Matayo 24 - Baibuli Ekibono kya Katonda 2014

Okwonoonebwa okw'eisinzizo

¹ Agho Yesu bwe yava mu isinzizo, ng'agolola, Abeegeresebwa be baidha okumulaga enzimba ey'eisinzizo.

² Yaabakoba ati: “Ebyo byonabyona timuli kubibona? Bwenebwene ka mbakobere: Ghano tighaliba ibaale lirisigala ku liinaalyo nga tirisuuliibwa ghansi.”

Entandiikwa y'ebibonoobono

³ Bwe yali ng'atyaime ku Lusozi olw'Emiti Emyoliva, Abeegeresebwa baidha y'ali mu kyama, baakoba bati: “Tukobere ebyo biribaagho li, era kiki ekiriba akamanhiso ak'okwidha kwo, n'okufundikira okw'ebyanda?”

⁴ Yesu yaabairamu ati: “Mwekuume, ghalobe kubaagho abaghabya.

⁵ Abantu kamaala baliidha mu liina lyange nga beeyeta nze, Kurisito, era balighabya abantu kamaala.

⁶ Muliwulira entalo ghano ni ghale, mwekuume, mutatabulwa ebyo biri n'okubaagho, aye ng'enkomerero ekaali.

⁷ Eighanga lirirumba liinaalyo, n'obwakyabazinga bwalumba bwinaabwo. Ghalibaagho endhala ni musisi mu biketezo kamaala.

⁸ Aye bino byonabyona, biriba oti bisa ebisooka eby'omukazi alumwa.

⁹ “Mu biseera ebyo balibagema baabaghaayo okudaazibwadaazibwa, n'okwitibwa. Abamaghanga agandi boonaboona balibakyagha nga babalanga nze.

¹⁰ Agho abantu kamaala baliterebuka, baaliidhaganamu enkwe, era baakyaghagana.

¹¹ Abalanzi abaguya kamaala baliboneka era balikyamya abantu kamaala.

¹² Olw'okuba obudheemu bulyeyongera, okugonza kw'abantu kamaala kuja kwiririra.

¹³ Aye oyo alyekalangula okutuusa ku nkomerero, alirokoka.

¹⁴ Era n'Amawulire Amalungi ag'Obwakyabazinga galirangirirwa mu nsi yoonayoona, ng'amazima ag'okudhulirwa amaghanga goonagoona agho ni ng'enkomerero etuuka.

Ekyenhinhalwa Ekizikiriza

¹⁵ “Kale bwe mubonanga Ekyenhinhalwa Ekizikiriza, ekyayogerwaku Danieli omulanzi, nga kiri mu kifo ekitukuvu, asoma bino ategeere.

¹⁶ Abo abaliba mu Buyudaaya balumukiranga mu nsozi.

¹⁷ Oyo aliba ghaigulu ku ndhu ataikanga kutoola mu ndhu ye bibye.

¹⁸ Era oyo aliba mu nimiro atakyukanga kwira inhuma kunona kivaalo kye.

¹⁹ Abalinda n'abayonsa mu nnaku edho nga balidaagadaaga inho!

²⁰ Musabe, obwire bwaimwe obw'okulumukiramu bulobe kubaagho mu biseera bya kiinhogogo oba ku Sabbato

²¹ kuba ghalibaagho okudaagadaaga okw'amaani, nga tikubangaghooku kutyo okuva ku mainhama ag'ensi, okutuuka buti, era okutaja kubaagho kabiri.

²² Nguli enaku edho tidhaakendeezebwaku, ghazira muntu yandiwonie. Aye ku lw'abalonde enaku edho dhirikendeezebwaku.

²³ “Agho ni bweghabaagho abakoba ati, ‘Bona, Kurisito wuuno’ oba ati, ‘Wuule.’ Mutaikirizanga

²⁴ kuba ghaliidhagho abantu abeeyeta Kurisito n'abeeyeta abalanzi, era baakola obumanhiso obw'amaani n'ebyewuunhio, nga benda okuwubania n'abalonde, bwe kiba kisoboka.

²⁵ “Mwekuume mbakobeire nga bukaali.

²⁶ Kale ni, bwe bakoba bati, ‘Kurisito ali mu irungu,’ timujangayo oba bati, ‘Wuuno, ali mu kisenge,’ mutaikirizanga.

²⁷ Kuba ng'olukuba bwe lumyansa okuva ku luuyi olw'e buvandhuba ni lutuuka ku luuyi olw'e bugwandhuba, n'okwidha kw'Omwana w'Omuntu kutyo bwe kuliba.

²⁸ Aghaba omulambo ensega ghe dheesololeza.

Okutuuka kw'Omwana w'Omuntu

²⁹ “Okudaagadaaga okw'enaku edho nga kwakawa, endhuba eriirugala, omwezi guliroba okwaka, emuunienie dhirimagalika okuva mu igulu, n'amaani ag'omu igulu galitengeesebwa.

³⁰ Agho akamanhiso ak'Omwana w'Omuntu kaliboneka mu igulu era abantu boonaboona ab'oku nsi balikuba empungu, nga babona Omwana w'Omuntu aidhira mu bire eby'omu igulu n'amaani, n'ekitiisa ekinene.

³¹ Eigwala ery'amaani bwe lirifuuwa, alituma bamalaika be baasoloza abalonde be okuva mu mpewo eina, okuva eigulu ye liva okutuusa ye likoma.

Ekyegerwa ku muti omutiini

³² “Mwegere ku lufumo olw'omuti omutiini. Ensaga bwe dhiira obuto mumanha muti endoboozi eri kumpi.

³³ Kale imwe mwena bwe mubonanga ebintu bino byonabyona, mumanhanga muti ali kumpi, ku mulyango kwene.

³⁴ Bwenebwene ka mbakobere: abantu ab'oluse luno baliba bakaali kuwaagho ng'ebintu bino byonabyona bibairegho.

³⁵ Eigulu n'ensi biriwaagho aye ebibono byange tibiriwaagho.

Olunaku ni saawa tibimanhiibwa

³⁶ “Aye ghazira aidhi lunaku olwo ni saawa, ni bwebaakaba bamalaika ab'omu igulu, waire Mwana, okutoolaku Lata yenka.

³⁷ Nga bwe kyali mu biseera bya Noa, ni mu kwidha kw'Omwana w'Omuntu bwe kiriba.

³⁸ Nga bwe kyali mu nnaku edho edhaakulembera amaadhi ag'omwidhuzo, abantu baali mu kulya na kunhwa, kubayiza na kubayira, okutuusa olunaku Noa lwe yangira mu lyato.

³⁹ Aye tibaamanha okutuusa amaadhi ag'omwidhuzo bwe gaidha ni gabasaaniagho. Kale atyo n'Omwana w'Omuntu bw'aliidha.

⁴⁰ Agho abaliba ababiri mu nimiro, omulala alitwalibwa owundi yaalekebwa.

⁴¹ Ababiri abaliba basa ku lubengo, omulala alitwalibwa owundi yaalekebwa.

⁴² “Kale ni mumoge, kuba timwidhi kiseera Musengwa waimwe ky'alituukiramu.

⁴³ Mutegeere ni kino: Nguli mwenemu amanha bwire ki omwibi bw'anaatuukiramu, nguli akuuma yaaloba kuganha ndhu ye kusimibwa.

⁴⁴ Kale imwe mwena mwetegeke, kuba mu kiseera kye mutamusuubiriramu, Omwana w'Omuntu mw'alituukira.

Omugheereza omulungi

⁴⁵ “Naani omugheereza omulungi era omugezi? Oyo musengwa we ye yalekera ab'omu maka ge okubaghanga emere yaibwe mu kiseera ekituufu?

⁴⁶ Wa nkabi omugheereza oyo Musengwa we bw'aira n'amwagaana ng'ali kukola atyo.

⁴⁷ Bwenebwene ka mbakobere: Aja kumusigira ebibye byonabyona.

⁴⁸ Aye omugheereza bw'aba mubi n'akoba mule mu mwoyo gwe ati Musengwa we taidha kwira mangu,

⁴⁹ era n'atoolera okukuba bagheereza baine, n'okulya n'okunhwa n'abatamiivu,

⁵⁰ Musengwa w'omugheereza aliidha mu kiseera ky'atamusuubiriramu, ku saawa gy'ataidhi.

⁵¹ Musengwa we alimubonereza inho, yaamuta mu bakuusa omuli okugegenga n'okuluma emba olw'obulumi obubitirivu.