁵ yaabakoba ati: “Munampaamu ki nze mmubagemye?” Baamugha ebitundu bya feeza amakumi asatu.

¹⁶ Era okuva ku olwo yaanoonia bwa kaghagaanhia ka kumubagemya.

Yesu alya embaga n'Abeegeresebwa be

¹⁷ Ku lunaku olusooka mu dh'emigaati egitazimbulukusiibwa, Abeegeresebwa baidha ye Yesu baakoba bati: “Gha y'oyenda tukutegekere, y'onaaliira Ekibinuko eky'Okwidhukiriraku Okubitizibwa?”

¹⁸ Yaakoba ati: “Muje ewa nankani mu kibuga, mumukobe muti Omwegeresa akobye ati, ‘Ekiseera kyange kituuse, ewuwo ye nnaaliira Ekibinuko eky'Okwidhukiriraku Okubitizibwa n'Abeegeresebwa bange.’ ”

¹⁹ Abeegeresebwa baakola nga Yesu bwe yabakoba, baategeka Ekibinuko eky'Okwidhukiriraku Okubitizibwa.

²⁰ Eigulo bwe lyatuuka yaatyama ku kiiwulo ghalala n'Abeegeresebwa be eikumi n'ababiri.

²¹ Bwe baali bali kulya yaakoba ati: “Bwenebwene ka mbakobere, mulala ku imwe aidha kumpaayo.”

²² Abeegeresebwa baanakughala inho, era baatoolera okumukoba mulala mulala bati: “Musengwa, otakoba oti ninze?”

²³ Yesu yaabairamu ati: “Oyo akoza ninze mu kibya, oyo n'aidha okumpaayo.

²⁴ Kale Omwana w'Omuntu aja kufa nga bwe kyamughandiikibwaku, aye akagwireku oyo anaaghaayo Omwana w'Omuntu! Omuntu oyo kyandimubeereire kikalamu nguli tiyazaalibwa.”

²⁵ Yuda, eyamulyamu olukwe, yaakoba ati: “Mwegeresa, otakoba oti ninze?” Yaamukoba ati: “Niiwe okyogeire.”

Ekyeigulo kya Musengwa

²⁶ Bwe baali balya, Yesu yaatoola omugaati, yaagugha enkabi nga yeebaza, yaagumegulamegulamu, yaagha Abeegeresebwa yaakoba ati: “Mutoole, mulye guno mubiri gwange.”

²⁷ Ate yaatoola ekikopo, yeeyanza, yaakibagha ng'akoba ati: “Munhwe kuno mwenamwena

²⁸ kuba guno musaayi gwange, ogw'endagaano empyaka oguyuyibwa olw'abantu kamaala okusoniyibwa ebibi.

²⁹ Ka mbakobere: tiriirayo kunhwa ku kibala kino eky'omuzabbibu, okutuusa ku lunaku olwo lwe ndikinhwa n'imwe nga kiyaaka mu Bwakyabazinga bwa Lata wange.”

³⁰ Era bwe baamala okwemba olwembo baafuluma baaja ku Lusozi olw'Emiti Emyoliva.

Yesu akoba nga Petero bw'aidha okumwegaana

³¹ Agho Yesu yaabakoba ati: “Imwe mwenamwena, obwire bwaleero, mwidha kuneegaana kuba kyaghandiikibwa kiti, ‘Ndiita omwayi, n'entaama edh'omu kisibo dhaasansaana.’

³² Aye bwe ndimala okuzuukira ndibeesookayo e Galilaaya.”

³³ Petero yaamwiramu ati: “Waire abandi boonaboona banaakwegaana, nze tiidha kukwegaana naire.”

³⁴ Yesu yaamukoba ati: “Bwenebwene ka nkukobere obwire bwaleero bwene, enkoko enaaba ekaali kukolyoka, ng'oneegaaniire emikuzi esatu.”

³⁵ Petero yaamukoba ati: “Ni bwe kiba nga kyetaagisa nze okufa n'iwe, tiidha kukwegaana naire.” Era n'Abeegeresebwa boonaboona baakoba batyo.

Yesu asaba e Gethisemane

³⁶ Agho Yesu yaatuuka nabo mu kifo ekyetebwa Gethisemane, era yaakoba Abeegeresebwa ati: “Imwe mutyame ghano, nze njenga ere nsabe.”

³⁷ Yaatoola Petero ni batabane ba Zebedaayo bombiriri yaaja nabo yaawulira enaku n'okweraliikirira.

³⁸ Agho yaabakoba ati: “Ndi n'enaku ku mwoyo eyenda kundhita. Imwe musigale ghano mumoge ghalala ninze.”

³⁹ Yeeyongerayooku katono, yaakuba amakiryaivu yaasaba ng'akoba ati: “Lata oba kisoboka mponia ekikopo kino, ti nga nze bwe nhenda, aye nga iwe bw'oyenda.”

⁴⁰ Yaidha eri Abeegeresebwa, yaayagaana nga batendwike, agho yaakoba Petero ati: “Olwo imwe timughanze kumogaku ninze saawa ndala eti?

⁴¹ Mumoge era musabe mulobe kulebwa kuba omwoyo mumalirivu aye omubiri munafu.”

⁴² Kabiri yaaja omukuzi ogwokubiri yaasaba ng'akoba ati: “Lata, oba nga ekikopo kino tikighanga kuntoolebwaku, okutoolaku nga nkinhweire, kikolebwe nga bw'oyenda.”

⁴³ Yaira kabiri, yaabaagaana nga batendwike, kuba amaiso gaibwe gaali gazitoighe.

⁴⁴ Yaabaleka kabiri yaaja yaasaba omukuzi ogwokusatu, ng'ayogera ebibono n'ebirala ebyo.

⁴⁵ Agho yaaja eri Abeegeresebwa yaabakoba ati: “Imwe buti mutenduke era muwuumule. Biwoire. Esaawa etuuse, era Omwana w'Omuntu aja kugheebwayo mu mikono egy'aboonooni.

⁴⁶ Musituke, tuje, anampaayo ali kumpi.”

Yesu bamugema

⁴⁷ Yesu bwe yali ng'ayogera, Yuda, omulala ku Ikumi n'Ababiri yaatuuka n'eikuukuubira ery'abantu okuva eri Bakabona Abakulu, n'abakulu ab'ebika, nga bagemye empiima n'emiigo.

⁴⁸ Mperaano, eyamulyamu olukwe yabagha akamanhiso. Yali abakobye ati: “Ye nnaalamusa nga mmugwa mu kifuba nga n'oyo, mumugeme.”

⁴⁹ Era mangu ago olwatuuka ghe Yesu ng'amukoba ati: “Ba miraala Mwegeresa!” Ng'amugwa mu kifuba.

⁵⁰ Aye Yesu yaamukoba ati: “Muna kiki ekikuleese?” Agho, nga bale baseeta bamugema nga bamukalangula.

⁵¹ Aye mulala ku abo abaali ni Yesu yaasowolayo empiima ye, yaatema omwiru w'Omukulu wa Bakabona yaamukutulaku kutu.

⁵² Yesu yaamukoba ati: “Empiima yo giize mu kiruutu kyayo kuba abo boonaboona abakozesa empiima, empiima n'eribazikiriza.

⁵³ Olowooza oti tisobola kusaba Lata wange n'ampeereza magye ga bamalaika gaswika ikumi n'abiri buti buti?

⁵⁴ Aye ng'olwo kabiri Ebyaghandiikibwa bituukirira bitya, ebikoba biti kiri n'okuba kityo?”

⁵⁵ Mu saawa yeene eyo, Yesu yaakoba eikuukuubira ati: “Mwidhie okungema ng'abaja okugema omunhazi, mwaidha n'empiima n'emiigo? Buli lunaku natyamanga mu isinzizo naayegeresa, aye timwangema.

⁵⁶ Aye bino byonabyona bibairegho okutuukiriza ebyo ebyaghandiikibwa abalanzi.” Agho Abeegeresebwa boonaboona baamuleka baalumuka.

Yesu mu mbuga

⁵⁷ Abo abaagema Yesu, baamutwala ewa Kayafa Omukulu wa Bakabona, eyeesolokeza Abanamateeka n'abakulu ab'ebika.

⁵⁸ Petero yaamunonereza ng'aleseeghooku akata, okutuukira irala mu kisaagaati eky'Omukulu wa Bakabona yangira yaatyama n'abakuumi, abone ebinairirira.

⁵⁹ Bakabona Abakulu, n'embuga yoonayoona, baanoonia obudhulizi obw'okusubaayiriza ku Yesu, kwe babe basinziire okumwita.

⁶⁰ Aye ti baabufuna naire, waire ng'abadhulizi kamaala abaguya baavaayo baamughaayira. Aye olumaliira babiri bavaayo,

⁶¹ baakoba bati: “Ono yakoba ati asobola okumenha eisinzizo lya Katonda ate era mu nnaku isatu yaalizimba.”

⁶² Omukulu wa Bakabona yaasituka, yaamukoba ati: “Bano bye bali kukuseegha, ozira ky'oiramu?”

⁶³ Aye Yesu yaasirika busirike. Agho Omukulu wa Bakabona yaamukoba ati: “Mu ga Katonda omulamu, tukobere oba nga niiwe Kurisito Omwana wa Katonda.”

⁶⁴ Yesu yaamukoba ati: “Niiwe okyogeire. Aye ka mbakobere: okuva ni buti, mwidha kubona Omwana w'Omuntu ng'atyaime ku luuyi olw'omukono omusaadha ogw'ow'obukumu, era ng'aidhira mu bire eby'eigulu.”

⁶⁵ Agho Omukulu wa Bakabona yaakendebula ebivaalo bye, era yaakoba ati: “Avumye Katonda! Tukaayenderaki abadhulizi? Mumaze okuwulira bw'avuma Katonda!

⁶⁶ Imwe mukoba mutya?” Baamwiramu bati: “Agwaine afe.”

⁶⁷ Baamufuudha mu maiso, baamudaazadaaza inho, baamukuba empi,

⁶⁸ nga bwe bamukoba bati: “Kurisito, teeba, naani akukubye?”

Petero yeegaana Yesu

⁶⁹ Agho Petero bwe yali ng'atyaime agho ku luya mu kisaagaati, omughala yaaseeta gh'ali, yaakoba ati: “Iwe weena obaire ni Yesu Omugalilaaya.”

⁷⁰ Aye yeegaana mu maiso ga boonaboona ati: “Tiidhi ky'okoba.”

⁷¹ Bwe yali afuluma ku luya omughala owundi yaamubona era yaakoba abaali beemereire agho ati: “Ono abaire ni Yesu ow'e Nazarethi.”

⁷² Kabiri era yeegaana nga n'okwefuugha kw'ataire, ati: “Nze oyo omusaadha timwidhi.”

⁷³ Nga ghabiseegho akaseera katono, abaali beemereire agho baaseeta, baakoba Petero bati: “Bwenebwene oli munaibwe inho, kuba endhogera yo yeene ekuseegha.”

⁷⁴ Agho yaatoolera okwefuugha era n'okulayira ati: “Nze omusaadha timwidhi.” Era mangu ago, enkoko yaakolyoka.

⁷⁵ Petero yaidhukira ekibono Yesu kye yali amukobye ati: “Enkoko enaaba ng'ekaali kukolyoka, oidha kuba ng'oneegaine emikuzi esatu.” Agho yaafuluma ku luya, yaalira inho.