Matayo 25 - Baibuli Ekibono kya Katonda 2014

Olufumo olw'abaghala eikumi

¹ “Agho ni, Obwakyabazinga obw'omu igulu bulifaanana ng'abaghala eikumi abaagema amataala gaibwe ni baja okusangaalira eyali abayiiza.

² Abataanu ku abo baali basiru, ate abataanu nga bagezi.

³ Kuba abasiru baatwala amataala gaibwe, aye tibaatwala mafuta.

⁴ Aye abagezi baatwala enthupa edh'amafuta ghalala n'amataala gaibwe.

⁵ Abayiiza bwe yalwagho okutuuka, boonaboona baawongera era baatenduka.

⁶ “Mu bwire ghagati ghabaagho aleekaana ati, ‘Abayiiza wuuno atuuse! Mwidhe mumusangaalire.’

⁷ Agho abaghala boonaboona baazuuka, baatereeza amataala gaibwe.

⁸ Abasiru baakoba abagezi bati, ‘Mutughe ku mafuta gaimwe, kuba amataala gaife gali kuzikira.’

⁹ Aye abagezi baabakoba bati, ‘Gasobola obutatumala ife n'imwe ekisinga muje ye bagatunda mwegulireyo.’

¹⁰ Bwe baaja okugula amafuta abayiiza yaatuuka, era abo abaali beetegeike bangira naye ku mbaga, olwigi lwaigalwa.

¹¹ “Nga ghabiseegho entangama, abaghala bale abandi boona baidha, baakoba bati, ‘Musengwa, Musengwa twiguliregho.’

¹² Aye yaabairamu ati, ‘Bwenebwene ka mbakobere, tibaidhi.’

¹³ “Agho ni, mumoge kuba timwidhi lunaku waire saawa.

Olufumo lwa talanta

¹⁴ “Kuba kiriba oti n'omuntu eyali aja mu lugendo n'ayeta abagheereza be n'abagemya ebintu bye.

¹⁵ Mulala yamugha talanta itaanu, owundi ibiri, n'owundi ndala, ng'ajiira ku busobozi bwaibwe, yaaja.

¹⁶ Eyafuna talanta eitaanu yaja mangu ago yaadhisuubuza, yaazaazaamu talanta edhindi itaanu.

¹⁷ N'eyafuna talanta eibiri yeena atyo, yaaja yaazaazaamu edhindi ibiri.

¹⁸ Aye ole eyafuna endala, yaaja yaasima mu itaka, yaaziika omwo lupiiya ya musengwa we.

¹⁹ “Nga ghabiseegho entangama, musengwa w'abagheereza abo yaira yaababuuza ebigema ku bibye.

²⁰ Eyafuna talanta eitaanu yaaseeta ni talanta edhindi itaanu yaakoba ati, ‘Musengwa, wampa talanta itaanu aye bona nazaazaamu talanta edhindi itaanu.’

²¹ Musengwa we yaamukoba ati, ‘Weekaza, omugheereza omulungi era omwesigwa obaire mwesigwa mu bitono, ndidha kukugemya ebingi ingira mu isanhu lya Musengwa wo.’

²² “N'oyo eyafuna talanta eibiri yaaseeta, yaakoba ati, ‘Musengwa, wampa talanta ibiri aye bona, nazaazaamu talanta edhindi ibiri.’

²³ Musengwa we yaamukoba ati, ‘Weekaza, omugheereza omulungi era omwesigwa obaire mwesigwa mu bitono, ndidha kukugemya ebingi ingira mu isanhu lya musengwa wo.’

²⁴ “Era n'oyo eyafuna talanta endala yaaseeta, yaakoba ati, ‘Musengwa, namanha ng'oli muntu mukalangufu, okungula by'otaasimba, ate waasololeza y'otaasigira.

²⁵ Kale, natya, talanta yo naaja naagigisa mu itaka gema, ebibyo biibyo.’

²⁶ “Aye musengwa we yaamwiramu ng'akoba ati, ‘Mugheereza iwe omubi, era omugayaavu! Wamanha oti nkungula ye ntaasimba, oti era nsoloza ye ntaasigira.

²⁷ Agho ni, wali ogwaine okugha lupiiya yange abasuubuzi, era okwira nga nfuna kyange n'amagoba.

²⁸ Kale mumutooleku talanta eyo mugighe ole ali n'eikumi.

²⁹ Kuba buli aliku ni ky'ali nakyo alyongerwaku yaaba na bingi, aye azira, n'ekyo ky'ali nakyo kirimutoolebwaku.

³⁰ Era n'oyo omugheereza azira mugaso mumusuule ku luya mu kizikiiza. Eyo eriba okugegenga n'okuluma emba olw'obulumi obubitirivu.’

Okusalirwa omusango okw'amaghanga

³¹ “Omwana w'Omuntu bw'aliidha mu kitiisa kye eky'Obwakyabazinga ng'ali ni bamalaika boonaboona, alityama ku kityamo kye eky'ekitiisa.

³² Amaghanga goonagoona galyesololeza mu maiso ge, era yaabaawulamu, ng'omwayi bw'ayawula entaama mu mbuzi,

³³ entaama yaadhiiza ku luuyi olw'omukono gwe omusaadha, ate embuzi yaadhiiza ku luuyi olw'omugooda.

³⁴ Agho Kyabazinga alikoba abo abaliba ku luuyi olw'omukono gwe omusaadha ati, ‘Mwidhe imwe Lata wange be yagha enkabi, mube mu Bwakyabazinga obwabategekerwa okuva ensi lwe yatondebwa.

³⁵ Kuba nali muyala mwampa eky'okulya endiwo yaanuma mwampa eky'okunhwa nali nga timundidhi mwansangaalira.

³⁶ Nali nga mbita madu mwampa eky'okuvaala, nali mulwaire mwangenza, naaba mu ikomera mwaidha mwambona.’

³⁷ “Agho abatuufu balimwiramu bati, ‘Musengwa twakubona li ng'endhala ekuluma ni tukugha eky'okulya, oba nga endiwo ekuluma ni tukugha eky'okunhwa?

³⁸ Twakubona li nga titukwidhi ni tukusangaalira oba ng'oli madu ni tukugha eky'okuvaala?

³⁹ Era twakubona li ng'oli mu ikomera ni twidha okukubona?’

⁴⁰ “Agho Kyabazinga alibairamu ati, ‘Bwenebwene ka mbakobere buli kye mwakolera omulala ati ku baganda bange bano abato, mwakikolera nze.’

⁴¹ “Agho, alikoba abo abaliba ku mugooda ati, ‘Munve mu maiso imwe abalaame, muje mu muliro ogutazikira ogwategekerwa Sitaani ni bamalaika be!

⁴² Kuba nali ng'endhala enuma timwampa kya kulya, nali nfa endiwo, timwampa kya kunhwa.

⁴³ Bwe nali timanhiibwa ye muli timwansangaalira, bwe nali amadu timwampa kya kuvaala, bwe nali omulwaire, ni bwe nali mu ikomera ti mwaidha kumbona.’

⁴⁴ “Agho boona baliiramu baakoba bati, ‘Musengwa, twakubona li ng'endhala ekuluma, oba ng'ofa endiwo, oba nga titukwidhi, oba ng'oli madu, oba ng'oli mugodhe, oba ng'oli mu ikomera ni tuloba okukulaadha?’

⁴⁵ “Agho alibairamu ati, ‘Bwenebwene ka mbakobere buli lwe mutaalaadha omulala ku bato bano timwalaadha nze.’

⁴⁶ Ng'olwo bano baja ku kibonerezo ekitawaagho, aye abatuufu nga baja mu bulamu obutawaagho.”